ەرتەڭ ماجارستان استاناسى – بۋداپەشتتە ۆەلوسپورتتان ءبىر جىل بەدەرىندە ۇيىمداستىرىلاتىن ەڭ ماڭىزدى ءۇش جارىستىڭ العاشقىسى, ياعني 113 جىلدىق تاريحى بار «دجيرو د’يتاليا» گراند-تۋرى باستالادى. ءۇش اپتاعا جالعاساتىن بيىلعى ۆەلوكوپكۇندىكتىڭ كەزەڭدەرى ماجارستان, سلوۆەنيا جانە يتاليا تاس جولدارىندا ءوتىپ, 29 مامىردا ۆەروناداعى جەكەلەي باسەكەمەن ءوز مارەسىنە جەتەدى. بيىلعى دودادا ادەتتەگىدەي قازاقستاندىق Astana Qazaqstan Team ۆەلوكلۋبىنىڭ سپورتشىلارى دا باق سىنايدى.
الەمدەگى ەڭ كونە ۆەلوجارىستىڭ ءبىرى سانالاتىن «دجيرو د’يتاليانىڭ» تاريحى سوناۋ 1909 جىلدان باستاۋ الادى. كەزىندە يتالياداعى قاراپايىم سپورت باسىلىمىنىڭ تارالىم سانىن ءوسىرۋ, وقىرماندار قاتارىن كوبەيتۋ ماقساتىندا ۇيىمداستىرىلعان بۇل دودا بۇگىندە الەم جۇرتى ءسۇيسىنىپ تاماشالايتىن ايگىلى ۆەلوجارىستىڭ بىرىنە اينالدى. 1908 جىلى Gazzetta dello Sport گازەتىنىڭ ۆەلوسپورت ءبولىمىنىڭ رەداكتورى ارماندو كۋنە باسىلىمنىڭ 7 تامىزداعى ءنومىرىنىڭ ءبىرىنشى بەتىنە 1909 جىلدان باستاپ «دجيرو د’يتاليا» كوپكۇندىگىنىڭ باستالاتىندىعى جونىندە حابارلاندىرۋ بەرەدى. ەرتەسى كۇنى وقىرماندار اراسىندا كوپ تالقىلانعان جارىستىڭ جارناماسىنان سوڭ رەداكتوردىڭ يدەياسىن يتاليا ۆەلوسپورت وداعى قولداي كەتىپ, العاشقى جارىستى 1909 جىلدىڭ 13 مامىرىندا وتكىزەدى. يتاليانىڭ لورەتو قالاسىنان باستالعان ۆەلوكوپكۇندىك ميلاندا تىزگىن تارتادى. سەگىز كەزەڭنەن تۇرعان العاشقى تۋرنيردە جەرگىلىكتى ۆەلوشاباندوز لۋيدجي گاننا جەڭىمپاز اتانادى. ال جالپى تۋرعا 127 ۆەلوشاباندوز قاتىسىپ, ۇزاقتىعى 2488 شاقىرىم جولدى ءجۇرىپ وتكەن. ءبىر قىزىعى, مارەگە 127 سپورتشىنىڭ تەك 49-ى عانا كەلگەن.
ىرگەتاسى 2006 جىلى قالانىپ, 2007 جىلدان باستاپ ءىرى گراند-تۋرلارعا قاتىسۋ قۇقىعىن يەلەنگەن «استانا» ۆەلوكومانداسى سول جىلدان باستاپ ءداستۇرلى «دجيرو د’يتالياعا» تۇراقتى قاتىسىپ كەلەدى. كوماندا ەندى جاساقتالعان سوڭ الەكساندر ۆينوكۋروۆ باستاعان جىگىتتەر العاشقى ماۋسىمدا ۇزدىكتەر قاتارىنان كورىنە المادى. كەلەسى جىلى كىل مىقتى ۆەلوسپورتشىلاردان جاساقتالعان قازاقستاندىق كوماندا العاش رەت ءىرى جەڭىسىنە قول جەتكىزدى. ايگىلى يسپانيالىق ۆەلوشاباندوز البەرتو كونتادور سول جىلعى دودانىڭ 15-كەزەڭىنەن باستاپ قىزعىلت ءتۇستى جەيدەنى ۇستىنە كيىپ, جارىس سوڭىنا دەيىن جالپى ەسەپتە كوشباسشىلىقتى ەشكىمگە بەرگەن جوق. ءبىر ايتا كەتەرلىگى, كونتادور «دجيرو د’ يتاليانىڭ» بىردە-ءبىر كەزەڭىندە جەڭىسكە جەتپەي, جارىس جەڭىمپازى اتانعان ساناۋلى سپورتشىنىڭ ءبىرى. «استانانىڭ» «دجيرو د’يتالياداعى» جەڭىستى جولى كەيىن بەس جىلعا ءۇزىلىپ, 2013 جىلى يتاليالىق ۆينچەنتسو نيبالي قايتا جالعادى. ول ەڭ ءبىرىنشى 2013 جىلى ۇزدىكتەر قاتارىنان كورىنسە, اراعا ءۇش جىل سالىپ, 2016 جىلى تاعى دا سول بيىگىنەن كورىندى. سونىمەن قاتار ءار جىلدارى جەكەلەگەن كەزەڭدەردە «استانانىڭ» باسقا دا ۆەلوشاباندوزدارى تۇعىردىڭ بيىك ساتىسىنان كورىنىپ ءجۇردى.
وكىنىشكە قاراي, 2016 جىلدان بەرى باقانداي التى جىل وتسە دە, قازاقستاندىق كوماندانىڭ بىردە-ءبىر وكىلى ءالى كۇنگە دەيىن جۇلدەگەرلەر قاتارىنان كورىنە الماي كەلەدى. 2020 جىلى «استانانىڭ» دانيالىق وكىلى جالپى ەسەپتە التىنشى ورىنعا تابان تىرەگەن بولسا, بىلتىر رەسەيلىك الەكساندر ۆلاسوۆ جۇلدەگە سىنىقسۇيەم قالعاندا ءسۇرىنىپ, ءتورتىنشى ورىندى قاناعات تۇتۋعا ءماجبۇر بولدى.
قازاقستاندىق جانكۇيەرلەر «استانانىڭ» «دجيرو د’يتالياداعى» جەڭىسپەن ورىلگەن تاماشا ءداستۇرى بيىل قايتا جالعاساتىنىنان ءۇمىتتى. ويتكەنى بيىلدان باستاپ قازاقستاندىق ۆەلوكلۋبقا كەزىندە كوماندانى ورگە سۇيرەگەن يتاليالىق ۆينچەنتسو نيبالي مەن تاۋلى كەزەڭدەردىڭ ۇزدىگى كولۋمبيالىق ميگەل انحەل لوپەس قايتا ورالدى.
«دجيرو د’يتاليا» جارىسىنىڭ ەكى دۇركىن چەمپيونى, جەتى كەزەڭنىڭ جەڭىمپازى, گراند-تۋردىڭ 2010, 2011, 2017 جىلعى 2019 جۇلدەگەرى ۆينچەنتسو نيبالي بيىلعى «دجيروعا» 11 مارتە قاتىسقالى تۇر. ال وسى دودانىڭ 2018 جىلعى جۇلدەگەرى ميگەل انحەل لوپەس ءۇشىن بۇل ءتورتىنشى جارىس بولماق. سونداي-اق «استانا» كومانداسىنىڭ تاعى ءبىر وكىلى يسپانيالىق داۆيدە دە لا كرۋس تا «دجيرو د’يتاليا» ۆەلوكوپكۇندىگىندە ءتورتىنشى مارتە ونەر كورسەتەدى. جوعارىداعى ءۇش سپورتشىدان بولەك, بيىلعى جارىسقا «استانا» ۆەلوكلۋبىنان يتاليالىق ۆالەريو كونتي جانە فابيو فەللينە, امەريكالىق دجو دومبروۆسكي, كولۋمبيالىق حارولد تەحادا مەن قازاقستاندىق جاس ۆەلوشاباندوز ۆاديم پرونسكي قاتىسادى. ۆاديم بيىل قاتارىنان ەكىنشى جىل ۇلكەن جارىستا باق سىناۋ مۇمكىندىگىنە يە بولدى.
وسىدان بىرنەشە كۇن بۇرىن «استانانىڭ» سپورتتىق ديرەكتورى دجۋزەپپە مارتينەللي BiciSport باسىلىمىنا سۇحبات بەرىپ, «دجيرودا» ميگەل انحەل لوپەس كوماندا كاپيتانى بولاتىنىن ايتتى. ء«بىز وسى جىلى كولۋمبيالىق ۆەلوشاباندوزعا ۇلكەن سەنىم ارتىپ وتىرمىز. ويتكەنى 2018 جىلى ول ءوزىنىڭ يتالياداعى العاشقى ءىرى تۋرنيرىنە ءبىرىنشى رەت قاتىسىپ تۇرعانىنا قاراماستان, جالپى ەسەپتە ءۇشىنشى ورىنعا يە بولدى. كەلەسى جىلى ۇزدىك وندىقتىڭ قاتارىنان تابىلىپ, ەڭ ۇزدىك جاس ۆەلوشاباندوزعا بەرىلەتىن اق جەيدەگە يە بولدى. ءتورت جىلدىڭ ىشىندە ول اجەپتاۋىر تاجىريبە جيناقتادى. سول تاجىريبەسىنىڭ ارقاسىندا بيىل توپ جارۋعا ءتيىس. ارينە تۋرنيردە بىزدەن دە مىقتى كوماندالار, لوپەستەن دە تىسقاققان ۆەلوشاباندوزدار بار ەكەنىن جوققا شىعارمايمىن. بىراق ءبىز ميگەلگە سەنىم ارتامىز. ونىڭ باستى قارسىلاسى رەتىندە ەكۆادورلىق ريچارد كاراپاستى (Ineos) ەرەكشە اتاپ وتكىم كەلەدى. ول ءوز الدىنا جوعارى ماقسات قوياتىن, ۇنەمى تۇراقتى ناتيجە كورسەتىپ جۇرەتىن ۆەلوشاباندوز. مەنىڭشە, «دجيرونىڭ» تاعدىرى مارمولادەدە وتەتىن 20-كەزەڭدە شەشىلسە كەرەك», دەيدى ول.
سونىمەن قاتار دجۋزەپپە مارتينەللي ريچارد كاراپاستى قالاي جەڭۋ كەرەكتىگىن ويلاستىرىپ جاتقانىن دا مالىمدەدى. «ونى ەشقاشان قاراۋسىز قالدىرۋعا بولمايدى. ءار كەزەڭ سايىن ىڭعايسىز پوزيتسيادا ۇستاپ, ەركىن قيمىلداۋىنا مۇمكىندىك بەرمەۋىمىز كەرەك. ارينە بۇل جەردە ونىڭ قاسىندا جۇرەتىن ۆەلوشاباندوزعا باتىلدىق, جەدەل شەشىم قابىلداپ وتىرۋعا تۋرا كەلەدى. ال ءدال وسى تۇستا ءبىز ۆينچەنتسو ءنيباليدىڭ كومەگىنە مۇقتاجبىز. ول لوپەسكە جاقسى كومەكشى بولا الادى دەپ ويلايمىن. بىراق كەي ساتتەردە ونى ەركىنە جىبەرىپ, جارىستان ءلاززات الۋىنا مۇمكىندىك بەرەمىز. ويتكەنى ول سونداي قۇرمەتكە لايىق ۆەلوشاباندوز. سوندىقتان وعان ەندى ەشتەڭەنى دالەلدەۋدىڭ قاجەتى جوق», دەيدى «استانانىڭ» سپورتتىق ديرەكتورى.
ايتا كەتەيىك, بيىلعى «دجيرو د’يتاليا» ۆەلوكوپكۇندىگىنە 22 كوماندانىڭ 218 ۆەلوشاباندوزى قاتىسادى دەپ جوسپارلانۋدا. ال 21 تۋرعا سوزىلاتىن جارىستا سپورتشىلار بۋداپەشت پەن ۆەروناعا دەيىن جالپى ۇزاقتىعى 3445,6 شاقىرىم جولدى ءجۇرىپ وتەدى.