قازاقستان حالقى بىرلىگى كۇنى قارساڭىندا وڭىردەگى ستۋدەنتتىك شىعارماشىلىق ۇجىمدار اراسىندا «ۇلتتار فەستيۆالى» بايقاۋى ءوتتى. شاراعا وڭىردەگى جوعارى وقۋ ورىندارى مەن تەحنيكالىق كاسىپتىك ءبىلىم بەرۋ ۇيىمدارىنىڭ اراسىنان ىرىكتەلىپ شىققان سەگىز كوماندا قاتىستى.
قاتىسۋشىلار بايقاۋ ەرەجەسىنە سايكەس ەلىمىزدەگى ەتنوس وكىلدەرىنىڭ مادەنيەتى مەن ونەرىن, ۇلتتىق ەرەكشەلىكتەرىن, تۇرمىس-تىرشىلىگىن ساحنالادى. ەرەكشە سايىسقا قاتىسۋشىلار ءۇشىن ەرەجە ءبىر اي بۇرىن اقپارات قۇرالدارى مەن الەۋمەتتىك جەلىلەردە جاريالاندى. ەڭ باستىسى – «ۇلتتار فەستيۆالىنە» قاتىسۋعا تىلەك بىلدىرگەن وقۋ ورىندارى ءۇشىن قاي ەتنوستىڭ مادەنيەتىن ساحنالاۋ ءتارتىبى جەرەبە بويىنشا تاڭدالدى. وسىلايشا سايىس كەزىندە ستۋدەنتتەردىڭ دايىن باعدارلامالاردى ەنگىزۋىنە جول بەرىلگەن جوق. ەكىنشى ەرەكشەلىگى, شىعارماشىلىق باسەكەگە وڭىردەگى كاسىبي ونەر ۇجىمدارى قاتىستىرىلعان جوق. «ۇلتتار فەستيۆالىنە» كەلگەن ءار ستۋدەنتتىك ۇجىمنىڭ باعدارلاماسى ءارالۋان جانە مازمۇندىق جاعىنان وتە باي, ءبىرىن-ءبىرى قايتالاماعاندىعىن اتاپ وتكەن ءجون. بۇل كۇنى ازەربايجان, وزبەك, تاتار, ۋكراين, كورەي جانە باسقا دا دياسپورالاردىڭ ءانى شىرقالىپ, ءبيى بيلەندى, ءتۇرلى قويىلىمدار كورسەتىلىپ, ءار ۇلتتىڭ كيىمدەرىمەن شىققان ستۋدەنتتەر ساحنا ءتورىن جارقىراتىپ جىبەردى.
سايىسقا تىڭعىلىقتى ازىرلەنگەن ۇجىمداردىڭ ونەرى جۇرتتىڭ ەسىندە قالدى. ماسەلەن, ەستۋ جانە كورۋ قابىلەتى بۇزىلعان بالالارعا ارنالعان وبلىستىق مەكتەپ-ينتەرنات ۇجىمى تاتاردىڭ «سابانتويىنان» ادەمى كورىنىس دايىندادى. بۇل جەردە وقۋشىلاردىڭ قيمىل-قوزعالىسى سونداي تارتىمدى, شىرقاعان اندەرى قۇلاققا جاعىمدى جانە ساحنا تورىندەگى بالالاردىڭ قيمىل-قوزعالىستارى دا ەرەكشەلەنىپ تۇردى. ارميان وتباسىنداعى قالىڭدىققا قۇدا ءتۇسۋ ءراسىمىن تاماشا ساحنالاعان كورىنىستەر دە كورەرمەننىڭ ەسىندە قالدى. ارميان ۇلتىنىڭ سالتىندا كۇيەۋ جىگىتتىڭ شەشەسى بوساعاعا كەلگەن قالىڭدىققا ءوز قولىمەن ءۇزىپ نان ۇسىنادى ەكەن.
كونكۋرس قورىتىندىسى بويىنشا وزبەك مادەنيەتىن ساحنالاعان اقتوبە تەحنيكا-تەحنولوگيالىق كوللەدجى, كورەي ۇلتىنىڭ ۇلتتىق جورالعىلارىن كورسەتكەن ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى جانە «سابانتوي» ءراسىمىن ساحنالاعان ەستۋ جانە كورۋ قابىلەتى بۇزىلعان بالالارعا ارنالعان وبلىستىق مەكتەپ-ينتەرنات ۇجىمدارى ۇزدىك دەپ تانىلدى. ولارعا اقتوبە وبلىسىنىڭ كيەلى جەرلەرىنە ساياحاتقا بارۋ جولداماسى تاپسىرىلدى.