تەمىر مىنەزدى تۇلعا

گەنەرالدىڭ ەسىمى ءىىم ىشكى اسكەرى, بۇگىن­دەرى ۇلتتىق ۇلان باسشىلىعىنىڭ ۇنەمى اۋزىندا جۇرەدى. بارلىق كومانديرلەر وزدەرىن ونىڭ شاكىرتى سانايدى. جەكە قۇرامدا گەنەرالدىڭ سوزدەرى مىسالعا, باسقارۋ ءادىسى مەن ايتقان وي-پىكىرلەرى قاناتتى سوزدەرگە اينالعان. ال تاجىريبەلى وفيتسەرلەر گەنەرال-لەيتەنانت بولات جاناساەۆتىڭ تۇسىندا قىزمەت اتقارعانىن ماقتان تۇتادى. 

مۇنىڭ سىرى نەدە دەسەڭىز, ايتىپ وتەرلىك جايتتار كوپ. گەنەرال ب.جاناساەۆ فەنومەنىن ءتۇسىنۋ ءۇشىن ونىڭ عۇمىرىنا تام-تۇمداپ ۇڭىلگە­نىمىز ءجون.

بولات باقىتجان ۇلى اقتوبە وبلى­سىنىڭ تەمىر قالاسىندا دۇنيەگە كەلگەن. ادام ەسىمى مەن تۋعان ورتاسى ازا­ماتتىڭ تاعدىرىنا, جالپى, تۇلعا بو­لىپ قالىپتاسۋىنا تىكەلەي ىقپال ەتە­دى ەمەس پە؟ ەسىمى بولات, تۋعان قا­لا­سى تەمىر قالاسى بولعاندىقتان با, كەيىپ­كەرىمىزدىڭ پەشەنەسىنە تەگەۋرىن­دى ما­ماندىقتى, ياعني اسكەري سالانى تاڭ­داۋى جازىلعان ەدى. ونىڭ اسكەري ادام بولۋ تۋرالى شەشىمىن ەڭ الدىمەن, اتا-اناسى مەن مۇعالىمدەرى ماقۇلدادى.

– اكەم باقىتجان بەيسەنبى ۇلى مەن انام ءۇرزيا سارسەنبايقىزى بالا­لار­عا بارلىق جاقسىلىقتى ۇيرەتتى, ومىرگە قاجەتتى جوعارى ادامگەرشىلىك قاسيەتتەردى ءسىڭىردى. سونىڭ ارقاسىندا ءبىز جاقسى اتقا لايىقتى ازامات بولىپ وستىك, – دەپ گەنەرال ومىرلىك تاڭداۋى تۋرالى ەستەلىگىمەن ءبولىستى.

مەكتەپتى اياقتاعان سوڭ بولات باقىت­­جان ۇلى كەڭەس وداعىنىڭ مار­­شالى كونەۆ اتىنداعى الماتى جال­پى­اسكەري كوماندالىق ۋچيلي­ششە­سىنە وقۋعا تۇسەدى. «وفيتسەرلەر شە­بەرحاناسى» اتانعان اسكەري وقۋ ور­نىندا ول بولاتتاي شىڭدالىپ, ال­ماس قىلىشتاي قالىپتاسادى. ساپ­تىق جانە دەنە دايىندىعى, قارۋ قول­دانۋ تاسىلدەرى, اسكەري كيىم كيۋ ۇلگى­­لەرى مەن ءومىر سۇرلەۋىنەن وتكەن ۇلا­عاتتى ۇستازدارىنىڭ بەرگەن ءبىلى­مى كۋرسانتتىق ءومىردىڭ اجىراماس بو­لىگىندەي بولدى. «جىگىت جانعان وت بولسىن» دەيدى حالىق دانالىعى. بولاشاق گەنەرال كۋرسانتتىق كەزىنەن باستاپ ءۇمىتتى اقتايتىنىن كورسەتتى. ونىڭ سپورتتىق, مادەني جان-جاقتى دامۋى اسكەري سالاداعى بولاشاق جەڭىستەرىنىڭ ىرگەتاسى ەدى. قوعامدىق جۇمىستارعا بەلسەنە ارالاستى. ءتىپتى ءۇشىنشى كۋرس كۋرسانتى بولات جاناساەۆتىڭ قازاق حالقىنىڭ ۇلى پەرزەنتى دىنمۇحاممەد قوناەۆ اتالعان اسكەري وقۋ ورنىنا كەلگەن كەزدە قازاق باسشىسىمەن تىل­دەسۋ مۇمكىندىگىنە يە بولعان. جا­لىن­داعان ورەن كەڭەستىك گەنەرالي­تەت پەن ەل اعالارىنىڭ اراسىندا ەش قىسىلماستان ءوز ويىن ەركىن ءبىل­دىرىپ, دىنمۇحاممەد قوناەۆپەن سۇح­باتتاسىپتى. جاس كۋرسانتتىڭ ءوزىن-ءوزى ۇستاۋىنا, ايتقان سوزدەرىنە ديمەكەڭ ءتانتى بولعانىن كوزكورگەندەر جىر قىلىپ ايتىپ وتىرادى.

ءبىلىم جيناۋعا بەرىلگەن كۋرسانتتىق كەزەڭ اياقتالىپ, جاس لەيتەنانت ءوز ءومى­رىنىڭ جاڭا ساتىسىنا اۋىستى. كەڭەس وكىمەتى سالتانات قۇرعان كەزدە وتان ۇعىمىنىڭ اياسى دا, الىپ جاتقان اۋما­عى دا كەڭ بولعانى تۇسىنىكتى. جاس لەي­تەنانتقا بىردەن تۋعان جەرىنەن الشاق­تاعى ەۋروپانىڭ ءتورى سانالاتىن گەرمانياعا جولداما بەرىلدى. بۇيرىقتىڭ اتى بۇيرىق! تۋعان شاڭى­راعىنان الشاقتىق جاس وفيتسەردى جاسقاندىرعان جوق. كەرىسىنشە, ونىڭ بويىنداعى جاڭاشىلدىققا دە­گەن قى­زىعۋشىلىعىن ارتتىرا ءتۇس­تى. ال­عاشقى قىزمەت جولىن گەرما­نيا­­داعى كەڭەس اسكەرلەرى توبىندا ۆزۆود, روتا كومانديرى, باتالون كومان­ديرى­نىڭ ورىنباسارىنان باستاپ, كەيىن ءسى­بىر اسكەري وكرۋگىندا باتالون كومان­ديرىنىڭ ورىنباسارى, باتالون كومان­ديرى بولىپ جالعاستىردى. كيەۆ اسكەري وكرۋگىندا ءوزىن جاقسى قىرىنان كورسەتكەن سارداردى جولدامامەن ماس­كەۋ قالاسىنداعى م.ۆ.فرۋنزە اتىن­داعى اسكەري اكادەمياسىنا جىبەردى.

كوپ ۇزاماي ونىڭ مانسابىندا كۇت­پەگەن وزگەرىس بولدى. اسكەرلەردە ۇلت­ارالىق جانجالدار شيەلەنىسكەن وداق­تىڭ ءارتۇرلى وڭىرلەرىندە قو­عامدىق ءتارتىپتى جانە قوعامدىق قاۋىپ­سىزدىكتى قولداۋ جونىندەگى قىزمەتتىك-جاۋىنگەرلىك مىندەتتەردىڭ كەڭەيۋىنە بايلانىستى وسى وڭىرلەردە جەدەل ماق­ساتتاعى بريگادالار قۇرۋ تۋرالى شەشىم قابىلداندى. كسرو ءىىم ىش­كى اسكەرلەر قولباسشىسىنىڭ بۇي­رى­عىمەن ول جەدەل ماقساتتاعى 100-ءشى دي­­ۆيزيانىڭ 47-ءشى جەدەل پولكىن قۇ­رۋ­عا جاۋاپتى بولىپ تاعايىندالا­دى (روس­توۆ وبلىسى نوۆوچەركاسسك قالاسى).

كسرو ءىىم ءىا قولباسشىسى, گەنەرال-پولكوۆنيك ءشاتاليننىڭ پودپولكوۆنيك بولات جاناساەۆتىڭ كانديداتۋراسىن تاڭداۋى كەزدەيسوق بولعان جوق. سول جىلدارى ۇلتارالىق قاقتىعىستار بولىپ, وداقتىڭ ءار تۇك­پىرىندە قاقتىعىس وشاقتارى پايدا بولىپ جاتتى. ءدال وسى قيىن-قىستاۋ ۋاقىتتا كسرو ىشكى اسكەرىنىڭ ورتا ازيا مەن قازاقستان بويىنشا جاتتىعۋ پولكىنىڭ كومانديرى لاۋازىمىنا بولات باقىتجان ۇلىن مول تاجىريبەسىنە سەنىپ تاعايىندايدى. ىرگەسى شايقالعان يمپەريانىڭ جان-جاعىن الاۋىزدىق وتى شارپىعان كەزدەرى ىشكى اسكەردىڭ جاۋىنگەرلەرى بارىنشا اراعايىندىق تانىتىپ, بەيبىتشىلىك ميسسياسىمەن قارسىلاسقان تاراپتاردى اجىراتتى. فەرعانا, باكۋ, تاۋلى قاراباحتاعى جانە تاعى باسقا وقيعالار كەزىندە قۇ­قىقتىق ءتارتىپ اسكەرلەرىنىڭ ارقا­سىندا قانشاما بەيبىت تۇرعىننىڭ ءومىرى ساقتالدى. قانشاما ازامات وتباسىلارىنا امان ورالىپ, شاڭىراقتارى شايقالماي امان قالدى. وسى اۋماقتا بەيبىت ءومىر قالىپتاستىرۋعا كسرو, گەرمانيا ارمياسىنداعى دالالىق وقۋ-جاتتىعۋلاردا تاجىريبەسىن شىن­داعان بولات باقىتجان ۇلى ءبىر ادامداي اتسالىستى. سارداردىڭ وسىنداي اتان تۇيەنى قايىستىرار ەرلىگىن ءبىرىمىز بىلسەك, ەندى ءبىرىمىز بىلمەيمىز. دەسە دە, سول كەزدەگى ەرەن ەرلىكتى اق باس تاريح ءالى دە ايشىقتاپ بەرەدى. ۋاقىت وتە ءار جەردەگى كوتەرىلىستەردىڭ سەبەبىمەن الىپ مەملەكەت كسرو-نىڭ شاڭىراعى ىدىرادى. وسىلايشا, ءبىزدىڭ ەلدە دە تاۋەلسىزدىك تاڭى ارايلاپ اتتى. ارينە, ەگەمەندىك الىپ, قۋانىش سەزىمى كوكىرەگىمىزدى كەرنەگەنمەن, ەلىمىزدىڭ قوعامدىق ومىرىندە قوردالانعان كوپ ماسەلەلەر شەشىمىن كۇتىپ تۇرعان بولاتىن. سونىڭ ىشىندە ەڭ ماڭىزدىسى – ەلىمىزدىڭ قارۋلى كۇشتەرىن قالىپتاستىرۋ تۇرعان ەدى.

تاۋەلسىزدىكتىڭ العاشقى جىلى بولات باقىتجان ۇلىنىڭ ومىرىندە دە تاعى ءبىر جاڭا كەزەڭ باستالدى. ەل سەنىم ارتىپ الماتى وبلىسىنىڭ ەڭبەكشىقازاق اۋدانىنان جوعارعى كەڭەستىڭ 12-شاقىرىلىمىنىڭ دەپۋتاتى اتاندى. جاۋاپكەرشىلىگى مول دەپۋتات بولا ءجۇرىپ, ەگەمەندى ەل اسكەرىنىڭ ىرگەتاسىن قالاۋعا بار ىنتاسىمەن كىرىستى. سەبەبى اسكەري ءومىردىڭ قيىن دا قىزىقتى سۇرلەۋىنەن وتكەن تىسقاققان وفيتسەر اسكەرگە قاتىستى ماسەلەلەرگە ءاتۇستى قاراماي, وڭتايلى شەشىلۋىن تىكەلەي قاداعالاپ وتىردى. «قازاقستان رەسپۋبليكاسى قارۋلى كۇشتەرى تۋرالى», «قر ءىىم ىشكى اسكەر­لەرى تۋرالى», «قر ۇقك شەكارا قىز­مەتى تۋرالى», «اسكەري قىزمەت جانە اسكەري قىزمەتشىنىڭ مارتەبەسى تۋرالى» زاڭداردى جانە تاعى دا باسقا زاڭ جوبالارىن جاساپ, قابىلدانۋىنا ۇلەس قوستى. اسكەرگە قاتىستى كەز كەلگەن ماسەلەنىڭ باسى-قاسىندا ءجۇردى. قوعامدىق ماسەلەلەرگە بەلسەنە ارالاسىپ, شەشىمى شيىرلانعان پروبلەمانى ۇلكەن مىنبەردەن جەتەسىنە جەتكىزە وتكىر ايتا ءبىلدى.

اسكەرىمىزدىڭ قۇجاتتامالىق نە­گىزى قالانعانىمەن ءالى دە ىسكە اسىرۋ جا­عى اقساپ تۇرعان بولاتىن. جال­پى, حا­لىقتىق جاعدايمەن بىرگە اسكەري­لەردىڭ دە جاعدايى كوڭىل كونشىتپەيتىن ەدى. سوزدەن ىسكە كىرىسۋ – ۋاقىت تالابى. قاي سالادا بولسىن ىسكەرلىگىمەن دارا­لان­عان بولات باقىتجان ۇلىنا 1994 جىلى پرەزيدەنت نۇرسۇلتان نازار­باەۆ ىشكى اسكەردىڭ تىزگىنىن سەنىپ تاپسىردى.

مىنە, سودان بەرگى ءومىرى قۇقىقتىق ءتارتىپ اسكەرىمەن ەتەنە بايلانىستى بولدى. پرەزيدەنت جاڭا تاعايىندالعان ۆەدومستۆا باسشىسىنىڭ الدىنا ناقتى تاپسىرمالار قويدى. ەلدەگى ەكونوميكالىق قيىندىقتارعا قا­را­ماستان جاۋىنگەرلەردىڭ رۋحىن كوتەرۋ سونىڭ نەگىزگىسى ەدى. مەم­لەكەتتىڭ قورعانىس الەۋەتىنىڭ جاع­دايى ىشكى اسكەرمەن تىكەلەي بايلانىس­تى بولعاندىقتان, ەڭ الدىمەن, جاۋىن­گەرلىك دايارلىققا ۇلكەن كوڭىل ءبولىندى. اسكەري قىزمەتشىلەردىڭ جالاقىلا­رى كەشىكتىرىلىپ, وسال ماتەريالدىق-تەحنيكالىق بازا, كادر تاپشىلىعىنا قاراماستان جاۋىنگەرلىك دايارلىق­تى جوعارى دەڭگەيگە كوتەرۋ تالابى قويىلدى. ايتۋعا وڭاي كورىنگەنىمەن, مۇنى ءىس جۇزىندە جۇزەگە اسىرۋ وڭايعا سوقپاسى انىق بولاتىن. ول كەزدە ادامداردىڭ ءۇمىتىن وياتۋ, بولاشاققا دەگەن سەنىم ۇيالاتۋ قيىننىڭ-قيىنى ەدى. كەيدە جىلى سوزىمەن, كەيدە قاتاڭ تارتىپپەن قويىلعان تاپسىرمانىڭ ۇدەسىنەن شىعۋ كەرەك بولدى. سونداي-اق ول وفيتسەرلەردەن زامان اعىمى­نان قالماۋدى قاتال تالاپ ەتە ءبىلدى. اسكەردىڭ ءبىر ورىندا تۇراقتاپ قا­لۋ­ىن قالامادى. وفيتسەرلەردىڭ ءبىلىمىن جەتىلدىرۋگە, تاجىريبە جيناقتاۋى­نا ەرەكشە كوڭىل ءبولدى. كوماندير جى­لى كابينەتتە وتىرىپ, بۇيرىق بە­رۋشى ەمەس, جەكە قۇرامنىڭ ىستىق-سۋى­عى­نا بىرگە توڭىپ, قيىن جاعدايدان قيىس­تىرا جول تاۋىپ كەتۋى قاجەتتى­گىن ۇنەمى ايتىپ ءجۇردى. ءوزى دە وسى ۇستا­­نىمنان شىقپادى. قازاقستاننىڭ تۇك­پىر-تۇكپىرىندەگى بارلىق اسكەري بولىمدەر مەن جەكە روتالاردى, اسكەري قالاشىقتاردى ءوز كوزىمەن كورىپ ارالاپ شىقتى. سونداي ساپارلارىندا قاراماعىنداعى ءار كومانديردىڭ ءۋاجى مەن ۇسىنىستارىن مۇقيات تىڭداي ءبىلدى. وسىنداي سابىرلىلىقتىڭ ارقاسىندا ىشكى اسكەردىڭ قالىپتاسىپ, اياعىنان تىك تۇرىپ كەتۋىنە ۇشان-تەڭىز ۇلەسىن قوستى. ونىڭ بارلى­عىن ايتىپ جەتكىزۋ مۇمكىن ەمەس. جاۋىنگەرلەردىڭ تاماقتانۋى مەن جاڭا عيماراتتاردى سالۋ سەكىلدى ۇلكەندى-كىشىلى ماسەلەلەردىڭ شەشىلۋىنە اتسالىستى. قانداي ءىستى قولعا السىن سوڭىنا دەيىن جەتكىزۋگە بار ىنتاسىمەن كىرىستى. «مۇمكىن ەمەس» دەگەن ءسوز تىركەسى گەنەرال-لەيتەنانت ب.جا­نا­ساەۆتىڭ سوزدىگىندە بولمايتىن. سون­دىقتان بولار, «جاناساەۆ كەلەدى» دەگەندى ەستىگەن كەز كەلگەن اسكەري ءبولىم الدىنا جارتى جىل ۋاقىت سالىپ, قولباسشىلارىنىڭ ساپارىن كۇتەتىن. «كوز قورقاق, قول باتىر» دەمەكشى, كەز كەلگەن ءىستى ناتيجەمەن اياقتاۋى قول استىنداعىلاردىڭ دا سەنىمىن ارتتىرا ءتۇستى. جەكە قۇرامنىڭ جۇرەكتەرىنە جالىن وتىن تۇتاتۋ قاسيەتى ناعىز سار­دارعا بۇيىرعان.

كەز كەلگەن قولباسشىنىڭ ماق­ساتى – اسكەردەگى جەڭىمپاز رۋحتى قا­لىپتاس­تىرۋ. ويتكەنى رۋحى مىعىم اسكەردىڭ الدىندا الىنبايتىن قامال بولمايدى. ىشكى اسكەردىڭ قىزمەتىن كۇردەلى كەزدە قولىنا الىپ, بيىك دەڭگەيگە كوتەرۋ تەك ىسكەر, ەڭبەكقور, باتىل, ەلجاندى جانە تەمىر مىنەزدى تۇلعالاردىڭ قولىنان كەلەرى ءسوزسىز.

2000 جىلى گەنەرال-لەيتەنانت بولات جاناساەۆ باسقا دا لاۋازىمدى قىزمەتتەرگە اۋىسىپ, ابىرويلى قىز­مەتىن جالعاستىردى. دەسە دە, بۇ­گىنگى ۇلتتىق ۇلاننىڭ تاريحىندا وشپەس ءىز قالدىردى. بۇل جىلدار ونىڭ ومىرىندەگى جەڭىسى مەن جەتىستىگىنىڭ ءبىر پاراسىنداي.

بۇعان دەيىن پرەزيدەنت وعان مەم­لەكەتتىك ماڭىزى بار شۇعىل مىندەت – رەسپۋبليكالىق ۇلاندى قۇرۋدى جۇك­تەدى. 1992 جىلعى ناۋرىزداعى جار­لىقتان كەيىن قازاقستاننىڭ ءبىرىنشى قورعانىس ءمينيسترى, ارميا گەنەرالى ساعادات نۇرماعامبەتوۆپەن بىرگە ىشكى اسكەرلەردىڭ جەدەل بريگاداسى بازاسىندا رەسپۋبليكالىق ۇلان قۇرۋعا كىرىستى.

قۇرىلعاننان كەيىن سەگىز جىل وتكەن سوڭ گەنەرال بولات جاناساەۆ سال­تاناتتى راسىمدەردى ورىنداۋعا قاتىسۋعا, مەملەكەت باسشىسىنىڭ جانە وزگە دە كۇزەتىلەتىن ادامداردىڭ قاۋىپ­سىزدىگىن قامتاماسىز ەتۋگە, اسا ماڭىزدى مەملەكەتتىك وبەكتىلەردى كۇزەتۋگە ارنالعان, پرەزيدەنتكە تىكە­لەي باعىناتىن ارنايى اسكەري قۇرى­لىمدى بىلدىرەتىن رەسپۋبليكالىق ۇلاننىڭ قولباسشىسى بولدى.

كەيىننەن «شىعىس» وڭىرلىك قول­باس­شىلىعى اسكەرلەرىنىڭ قولباسشى­سى لاۋازىمىنا تاعايىندالۋىنا بايلانىستى توتەنشە جاعدايلار ۆيتسە-ءمينيسترى بولدى. ءبىراز ۋاقىتتان سوڭ ونى قورعانىس ءمينيسترىنىڭ ورىنباسارى لاۋازىمىندا قاجىرلى جۇمىس كۇتىپ تۇردى. بۇل مينيسترلىكتە ول ءوزىنىڭ پارلامەنتتىك زاڭ شىعارۋ قىزمەتىنىڭ ناتيجەلەرى قازاقستاننىڭ قارۋلى كۇشتەرىن قۇرۋ مەن قالىپتاستىرۋدا باعا جەتپەس ءرول اتقارعانىن ءىس جۇ­زىندە سەزىندى. ەلباسى اتىنداعى ۇلت­تىق قورعانىس ۋنيۆەرسيتەتىنىڭ باس­شىسى رەتىندە قۇرمەتتى ەڭبەك دەما­­­لىسىنا شىقتى. بۇگىندەرى دارا­بوز تۇلعا ەلىمىزدىڭ ماڭدايالدى كومپا­نيالارىنىڭ بىرىندە ەل يگىلىگى ءۇشىن ەڭبەگىن ءارى قاراي جالعاستىرىپ كەلەدى.

ءيا, ءومىر شىدامدىلاردى ۇناتادى. باتىستىڭ ءپىرادار عالىمدارى قانشا جەردەن «ارمانداي ءبىلۋ» تۋرالى ايتسا دا, جەتىستىككە جەتۋدىڭ ءبىر جولى – ۇزاق ۋاقىت بويى حالىققا قالتقىسىز قىزمەت ەتۋ ەكەنى ءومىر دالەلدەگەن اكسيوما. سوندىقتان قازىرگى وسكەلەڭ ۇرپاق ءوز ارامىزدا جۇرگەن وسىنداي نار تۇلعالى ەرلەردەن ۇلگى السا بول­عانى. گەنەرال-لەيتەنانت بولات جاناساەۆتىڭ عيبراتتى عۇمىرى وسىنى دالەلدەپ تۇر.

قۇرمەتتى دەمالىسقا شىققاننان كەيىن گەنەرال قارۋلى كۇشتەر, ۇلتتىق ۇلان, مەملەكەتتىك كۇزەت قىزمەتى جانە ءوزىنىڭ تۋعان ءبىلىم وشاعىنا اينالعان س.نۇرماعامبەتوۆ اتىنداعى قۇرلىق اسكەرلەرىنىڭ اسكەري ينستيتۋتىمەن, بۇرىنعى اۆوكۋ-مەن, ەلباسى اتىنداعى ۇلتتىق قورعانىس ۋنيۆەرسيتەتىنىڭ وقىتۋشى قۇرا­مىمەن, سونداي-اق ارداگەرلەر جانە كۋرس­تاس دوستارىمەن بايلانىسىن ۇزبەدى. كەرىسىنشە, قولى بوساعاندا بار­لىعىمەن ەتەنە ارالاسىپ, باۋىرىن­داي بولىپ كەتتى. «ۇيادا نە كورسەڭ, ۇش­قاندا سونى ىلەرسىڭ» دەمەكشى, بولات باقىتجان ۇلىنىڭ بالالارى دا لا­يىقتى ازاماتتار بولىپ ءوستى. ارقاي­سىسى قوعامدا وزدەرىنىڭ ورنىن تاپتى.

جۇرەگىنىڭ قالاۋىمەن وتان قورعاۋ­شى ماماندىعىن تاڭداعان بولات باقىتجان ۇلى جانساەۆتىڭ ءومىر جولىنا قاراساڭ, لەيتەنانتتان گەنە­رال-لەيتەنانتقا, ۆزۆود كومانديرىنەن ءىىم ىشكى اسكەرلەرىنىڭ قولباسشىسى, قورعانىس ءمينيسترىنىڭ ورىنباسارى, ەلباسى اتىنداعى ۇلتتىق قورعانىس ۋنيۆەرسيتەتىنىڭ باسشىسىنا دەيىن وتكەن قيىندىق پەن جاۋاپكەرشىلىككە تولى قىزمەت جولىن بايقاۋعا بولادى.

الىبەك سەراليەۆ,

ۇلتتىق ۇلاننىڭ

باس قولباسشىسىنىڭ

ورىنباسارى,  گەنەرال-مايور