نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا بيىل جاڭادان اباتتاندىرىلعان اۋلالار مەن قوعامدىق كەڭىستىكتەردىڭ سانى ايتارلىقتاي ارتاتىنىن ءمالىم ەتتى, دەپ حابارلايدى Egemen.kz.
«اباتتاندىرىلعان قوعامدىق كەڭىستىكتەر بوس ۋاقىتتى تازا اۋادا ءارى دەنساۋلىققا پايدالى كۇيدە وتكىزىپ قانا قويماي, جاستاردىڭ الەۋەتىن اشۋىنا دا, ونى ىسكە اسىرۋىنا دا سەپتىگىن تيگىزەدى. سەبەبى وسىنداي اشىق كەڭىستىكتەردە شىعارماشىلىق كەشتەر وتكىزۋ ءۇشىن ارنايى تۇردە ساحنالار مەن الاڭدار ورناتامىز.
بيىل جاڭادان اباتتاندىرىلعان اۋلالار مەن قوعامدىق كەڭىستىكتەردىڭ (ساياباقتار, گۇلزارلار, جەلەكجولدار) سانىن ايتارلىقتاي ارتتىرامىز. تاعى 200-دەن استام اۋماقتى اباتتاندىرۋدى جوسپارلاپ وتىرمىز, ولار جۇرتشىلىق ءۇشىن مىندەتتى تۇردە تارتىمدى ورىنداردىڭ بىرىنە اينالادى.
قالانى جاياۋ ارالاۋ كەزىندە بىرنەشە قوعامدىق كەڭىستىككە باردىم. ولار: «Demalys Promenade» دەمالىس كۇنى سەرۋەندەۋگە ارنالعا كوشە ء(ا.مامبەتوۆ كوشەسى بويىندا), «جاستار» سارايىنان «مۋزىكالىق جاس كورەرمەندەر تەاترىنا» دەيىن جالعاساتىن «تەاترالنىي» جاياۋ جۇرگىنشىلەرگە ارنالعان جەلەكجولى, اربات (قالالىق ساياباق). وسىلايشا, «Demalys Promenade» پەن «تەاترالنىي» جەلەكجولىن اباتتاندىرۋ – قالانىڭ تاريحي تۇسىندا تۇرعىنداردىڭ بوس ۋاقىتىن جايلى وتكىزۋى ءۇشىن شاعىن اۋدان اشۋعا, سول سياقتى جاياۋ ءجۇرۋ بەلسەندىلىگىن ارتتىرۋعا جانە وسى باعىتتى ارى قاراي جاعالاۋمەن بايلانىستىرۋعا مۇمكىندىك بەردى.
وسىنداي تارتىمدى ورىنداردى اشۋدى جالعاستىرا بەرەمىز. ماسەلەن جەلتوقسان – سەيفۋللين, بەيبىتشىلىك جانە وماروۆ كوشەلەرىندە, №1 ەمحانانىڭ جانىندا تاعى ءبىر قوعامدىق كەڭىستىك اشۋدى جوسپارلاپ وتىرمىز. سول سياقتى قاراۋسىز قالعان «جەرۇيىق-2» ساياباعىن (ب.مومىش ۇلى مەن تولەباەۆ كوشەلەرىنىڭ قيىلىسى) اباتتاندىرامىز. وندا ويىن الاڭدارى, ۆولەيبول جانە باسكەتبول الاڭدارى, ۆورك-اۋت ايماعى, سەرۋەندەۋ ينفراقۇرىلىمى, دەمالىس ايماقتارى جانە ت.ب. بولادى.
مەملەكەت باسشىسىنىڭ تاپسىرماسى بويىنشا «نۇر-سۇلتان – جايلى قالا» ماستەر-جوسپارى اياسىندا قالانىڭ بارلىق اۋدانىندا, اسىرەسە ەلدى مەكەندەردە اۋلالار مەن قوعامدىق كەڭىستىكتەردى اباتتاندىراتىن بولامىز. وسىلايشا, بيىل كۇتىمسىز قالعان ۋچاسكەلەر مەن بوس ورىندار سانى ايتارلىقتاي ازايادى. وتكەن جىلدارى ءبىز 500-دەن استام اۋلا مەن قوعامدىق كەڭىستىكتى اباتتاندىرعان بولاتىنبىز. سول سياقتى بۇقارالىق سپورتتى دامىتۋعا دا باسىمدىق بەرىلەدى.
قوعامدىق كەڭىستىكتەر بۇلدىرشىندەر مەن جاستار ءۇشىن دە, اعا بۋىن ءۇشىن دە ۋاقىتىن پايدالى وتكىزەتىن تارتىمدى ورتالىقتارعا اينالىپ كەلەدى. وسى جۇمىستىڭ ءبارىن تۇرعىندارىمىز ءۇشىن جاسايمىز. سوندىقتان بارىمىزگە تيەسىلى, ورتاق م ۇلىككە ۇقىپپەن قاراۋعا شاقىرامىن», دەپ جازدى ەلوردا اكىمى.