وقىرمان جاڭالىعىمەن بولىسەدى.
جاۋىنگەر قىزداردىڭ ەرلىگى ۇمىتىلمايدى
بيىل قازاقتىڭ باتىر قىزى, ۇشقىش حيۋاز دوسپانوۆانىڭ تۋعانىنا 100 جىل تولادى. ۇلى وتان سوعىسىندا كوپتەگەن ەرلىگىمەن كوزگە ءتۇسىپ, جاۋ اسكەرىن جەرمەن-جەكسەن ەتكەن قازاق قىزى تۋرالى از ايتىلىپ, از جازىلعان جوق.
كەڭەس وداعىنىڭ باتىرى اتاعى بەرىلمەسە دە اپامىز سول «باتىر» اتاعىنا يە بولعانداردان ەش كەم ەرلىك كورسەتكەن جوق. تەك تاۋەلسىزدىك العاننان كەيىن عانا حيۋاز دوسپانوۆا «حالىق قاھارمانى» اتاندى.
قازاقتىڭ «قاناتتى قىزى» حيۋاز 2008 جىلدىڭ 21 مامىرىندا 86 جاسىندا دۇنيەدەن وزدى.
جۋىردا تەلەۆيزيالىق جۇمىس توبى اتىراۋ, باتىس قازاقستان جانە اقتوبە وبلىستارىن ارالاپ, حيۋاز دوسپانوۆانىڭ ەسىمى بەرىلگەن مەملەكەتتىك مەكەمەلەرگە ارنايى بارىپ, دەرەكتى فيلم ءتۇسىرىپ قايتتى. ءتۇسىرىلىم كەزىندە جۇمىس توبى اتىراۋ قالالىق ءبىلىم بولىمىنە قاراستى حيۋاز دوسپانوۆا اتىنداعى جالپى ءبىلىم بەرەتىن ورتا مەكتەپتە بولىپ, 1«ا» سىنىپ جەتەكشىسى مەرۋەرت سەيىتقاليەۆانىڭ وقۋشىلارى دايىنداعان حيۋاز اپامىزدىڭ ءومىرى مەن ەرلىگى جونىندەگى قويىلىمدى تاماشالادى.
بيىل حيۋاز دوسپانوۆانىڭ 100 جىلدىعىنا وراي مەملەكەتىمىزدىڭ تۇكپىر-تۇكپىرىندە كوپتەگەن ءىس-شارا ۇيىمداستىرىلىپ جاتقانى اقيقات. بۇگىنگى ۇرپاق قاھارمان قىزدىڭ ەسكەرتكىشىنە گۇل شوقتارىن قويىپ, ەسكە الىپ, رۋحىنا تاعزىم ەتىپ كەلەدى. تالاي رەت كوكتە سامعاپ, جاۋدىڭ ساعىن سىندىرعان ەرجۇرەك ۇشقىشتىڭ ەسىمىن ەلىنىڭ ۇمىتپايتىنىن وسىدان-اق اڭعارۋعا بولادى.
اتالعان جۇمىس توبىنىڭ حابارلاۋىنشا, شىعىستان شىققان قازاقتىڭ قوس شىنارى – ەرەن ەرلىكتەرىمەن وزدەرىنە وشپەس ەسكەرتكىش تۇرعىزعان كەڭەس وداعىنىڭ باتىرلارى مانشۇك مامەتوۆا مەن ءاليا مولداعۇلوۆا تۋرالى دەرەكتى فيلمدەردى جەڭىس كۇنىنە وراي ەفيردەن كورسەتۋ جوسپاردا بار كورىنەدى.
جۇمىس توبى ودان ءارى ورال جانە اقتوبە قالالارىنا اتتانىپ كەتتى. وندا ولار وبلىستىق تاريحي مۋزەيلەر مەن باتىرلارعا ەسىمدەرى بەرىلگەن مەملەكەتتىك مەكەمەلەردى ارالاپ, قاجەتتى اقپاراتتاردى ءوز كورەرمەندەرىنە جەتكىزەتىن بولادى.
رۋسلان حامزا,
قازاقستان جۋرناليستەر وداعىنىڭ مۇشەسى
اتىراۋ
تاعىلىمدى كەش ءوتتى
رەسپۋبليكالىق «تۇلعا بولامىن», «وقۋعا قۇشتار مەكتەپ» جوبالارى اياسىندا قايىم مۇحامەدحانوۆ اتىنداعى №90 گيمنازياسىندا كىتاپحانا مەڭگەرۋشىسى گۇلنار امانجولوۆانىڭ ۇيىمداستىرۋىمەن «ساۋلەلى ويدىڭ شامشىراعى» اتتى كەزدەسۋ كەشى ءوتتى. كەزىندە قورعانىس ءمينيسترى, پارلامەنت ءماجىلىسىنىڭ دەپۋتاتى بولعان, سونداي-اق تۇڭعىش پرەزيدەنتتىڭ كەڭەسشىسى قىزمەتىن اتقارعان ءسات توقپاقباەۆ پەن قازاقستاننىڭ ەڭبەك سىڭىرگەن قايراتكەرى, قازاقستان جازۋشىلار وداعىنىڭ مۇشەسى ساۋلە دوسجان كەشتىڭ ارنايى قوناقتارى بولدى.
ءسات بەسىمباي ۇلى وسكەلەڭ ۇرپاققا ۇلتىمىزعا ءتان ءور مىنەزدىلىكتىڭ تەگەۋرىندىك تانىتاتىنىنا, ۇلگى تۇتاتىن تۇلعالىق قاسيەتتىڭ ماڭىزدىلىعىنا توقتالىپ, وتانعا دەگەن سۇيىسپەنشىلىكتىڭ ادالدىق ارقىلى باعالاناتىنى تۋرالى عيبراتتى اڭگىمە ايتتى. سونداي-اق مەكتەبىمىزدىڭ الاشتىڭ ارداقتى تۇلعاسى قايىم مۇحامەدحانوۆ اتالۋىنىڭ وزىندىك تاريحىنا زەر سالعان قوعام قايراتكەرى كەزىندە قايىمنىڭ «ابايدىڭ اقىن شاكىرتتەرى» كىتابىن جارىققا شىعارۋعا سەبەپشى بولعانىن ايتا كەلە, وسى كىتاپتاعى ونىڭ قولتاڭباسىن كورسەتىپ, اتالعان باسپا ءونىمىن مەكتەپ مۋزەيىنە تاپسىردى.
كەزدەسۋ كەشىنىڭ مازمۇنىن اشا تۇسكەن ساتتەردىڭ ءبىرى ساۋلە ماعازبەكقىزىنىڭ «اۋىلدان شىققان ميلليونەر» اتتى شىعارماسىن جاس وقىرمانداردىڭ ەرەكشە اسەرلەرىمەن ءبولىسىپ, تالقىلاۋى بولدى. «جاس قالام» ۇيىرمەسىنىڭ مۇشەسى 6-سىنىپ وقۋشىسى مىقتىبەك گ ۇلىم قالامگەر اپامىزعا ارناعان ولەڭىن وقىپ بەرسە, ارۋنا دۇيسەن, نۇريسلام يبراش, بينازير ورالبەك اتتى جاس تالاپكەرلەر وزدەرىن قىزىقتىرعان كوپتەگەن ساۋالىنا جاۋاپ الدى.
قوناقتارىمىزعا دەگەن ىستىق ىقىلاسىن ارناۋىمەن جەتكىزگەن كىتاپحانا قىزمەتكەرى اياگوز سەرىكقىزى سىرلى سۇحباتتىڭ شىرايىن كەلتىرە تۇسسە, كەزدەسۋ سوڭىندا مەكتەبىمىزدىڭ باسشىسى اياتجان احمەتجان ۇلى كەش قوناقتارىنا كەلگەندەرى ءۇشىن العىسىن ءبىلدىردى.
سانات قۋاندىق,
№90 گيمنازيا ديرەكتورىنىڭ تاربيە ءىسى
جونىندەگى ورىنباسارى
نۇر-سۇلتان
وزگەلەرگە ساباق بولاتىنى كۇمانسىز
...ءيا, جەر بەتىندەگى ەڭ مەيىرىمدى دە ەڭ ز ۇلىم جاراتىلىس يەسى – ادام. كەۋدەسىندە جانى بار جۇمىر باستى پەندەگە ەڭ يگى ءىستى جاسايتىن دا, ەڭ سوراقى قورلىقتى كورسەتەتىن دە ادام بالاسى. ال جۇرەگىڭدى تىلگىلەپ, قۋ جانىڭدى قويارعا جەر تاپقىزبايتىن دۇنيەنىڭ ءبىرى – قاتىگەزدىك. ءتىپتى جەر باسىپ جۇرگەنىڭە نالەت ايتىپ, بەس كۇن جالعانعا قوناق بولىپ كەلگەنىڭە وكىندىرەردەي ايۋاندىق پەن قاتىگەزدىكتى مەن ا.كەمەلباەۆانىڭ «شاشتى» اڭگىمەسىنەن وقىپ ءبىلدىم. بۇرىن-سوڭدى كورمەك تۇگىلى, ەستىمەگەن مۇنداي قيانات توبە شاشىمىزدى تىك تۇرعىزىپ, جانىمىزدى تۇرشىكتىردى. نە ەركەك ەمەس, نە ايەل ەمەس, ءتىرى ولىك! نەتكەن ازاپ! ەركەك كىندىكتى ءۇشىن بۇدان اسقان قاسىرەت بولار ما, ءسىرا؟! عۇمىرىن ارتىنا ۇرپاق قالدىرۋعا ارناعىسى كەلگەن ازاماتتىڭ تاعدىرىن تالقانداپ, ءومىرىن ويرانداۋ – بارىپ تۇرعان ەڭ سوراقى قاتىگەزدىك.
شاعىن اڭگىمە شەبەرى ىبىراي ءالتىنساريننىڭ اڭگىمەلەرىنىڭ بىرىندە قىتاي حالقىندا ۇرلىق جاساعان ادامنىڭ ساۋساعىن شاۋىپ تاستايتىنىن وقىپ, مۇنداي قادامدى اسا قاتتى قاتىگەزدىككە بالاعانىم بار. ال شىڭعىس ايتماتوۆتىڭ «بوراندى بەكەتىندەگى» جازىقسىز ادامدى اقىل-ەسىنەن ايىرىپ, ماڭگۇرت جاساۋ – جاعاڭدى ۇستاتاتىن جايت ەكەنى تاعى اقيقات. ەندى, مىنە, «شاشتى» اڭگىمەسىنەن بۇگىندە ادامزاتقا ادام قولىمەن جاسالاتىن تاعى ءبىر قاتىگەزدىكتى ءبىلدىم. ول – ەركەكتىكتەن ايىرۋ, ازباندىق... وسىلايشا, دۇنيەدەگى ەڭ قايىرىمدى ءىس تە, قاتىگەزدىك تە ادام قولىمەن جاسالاتىنىنا تاعى ءبىر مارتە كوزىم جەتتى.
وسىنداي مازمۇنداعى شىعارمالار مەنى مىناداي قورىتىندىعا الىپ كەلدى. سول كەزدەگى جازىقسىز جاندارعا جاسالعان قاتىگەزدىكتى نەگە قازىرگى ارسىز ايۋاندارعا جاساماسقا؟ نەگە ءبىزدىڭ ەلىمىزدە دە تويىمسىز جەمقورلار مەن تۇيەنى تۇگىمەن, بيەنى جۇگىمەن جۇتقان ۇرى-قارىلاردىڭ ساۋساعىن كەسىپ, اياعىن تارتقىزباسقا؟ قازىرگى تاڭدا وزەكتى ورتەپ وتىرعان كوكەيكەستى ماسەلە – ون ەكىدە ءبىر گ ۇلى اشىلماعان پاك قىزداردى ابىرويىنان ايىرىپ, بولاشاعىنا بالتا شاپقان, قورلاپ-زورلاعان ەركەكسىماقتاردى نەگە ەركەكتىكتەن ايىرماسقا, ماڭگۇرت جاساماسقا؟ بۇل – مەنىڭ كوكتەمگى بايشەشەكتەي ءبۇر جارىپ كەلە جاتقان كەلتە قىز عۇمىرىما الاڭداۋدان تۋعان وي. قوعامداعى الاياقتار مەن ارسىزدارعا وسىنداي قاتاڭ شارالار قولدانىلسا, مۇنىڭ وزگەلەرگە ساباق بولاتىنى ءسوزسىز!
نۇراينا ابزالقىزى,
كوكتەرەك جالپى ورتا ءبىلىم بەرەتىن
مەكتەبىنىڭ 10-سىنىپ وقۋشىسى
باتىس قازاقستان وبلىسى