جاسىراتىنى جوق, شالعاي جاتقان اۋىلدارعا ينفراقۇرىلىم يگىلىگى كەش جەتەدى. جاڭاشىلدىقتى سارعايا كۇتكەن تۇرعىندار وزگە وڭىرگە قونىس اۋدارىپ, ەلدى مەكەندەر ەلسىز قالاتىنى راس. تۇرعىنداردى تۇراقتاندىرۋ ماقساتىندا ىلكىمدى ىستەردىڭ جەدەل قولعا الىنۋى ماڭىزدى.
ۋسپەن اۋدانىنا قاراستى كونستانتينوۆكا اۋىلى جۇرتشىلىعىنىڭ كوپتەن كۇتكەن ارمانى ورىندالدى. مۇندا زاماناۋي بالاباقشا ەسىگىن ايقارا اشتى. ماڭدايشاسىنا «ايگولەك» دەگەن بەلگى قويىلىپتى. ىرگەتاسى جاڭادان قالانباسا دا, «اۋىل – ەل بەسىگى» باعدارلاماسى شەڭبەرىندە كۇردەلى جوندەۋدەن وتكەن بالاباقشا بۇرىنعىدان وزگەرەك. كوزدىڭ جاۋىن الادى. ەندىگى جەردە مۇندا 75 بالانى قابىلداۋعا مۇمكىندىك بار. ازىرگە 57 ۇل-قىز تاربيەلەنۋدە.
ء«بىز ءۇش توپتى, اسىرەسە كىشى توپتى اشقانىنا وتە قۋانىشتىمىز. بالدىرعاندار 1,5 جاستان باستاپ قابىلدانادى. ەندى جۇمىسىمىزعا الاڭداماي بارامىز», دەپ اتا-انالار بوركىن اسپانعا اتتى.
ايتپاقشى, اۋىلداعى ورتا ءبىلىم بەرەتىن مەكتەپ تە جوندەلۋدە. جىلىتۋ جۇيەسى مەن عيماراتتىڭ شاتىرى جاڭارتىلماق. جاۋاپتى مەردىگەر «گرادسترويسەرۆيس» جشس جوندەۋ جۇمىستارىن بيىل ماۋسىم ايىندا اياقتاۋعا ۋادە بەردى. باستىسى, ساپاسى كوڭىل كونشىتسە بولعانى. مەكتەپتە 161 وقۋشى ءبىلىم الۋدا.
ارينە, ينفراقۇرىلىم شارالارى مىقتاپ قولعا الىنسا, اۋىلدان حالىق كوشۋ بىلاي تۇرسىن, قونىس اۋدارۋشىلاردىڭ ارتاتىنى ءسوزسىز. ماسەلەن, كونستانتينوۆكا اۋىلدىق وكرۋگىنە قاراستى راۆنوپول اۋىلىنا بىلتىر 127 ادام كوشىپ كەلگەن. بيىل العاشقى توقساندا ەلدى مەكەنگە 5 وتباسى (22 ادام) قونىس تەپكەن. بۇل اۋىلدا كەلبەتى كەلىسكەن مەكتەپ, بالاباقشا, فەلدشەرلىك-اكۋشەرلىك پۋنكت, ورتالىق سۋ قۇبىرى بار. بىلتىر 10 كوشەگە جوندەۋ جۇمىستارى جۇرگىزىلىپتى. الداعى ۋاقىتتا 24 پاتەرلىك ءۇيدى قالپىنا كەلتىرۋ جوسپارلانعان.