قاڭتار وقيعاسى كەزىندە جامبىل وبلىستىق پوليتسيا دەپارتامەنتىنىڭ عيماراتىنان ۇرلانعان قارۋ-جاراقتار تابىلدى, دەپ حابارلايدى Egemen.kz.
«جاقىندا تاراز قالاسىنىڭ تۇرعىندارىنان 6 كالاشنيكوۆ اۆتوماتى تاركىلەندى. ونىڭ ىشىندە بىرەۋى گراناتالارمەن اتۋ ءۇشىن جابدىقتالعان. بۇدان باسقا 4 جابدىقتالعان وقجاتار, دىبىسسىز اتۋعا ارنالعان قۇرىلعىسى بار ماكاروۆ تاپانشاسى مەن تەگىس ۇڭعىلى مىلتىق الىندى. ولار جامبىل وبلىستىق پوليتسيا دەپارتامەنتىنىڭ عيماراتىنان ۇرلانعان», دەدى ءىىم تەرگەۋ دەپارتامەنتىنىڭ باستىعى سانجار ءادىلوۆ.
دەپارتامەنت باستىعىنىڭ دەرەگىنشە, 7 قاڭتاردا الماتى-تاشكەنت اۆتوجولىنىڭ بەكەتىندە پوليتسيا قىزمەتكەرلەرى «سۋبارۋ» اۆتوكولىگىن توقتاتىپ, ىشىنەن 10 بىرلىك اڭشى مىلتىعىن, ءبىر پنەۆماتيكالىق تاپانشا جانە اڭشىلىق كەرەك-جاراقتار تاپقان. كولىكتە بولعان 5 ادامنىڭ دا جامبىل وبلىسىنىڭ تۇرعىندارى ەكەندىگى جانە الماتى قالاسىندا بولعان جاپپاي تارتىپسىزدىكتەر بارىسىندا اڭشى دۇكەنىن توناۋعا قاتىسقاندارى انىقتالعان.
«بەس كۇدىكتى سوتتىڭ سانكتسياسىمەن قاماۋعا الىندى», دەدى ول.
سونىمەن قاتار ول ازاماتتاردىڭ تارتىپسىزدىكتەر بارىسىندا ۇرلانعان مۇلكىن ىزدەستىرۋ مەن تابۋ جۇمىسى دا جالعاسىپ جاتقانىن ايتتى.
«بۇگىنگى تاڭدا پوليتسيا ورگاندارى ازاماتتاردىڭ سوماسى 340 ميلليوننان ارتىق تەڭگەگە باعالاناتىن ۇرلانعان مۇلكىن تاپتى», دەدى دەپارتامەنت باستىعى.
ايانا توعانبەك