ەلورداداعى ۇلتتىق اكادەميالىق كىتاپحانادا قازاقستان سۋرەتشىلەر وداعىنىڭ مۇشەسى, بەلگىلى قىلقالام شەبەرى, رەجيسسەر, تەلەجۋرناليست جانۇزاق ءمۇساپىردىڭ Zhanuzak اتتى كىتاپ-البومى تانىستىرىلدى.
جاڭا جيناققا سۋرەتشى ءومىرىنىڭ ءار كەزەڭىندە سالعان پورترەتتەرى, تاقىرىپتىق كارتينالارى, ابستراكتسيا, پەيزاج, ناتيۋرمورت سۋرەتتەرى توپتاستىرىلعان.
مازمۇندى شارادا بەلگىلى عالىم, قوعام قايراتكەرى مىرزاتاي جولداسبەكوۆ قىلقالام شەبەرىنىڭ كارتينالارىنداعى بەينەلەنگەن وقيعالار مەن زاتتاردىڭ تاريحي ماڭىزى زور ەكەندىگىنە توقتالدى.
«قازاقتىڭ بايگەسىن, كوكپارىن, ۇلتتىق اسپاپتارىن بوياۋدىڭ تۇسىمەن تاماشا بەينەلەگەن. «بالالىقتان دانالىققا جول» اتتى تسيكل ءال-فارابي ءومىر سۇرگەن عاسىردى شىنايى سۋرەتتەيدى. جانۇزاق ءمۇساپىردىڭ جۇمىستارى وسىمەن دە قۇندى. ءبىز تاريحىمىزدى ۇمىتپاي, ۇلتتىق قۇندىلىقتارعا زاماناۋي سيپات بەرىپ, العا جىلجيمىز» دەدى قوعام قايراتكەرى.
سونداي-اق تانىستىرىلىم بارىسىندا اكادەميك كارىمبەك قۇرماناليەۆ, اقىن داۋلەتكەرەي كاپ ۇلى, «رۋحاني جاڭعىرۋ» كمم باسشىسى ابىلايحان قالنازاروۆ, «قاسيەتتى قازاقستان» عىلىمي-زەرتتەۋ ورتالىعىنىڭ ديرەكتورى باتىرحان جۇماباەۆ ءسوز الىپ, سۋرەتشىنىڭ شىعارماشىلىعى تۋرالى ىزگى لەبىزدەرىن ءبىلدىردى.
بۇگىندە تالانت يەسىنىڭ كوپتەگەن ەڭبەگى قىتاي, پولشا, گەرمانيا, رەسەي سەكىلدى 30-دان اسا ەلدىڭ مۋزەي قورى مەن جەكە كوللەكتسيونەرلەر مۇراعاتىندا ساقتالعان. اسىرەسە ونىڭ پورترەت جانرىنداعى قولتاڭباسىن ەرەكشە ايتۋعا بولادى. اۆتور ءوز ەسىمىمەن ارنايى كىتاپ شىعارۋ كوپتەن ويىندا جۇرگەندىگىن ءسوز ەتە كەلىپ:
«قاريانىڭ ءسوزى كيىز كىتاپتاعىداي» دەپ بابالارىمىز ايتقانداي, سۋرەتشىلىك ونەر ەكزيستەنتسياسىن جان-جاقتى اشاتىن ەڭبەكتە شىعارماشىلىق تاعدىرىمنىڭ بۇرالاڭدارىن دا جەكە كوللەكتسيا مەن وتباسىلىق فوتوسۋرەتتەرمەن بەكىتىپ وتىردىم. مەنى سىنشىلار «الاش وركەنيەتىنەن سەريالى دۇنيە جاساۋ مەن بەينەلەۋدىڭ ساكرالدى ءبىلىمىن تانىتۋشى» دەپ اتايدى. سول بۋىرقانعان بوياۋلاردى جۇرتشىلىق كىتاپتان ءوز كوزىمەن كورىپ, قولىنا ۇستاسا دەيمىن», دەدى ول.
ايتا كەتەيىك, جانۇزاق ءمۇساپىردىڭ شىعارماشىلىعى سان قىرلى. تەلەۆيزيادا رەجيسسەر بولىپ, بىرقاتار دەرەكتى فيلم ءتۇسىردى. ءمۇسىن ونەرىمەن دە اينالىستى. بۇعان دەيىن دە سۋرەتشىنىڭ «قارا شاڭىراعىم», «التىن ۇيا مەكتەبىم», ء«ومىر وتكەلدەرى» اتتى كىتاپتارى جارىق كورگەن.