ءساۋىردىڭ 14-15 كۇندەرى تۇركىستان قالاسىندا اقتوبە وبلىسىنىڭ مادەني كۇندەرى ءوتتى. «رۋحاني جاڭعىرۋ» باعدارلاماسىنىڭ بەسجىلدىعىنا ارنالىپ ۇيىمداستىرىلعان وسى ءىس-شارادا جەرگىلىكتى تۇرعىندار اقتوبە وبلىسىنىڭ ەتنوگرافيالىق كورمەسىن, ءداستۇرلى ورىنداۋشىلاردىڭ جىر-تەرمەلەرىن تاماشالاپ, وبلىستىق-تاريحي ولكەتانۋ مۋزەي قورىنا ءار كەزەڭدە جيناقتالعان سيرەك ەكسپوناتتارىمەن تانىستى. قالانىڭ ەكوبازار اۋماعىندا اۋىل شارۋاشىلىعى ونىمدەرى جارمەڭكەسى ءوتىپ, وعان اقتوبەلىك شارۋالاردىڭ قولىنان شىققان ەت-ءسۇت ونىمدەرى, كوكونىستەر مەن كونديتەرلىك تاعامدار ۇسىنىلدى.
Farab كىتاپحاناسىندا ەكى ءوڭىردىڭ اقىن-جازۋشىلارى وقىرماندارمەن جۇزدەسىپ, تاريحى تەرەڭ اقتوبە پلانەتاريىنىڭ تسيفرلاندىرىلعان جۇيەدەگى جۇلدىزدى الەم كارتاسى تانىستىرىلدى. بۇل كۇندەرى تۇركىستاندىقتار ەتنواۋىلدى دا تاماشالادى. ورتاعاسىرلىق ۇلگىدە جاساقتالعان كيىز ۇيدە اقتوبەلىك قولدانبالى ونەر شەبەرلەرىنىڭ كورمەسى ءوتتى. ەرتەدەگى قازاق شەبەرلەرىنىڭ ءداستۇرىن جاڭعىرتىپ, مال تەرىسى مەن سۇيەگى, جۇنىنەن ءتۇرلى بۇيىم جاساپ, حالىقارالىق ەتنوگرافيالىق كورمەلەرگە قاتىسا ءجۇرىپ, تاجىريبە جيناقتاعان قولونەرشىلەر كيىزۇي ىشىندە شەبەرلىك ساباقتارىن ۇيىمداستىردى. ايتا كەتۋ كەرەك, سوڭعى 5-6 جىلدىقتا اقتوبەلىك قولونەرشىلەر قازاقتىڭ ەسكى ۇلگىسىمەن تەرى يلەۋ, جۇمسارتۋ, بوياۋ تەحنولوگياسىن ءتاپ-ءتاۋىر مەڭگەرىپ, ءتۇرلى ۇلگىدەگى تۇرمىستىق بۇيىمدار, قامشى, ەر-تۇرمان ابزەلدەرىن جاساپ, جۇرتشىلىققا ۇسىنىپ ءجۇر.
Karavansaray Turkistan تۋريستىك كەشەنىندە اقتوبەلىك انشىلەردىڭ «التىن ايماق – اقتوبە» كونتسەرتتىك باعدارلاماسى ءوتتى. تۇركىستان مۋزىكالىق دراما تەاترىندا بالدىرعاندار «الاقاي» قۋىرشاق تەاترىنىڭ «جادىرا, جاينا دوستار!» قويىلىمىن تاماشالاسا, ەرەسەكتەر عازيزا جۇبانوۆا اتىنداعى وبلىستىق فيلارمونيا ۇجىمى ۇسىنعان ي.ساپاربايدىڭ «سىعان سەرەناداسى» مۋزىكالىق سپەكتاكلىن, التىن وردا مەملەكەتىنىڭ 750 جىلدىعىنا ارنالعان «ەر ەدىگە» تاريحي دراماسىن تاماشالادى.
قاسيەتتى رامازان ايىندا ەر تۇرىكتىڭ بەسىگى – تۇركىستان قالاسىندا وتكەن اقتوبە وبلىسىنىڭ كۇندەرى «سالەم, تۇركىستان!» گالا-كونتسەرتىمەن اياقتالدى.
اقتوبە وبلىسى