ۇقك شەكارا قىزمەتىنىڭ تەحنيكانى جانە قارۋ-جاراقتاردى جوندەۋ باسقارماسىندا اسكەر قاتارىنا شاقىرىلۋشىلاردىڭ انت قابىلداۋ ءراسىمى ءوتتى, دەپ حابارلايدى Egemen.kz.
بۇگىنگى ءراسىمنىڭ ەرەكشەلىگى سول, «كوكتەم-2022» شاقىرىلىمىنىڭ شاراسىنا جاس ساربازداردىڭ اتا-انا, تۋعاندارى مەن دوستارى قاتىسىپ, قۋانىشتارىمەن ءبولىستى.
بۇل – پاندەميانىڭ بەتى قايتىپ, كارانتيندىك شەكتەۋلەر الىنعاننان كەيىنگى ءبىرىنشى وتكىزىلىپ وتىرعان ءداستۇرلى شارا. سوندىقتان, انت بەرۋ سەكىلدى ۇلدارىنىڭ ومىرىندە ءبىر-اق رەت بولاتىن اتاۋلى مەرەكەگە قاتىسۋ ءۇشىن الىستان ات ارىلتىپ جەتكەن اتا-انالاردىڭ جۇزدەرىنەن قۋانىش پەن ەرەكشە تولقىنىس بايقالادى.
پودپولكوۆنيك ە.قىرعىزباەۆتىڭ بۇيرىعىمەن اشىلعان سالتاناتتى شاراعا 80-نەن استام سارباز ساپ تۇزەدى. اتالعان باسقارمانىڭ كاسىبي-تەحنيكالىق جانە دايىندىق بولىمىندە اسكەري ءومىردىڭ العاشقى الىپپەسىمەن تانىسىپ, ساناۋلى ۋاقىتتىڭ ىشىندە وزدەرىنىڭ ساپتىق دايىندىقتارىن شىڭداعان وتان وعلاندارىن الدا جاس جاۋىنگەرلەر كۋرسى كۇتىپ تۇر. ءارى قاراي, ەل شەبىنە اتتانىپ, ۇقك شەكارا قىزمەتىنىڭ شەكارا بولىمشەلەرىندە العان ماماندىقتارى بويىنشا قىزمەت اتقاراتىن بولادى. كۋرستا ديزەلشى-ەلەكتريك, اۆتودانەكەرلەۋشىلەر دايارلانادى.
ەلىمىزدىڭ انۇرانىمەن اشىلعان سالتاناتتى شاراعا اسكەري ۇجىمنىڭ تۋى اكەلىنگەن سوڭ تەحنيكانى جانە قارۋ-جاراقتاردى جوندەۋ باسقارماسىنىڭ باستىعى, پودپولكوۆنيك ەرنات قىرعىزباەۆ ساپ تۇزەگەن ساربازداردى انت قابىلداۋ راسىمىمەن قۇتتىقتاپ, شەكارا مەن ەل شەبىنىڭ ەلىمىز ءۇشىن الار ماڭىزىنا كەڭ توقتالدى.
بۇدان كەيىن بولاشاق شەكاراشىلاردىڭ وتانىنا انت بەرۋ ءراسىمى دە باستالدى.
انت قابىلداۋ راسىمىندە ءسوز العان ۇقك شەكارا قىزمەتىنىڭ ارداگەرى, ءبىر كەزدەرى اتالعان باسقارمانى باسقارعان زاپاستاعى پولكوۆنيك ءاليحان ارتىقباەۆ شەكارا شەبىن قورعاعالى تۇرعان جاس بۋىننىڭ قادامىنا ساتتىلىك تىلەدى. مۇنان كەيىن اتا-انالار اتىنان ءسوز العان ورىنتاي وسپانوۆا بۇگىن ءوزىنىڭ نەمەرەسى ءاليحاننىڭ دا سارباز اتانعانىن, شەكاراشى بولۋعا ءوزى تىلەك بىلدىرگەنىن ماقتانىشپەن ايتىپ, وتان قورعاۋعا انت بەرۋشىلەرگە انالىق باتاسىن بەردى.
جيىن سوڭىندا اتا-انالار باسقارما باسشىلىعىمەن كەزدەسىپ, وزدەرىن تولعانتقان ساۋالداردىڭ جاۋابىن الدى.