قازاقستاندا جاستار مەن بالالار اراسىندا ينتەرنەتكە تاۋەلدىلىكتىڭ جانە قۇمار ويىنداردىڭ الدىن الۋعا باعىتتالعان الەۋمەتتىك جوبا ىسكە اسىرىلا باستادى. جوبانىڭ باستى ماقساتى – ينتەرنەت كەڭىستىگىندە جەتكىنشەكتەردىڭ قاۋىپسىزدىگىن قامتاماسىز ەتۋ.
گرانتتىق جوبا شەڭبەرىندە تاجىريبە الماسۋ جانە شەتەلدىك تاجىريبەلەردى ەنگىزۋ ماقساتىندا حالىقارالىق الاڭ قۇرىلادى دەپ جوسپارلانىپ وتىر.
«جوبانىڭ ءبىر ەرەكشەلىگى – قازاقستاندىقتاردى شەتەلدىك جاتتىقتىرۋشىلار وقىتادى. جۇمىس ينتەرنەت كەڭىستىكتەگى قاۋىپسىز قوزعالىس, قۇمار ويىندار, كيبەربۋللينگ جانە ينتەرنەتكە تاۋەلدىلىك سياقتى ءتورت باعىت بويىنشا جۇرگىزىلەدى. جوبا بارىسىندا قازاقستاندىق ماماندار شەتەلدىك ساراپشىلارمەن تاجىريبە الماسادى. سونداي-اق سەمينارلار وتكىزۋ ءۇشىن قازاقستانعا حالىقارالىق ترەنەرلەردى شاقىرامىز», دەدى Amanat پارتياسى جانىنداعى جاستار قاناتىنىڭ جەتەكشىسى نۇرجان جەتپىسباەۆ.
جوبانى ۇيىمداستىرۋشىلاردىڭ ايتۋىنشا, جاستار مەن بالالار اراسىندا ينتەرنەتكە تاۋەلدىلىك پەن قۇمار ويىنداردىڭ الدىن الۋ سالاسىنداعى قازاقستاندىق جانە حالىقارالىق زاڭناماعا تالداۋ جۇرگىزىلەدى.
«جوبا بىرنەشە جىل قاتارىنان جۇزەگە اسىرىلىپ كەلەدى. قازىرگى ۋاقىتتا ينتەرنەتكە تاۋەلدىلىك پروبلەماسى مەكتەپ وقۋشىلارى اراسىندا ۇلعايعان. بۇل قۇبىلىس «الەۋمەتتىك ىندەت» دەپ اتالادى. كورپوراتيۆتىك قوردىڭ سەرىكتەستەرى رەتىندە ءبىز حالىقارالىق ساراپشىلاردى تارتۋ جانە جاريالاۋ ارقىلى جوباعا بارىنشا قولداۋ كورسەتەمىز», دەپ اتاپ ءوتتى جوبا سەرىكتەسى «بولاشاق» حالىقارالىق ستيپەندياسى ستيپەندياتتارىنىڭ قاۋىمداستىعى» قب ديرەكتورى الىشەر دۇنگەنين.
قوعام بەلسەندىلەرى جاستاردى ينتەرنەت كەڭىستىكتەگى قاۋىپسىز قوزعالىس ەرەجەلەرىنە وقىتۋ بويىنشا اقپاراتتىق ءتۇسىندىرۋ ماتەريالدارىن دايىنداۋدى جوسپارلاپ وتىر. جوبا اياسىندا ۇيىمداستىرۋشىلار «وفلاين كۇن» اكتسياسىن دا وتكىزەدى.
بالالار مەن جاستارعا كومەك كورسەتۋگە باعىتتالعان الەۋمەتتىك جوبا اقپارات جانە قوعامدىق دامۋ مينيسترلىگىنىڭ تاپسىرىسى بويىنشا ىسكە اسىرىلادى.