وتكەندە اۋىلعا بارعانمىن, ءساۋىردىڭ ەكىسى كۇنى. وعان دەيىن قار كوبەسى سوگىلىپ, جەر قارايا قويماعانىن ارقا جۇرتشىلىعى جاقسى بىلەدى. بىراق ءبىرىنشى ساۋىردەن كۇن جىلىپ بەرگەن. ەكىسى ەرتەلەتىپ وتارباعا وتىرىپ, ءتۇس اۋا تامبۋردان سەكىرىپ تۇسسەم, توپىراقتىڭ ءيىسى بۇرق ەتە قالدى. قار سۋىمەن كوتەرىلگەن جەردىڭ ءيىسى قانداي, ءا؟! كەۋدە تۇسىم كوتەرىلىپ, القىنىپ كەتتىم بە, تولقىنىپ كەتتىم بە, بىلمەيمىن. ايتەۋىر كەۋدەم كوتەرىلىپ, ءىشىم الاي-دۇلەي بولعانىن بىلەم. قاراپتان-قاراپ ءجۇرىپ توپىراقتىڭ ءيىسىن ومىرىمدە تۇڭعىش سەزگەندەيمىن. نە سۇمدىق دەسەڭىزشى؟! نەشە جىل وسى اۋىلدىڭ توپىراعىنا اۋناپ, شاڭىنا كومىلىپ وسكەندە سەزىنبەگەن عالامات كەۋدەمدى كوتەرىپ جىبەرگەنىنە تاڭمىن. ابدەن ساعىنىپ قالىپپىن دەيتىن ەمەس, اۋىلىنا ءجيى باراتىن ەكى ادام بولسا, ءبىرى – ءبىز.
ءبىر اقىن دوسىمنان ەستىگەنىم بار. وعان اسا بىلىكتى ءبىر دارىگەر ايتىپتى. اللەرگيا دەگەن اۋرۋدىڭ ءتۇرىن بىلمەيتىن ادام كەم دە كەم شىعار. ەمى جوق بۇل اۋرۋدىڭ ءبىر پاراسى شوپكە بايلانىستى دۋشار بولادى ەكەن عوي كىسى بالاسىنا. «ولاي بولاتىنىنىڭ بىرنەشە سەبەبى بار, سولاردىڭ اراسىنداعى ءبىر سەبەبى» دەپتى الگى دارىگەر: «كەيبىر كىسىنىڭ تۋعان توپىراعىنان اجىراپ قالۋىنا بايلانىستى». ادام تۋعان توپىراعىنان قۇنار تارتاتىن ءبىر وسكىن ىسپەتتى. تۋعان جەرىندە ەرەكشە گۇلدەيتىن وسىمدىكتىڭ ءبىرىنىڭ توزاڭى ونىڭ بويىنا يممۋنيتەت رەتىندە قالىپتاسپاي قويمايتىن كورىنەدى. كەيىن الگى ادام تۋعان جەرىنەن الىستاپ كەتىپ, بىرنەشە جىل وتكەندە الگى توزاڭنان قالىپتاسقان يممۋنيتەت بويىنان جوعالىپ بىتەدى ەكەن-اۋ. سوسىن كەيىندە ول وسىمدىك باسقا جەردە گۇلدەگەندە توپىراعىنان ۇزاپ كەتكەن كىسىگە كەرى اسەر ەتەتىنىن ايتىپتى. اتا-باباسى قازاق, بىراق ءوزى باسقا مادەنيەتپەن تاربيەلەنىپ, سوعان كىرىگىپ العان سوڭ, ءوز ۇلتىنا ىتىرىنا قارايتىن قازىرگى كەي دۇمبىلەزدەر سياقتى عوي. توپىراعىنان اجىراپ, تامىرىنان قيىلىپ قالدى دەگەن سول ەمەس پە؟ ونىڭ ۇستىنە قازاقتىڭ كونە جىرلارى مەن دۇنيەتانىمىنا قاتىستى ەڭبەكتەردى وقىپ وتىرسا, ءبىزدىڭ ۇلت اتامەكەنىنە كىندىگىنەن بايلانىپ وسكەنىن اڭعارۋ قيىن ەمەس. جانىن بەرىپ ءولۋى بار, جەرىن ۇرپاعىنا اماناتتاعان حالىق.
اۋىلعا تۇسكەن بويدا ۆوكزال باسىندا الگىندەي كۇي كەشىردىم دە, ۇيگە قاراي جونەلە بەردىم. وكشەم جەرگە تيەر ەمەس. بۇلاي جەڭىل سەزىنبەپپىن ءوزىمدى. زىمىراپ الا جونەلدىم. اۋاعا توپىراقتىڭ ءيىسى تۇنىپ قالىپتى...