KAZAKH INVEST مالايزيالىق بيزنەس وكىلدەرىن قازاقستانعا ينۆەستيتسيا سالۋعا شاقىردى, دەپ حابارلايدى Egemen.ءkz سىم ءباسپاسوز قىزمەتى تاراتقان اقپاراتقا سىلتەمە جاساپ.
قازاقستاننىڭ مالايزياداعى ەلشىلىگى ۇيىمداستىرعان «Kazakhstan – the Land of Great Opportunities» ۆەبينارى اياسىندا «Malaysia Semiconductor Industry Association» (MSIA) ونەركاسىپ قاۋىمداستىعىنىڭ قولداۋىمەن «KAZAKH INVEST» ۇك» اق شەتەلدىك كاسىپكەرلەرگە قازاقستاننىڭ ينۆەستيتسيالىق مۇمكىندىكتەرىن تانىستىردى.
ونلاين-كەزدەسۋگە قازاقستان رەسپۋبليكاسىنىڭ مالايزياداعى ەلشىسى بولات سۇگىرباەۆ, «KAZAKH INVEST» ۇك» اق, احقو جانە ءتسدياوم وكىلدەرى, سونداي-اق اكت, ەلەكترونيكا جانە جارتىلاي وتكىزگىش ونەركاسىپ سالالارىندا جۇمىس ىستەيتىن مالايزيالىق كومپانيالاردىڭ باسشىلارى قاتىستى.
بولات سۇگىرباەۆ وز سوزىندە ەكى ەلدىڭ ساۋدا-ەكونوميكالىق جانە ينۆەستيتسيالىق سالالارداعى ءوزارا ءتيىمدى ىنتىماقتاستىعىن دامىتۋدىڭ زور الەۋەتىن اتاپ ءوتتى. ەلشى بيزنەس وكىلدەرىنە قازاقستان شەتەلدىك ينۆەستورلارعا جاڭا مۇمكىندىكتەر بەرەتىنىن جانە ءوزارا ءتيىمدى ىنتىماقتاستىق ءۇشىن اشىق ەكەنىن حابارلادى.
«KAZAKH INVEST» ۇك» اق وكىلى ديانا ابلياكيموۆا وز كەزەگىندە ۇلتتىق كومپانيانىڭ مالايزيالىق بيزنەس-توپتارمەن ىنتىماقتاستىقتاعى مۇددەلىلىگى جانە باستامالاۋدان باستاپ پايدالانۋعا بەرۋ ساتىسىنا دەيىنگى ينۆەستيتسيالىق جوبالاردى ىسكە اسىرۋعا قولداۋ كورسەتۋگە دايىن ەكەندىگى تۋرالى حابارلادى.
بۇگىنگى تاڭدا شەتەلدىك ينۆەستورلار قازاقستاننىڭ باسىم سەكتورلارىنداعى مۇمكىندىكتەرگە جوعارى قىزىعۋشىلىق تانىتۋدا. بۇل ەلدىڭ ستراتەگيالىق ماڭىزدى ورنالاسقان جەرىنە, بيزنەستى جۇرگىزۋ ءۇشىن قولايلى ورتاعا, ينۆەستورلاردىڭ قۇقىقتارىن قورعاۋعا, سونداي-اق مەملەكەتتىك قولداۋ شارالارىنا بايلانىستى بولىپ وتىر. ديانا ابلياكيموۆا اتاپ وتكەندەي, ەۋرازيا جۇرەگىندە ورنالاسقان قازاقستان ءىرى الەمدىك نارىقتاردى بىرىكتىرىپ قانا قويماي, باي مينەرالدى-شيكىزات بازاسى مەن قولايلى ىسكەرلىك كليماتقا يە.
ۆەبينار بارىسىندا مالايزيالىق كومپانيالار الماتىدا ورنالاسقان «يننوۆاتسيالىق تەحنولوگيالار پاركى» اەا مەملەكەتتىك قولداۋ شارالارىنا, سونداي-اق «استانا» حالىقارالىق قارجى ورتالىعى ۇسىناتىن مۇمكىندىكتەرگە قىزىعۋشىلىق تانىتتى.
ءىس-شارا قورىتىندىسى بويىنشا كومپانيا وكىلدەرىنىڭ قازاقستانعا ساپارىن ۇيىمداستىرۋ تۋرالى ۋاعدالاستى.