جۇزجىلدىق تاريحى بار جالپىۇلتتىق رەسپۋبليكالىق گازەت – «ەگەمەن قازاقستاننىڭ» بايىرعى وقىرماندارىنىڭ ءبىرىمىن. ءار سانىن اسىعا كۇتىپ, تاتىمدى دۇنيەلەردى تۇششىنىپ وقيتىنىمىز بار. ءار جىلدارداعى گازەت تىگىندىلەرى دە مەن ءۇشىن باعا جەتپەس قىمبات قازىنا. ءالى كۇنگە دەيىن ءۇيىمنىڭ تورىندە تۇر.
سوڭعى كەزدەرى مەرزىمدى ءباسپاسوز بەتتەرىنەن «گازەت كەرەك پە؟ كىم ءۇشىن كەرەك؟» دەگەن سارىنداعى دۇنيەلەردى ءجيى وقيتىن بولدىق. «سەبەپسىز سالدار بولمايدى» دەگەندەي, شىنىندا دا, جۇرت گازەت-جۋرنال وقۋدان قالىپ بارادى. وعان ينتەرنەت, الەۋمەتتىك جەلى, اقپارات تاراتاتىن ءتۇرلى-ءتۇرلى قۇرالدار ءوزىنىڭ ەلەۋلى اسەرىن تيگىزىپ وتىر. ونىڭ ۇستىنە, قازىر بۇقارالىق اقپارات قۇرالدارىنىڭ ورنىنا بۇقارالىق كوممۋنيكاتسيا دەگەن ۇعىم ومىرگە كەڭىنەن ەنىپ, بەلەڭ الا باستادى. ءومىر ءبىر ورنىندا تۇرمايدى دەگەن وسى.
ءبىز كەڭەس زامانىندا ءومىر ءسۇرىپ, ەڭبەك ەتتىك. ول ۋاقىتتا بۇقارالىق اقپارات قۇرالدارىنىڭ, ونىڭ ىشىندە گازەتتىڭ بەدەلى جوعارى بولدى. گازەت-جۋرنالدارعا شىققان سىن ماتەريالدارعا مىندەتتى تۇردە شارا كورىلىپ, جاۋاپ بەرىلەتىن. ساۋاتتى جانداردىڭ ءبارى گازەت وقيتىن. ماقتانعانىمىز ەمەس, مەنىڭ قاتارلاستارىم دا, جاسى ۇلكەن اعالارىمىز بەن اپالارىمىز دا ورازامىزدى كۇندەلىكتى كەلىپ جاتاتىن گازەت-جۋرنالمەن اشاتىن ەدىك. ەڭ كەمى ەكەۋ, ۇشەۋ, ءتىپتى ون شاقتى باسىلىمدى جازدىرىپ الىپ وقيتىندار دا بولاتىن ارامىزدا. قالاي دەگەندە دە گازەت-جۋرنالعا جەتەتىن دۇنيە جوق قوي. سەبەبى ودان ىزدەگەن ادام ءبارىن تابادى. رۋحاني ازىق دەگەنىڭىز, مىنە, وسى!
جالپى, «گازەت كەرەك پە؟ كىم ءۇشىن كەرەك؟» دەگەن ساۋالعا بەرەتىن جاۋابىمىز مىناۋ: گازەت كەرەك! ول ەڭ الدىمەن قوعامعا, وندا تۇراتىن ادامدارعا كەرەك. ءالى دە قوعامىمىزدا كوزى اشىق, كوكىرەگى وياۋ, ساۋاتتى, گازەت وقيتىن جاندار بارشىلىق. ونى از دەسەڭىز, وركەنيەتتى, جالپاق الەمدى تەحنيكالىق, تەحنولوگيالىق وزىق عىلىمىمەن تاڭ قالدىرىپ كەلە جاتقان ەلدەردىڭ وزىندە سان ميلليونداعان تارالىممەن گازەتتەر شىعىپ جاتقانىن قايدا قويامىز؟
توقسان اۋىز ءسوزدىڭ توبىقتاي ءتۇيىنى سول – گازەت ادامعا اۋاداي قاجەت.
كارىباي امزە ۇلى,
سوزاق اۋدانىنىڭ قۇرمەتتى ازاماتى
تۇركىستان وبلىسى