سەناتتا «اۋىل شارۋاشىلىعى تەحنيكاسىنىڭ وتاندىق ءوندىرىسىن دامىتۋ: جاعدايى, ماسەلەلەرى جانە بولاشاعى» تاقىرىبىنا ارنالعان دوڭگەلەك ۇستەل ءوتتى.
ءىس-شاراعا پارلامەنت سەناتىنىڭ دەپۋتاتتارى, ورتالىق مەملەكەتتىك ورگانداردىڭ باسشىلىعى جانە قوعامدىق بىرلەستىكتەردىڭ وكىلدەرى قاتىسىپ, وتاندىق اۋىل شارۋاشىلىعى تەحنيكاسى ءوندىرىسىن دامىتۋدىڭ وزەكتى ماسەلەلەرىن تالقىلادى.
سەناتتىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ توراعاسى ءالي بەكتاەۆ دوڭگەلەك ۇستەل وتىرىسىنا توراعالىق ەتتى.
«ماشينا-تراكتور پاركىنىڭ ەسكىرۋى جانە جاڭارتۋ قارقىنىنىڭ تومەندىگى نەگىزگى ماسەلە بولىپ وتىر. سونىمەن قاتار بۇگىنگى تاڭدا اۋىل شارۋاشىلىعى تەحنيكاسى باعاسىنىڭ (شامامەن 25-30 پايىزعا) وسكەنى دە بايقالىپ وتىر. بۇل بولاشاقتا تەحنيكانى جاڭارتۋ قارقىنىنىڭ تومەندەۋىنە اكەلەدى. سوندىقتان قازىرگى ۋاقىتتا ليزينگكە بەرىلەتىن جانە تىكەلەي ساتىپ الىناتىن اۋىل شارۋاشىلىعى تەحنيكاسىنا جەڭىلدىكپەن نەسيە بەرۋدى قارجىلاندىرۋ قۇرالدارىن ودان ءارى دامىتۋ قاجەتتىگى وزەكتى بولىپ وتىر», دەپ اتاپ ءوتتى ءالي بەكتاەۆ.
وتىرىس بارىسىندا پرەزيدەنت جولداۋىندا دا سالاداعى پروبلەمالار ايتىلعانى اتالىپ ءوتىلدى. مەملەكەت باسشىسى اگروونەركاسىپ كەشەنىندە پايدالانىلاتىن تەحنولوگيالاردىڭ 90%-عا جۋىعى ەسكىرگەنىن جانە جاڭعىرتۋدى قاجەت ەتەتىنىن اتاپ ءوتتى. پرەزيدەنت سونداي-اق سالانى سۋبسيديالاۋ ساياساتىن قايتا قاراۋدى تاپسىرعان بولاتىن.
سەناتور مۇحتار جۇماعازيەۆ ءوز بايانداماسىندا بىرقاتار پروبلەمانى اتاپ ءوتىپ, اۋىل شارۋاشىلىعى تەحنيكاسىن جاڭارتۋ جاعدايىنا الاڭداۋشىلىق ءبىلدىردى.
«رەسپۋبليكا بويىنشا 2022 جىلعى 1 قاڭتاردا اۋىل شارۋاشىلىعى تەحنيكاسىن جاڭارتۋدىڭ ورتاشا دەڭگەيى 4,3 پايىزدى قۇرادى, ال بەكىتىلگەن نورماتيۆ بويىنشا جىل سايىن 6 پايىزعا جاڭارتىلۋعا ءتيىس», دەپ اتاپ ءوتتى سەناتور.
يندۋستريا جانە ينفراقۇرىلىمدىق دامۋ ءمينيسترىنىڭ ورىنباسارى مارات قاراباەۆ پەن اۋىل شارۋاشىلىعى ءمينيسترىنىڭ ءبىرىنشى ورىنباسارى ايداربەك ساپاروۆ وسى پروبلەمالاردى شەشۋ جونىندەگى ءوز پىكىرلەرىمەن ءبولىستى.