شاعىن گرانتتاردى جۇزەگە اسىرۋدىڭ ناتيجەسىندە ءىرى قالالار مەن اۋىلدىق جەرلەردىڭ تۇرعىندارى تسيفرلىق, قارجىلىق, كومپيۋتەرلىك ساۋاتتىلىق پەن تىلدەردى مەڭگەرۋ دەڭگەيىن اقىسىز نەگىزدە ارتتىرا الادى, دەپ حابارلايدى Egemen.kz ازاماتتىق باستامالاردى قولداۋ ورتالىعىنىڭ ءباسپاسوز قىزمەتىنە سىلتەمە جاساپ.
رەسپۋبليكادا «Birgemiz Bilim» جالپىۇلتتىق جوباسى ىسكە اسىرىلا باستادى. ونىڭ نەگىزگى ماقساتى – ۆولونتەرلەردى تارتۋ ارقىلى تۇرعىنداردىڭ, ونىڭ ىشىندە اۋىلدىق جەرلەردەگى حالىقتىڭ تسيفرلىق, قارجىلىق, كومپيۋتەرلىك ساۋاتتىلىعى مەن تىلدەردى مەڭگەرۋ دەڭگەيىن ارتتىرۋ.
جوبا جەتەكشىسى, «جاستار قىزمەتكەرلەرى قوعامداستىعى» قوعامدىق بىرلەستىگىنىڭ وكىلى ايگۇل ابدۋلينانىڭ ايتۋىنشا, ءۇش جىلدىق جوبا اياسىندا ۆولونتەرلىك ۇيىمدار مەن باستاماشىل توپتارعا كەم دەگەندە 90 شاعىن گرانت بولىنبەك.
«2024 جىلعا دەيىن ءبىز كونكۋرستىق نەگىزدە جىل سايىن 30 شاعىن گرانتتى جۇزەگە اسىراتىن بولامىز. مولشەرى كەم دەگەندە 300 مىڭ تەڭگەنى قۇرايتىن گرانتتىق قاراجات ءبىلىم بەرۋ سالاسىنداعى الەۋمەتتىك ماسەلەلەردى شەشۋگە باعىتتالعان باستامالاردى ىسكە اسىرۋ ماقساتتارىنا بەرىلەتىن بولادى. بۇل شەت ءتىلىن ۇيرەنۋ كۋرستارىن ۇيىمداستىرۋ, ساندىق نەمەسە قارجىلىق ساۋاتتىلىقتى ارتتىرۋ سياقتى جوبالار بولۋى مۇمكىن. شاعىن گرانتتاردى جۇزەگە اسىرۋشىلار ءوز كومەگىن تەگىن كورسەتەتىن بولادى», دەدى ول جوبانى تانىستىرۋ بارىسىندا.
بۇدان بولەك, «Birgemiz Bilim» جالپىۇلتتىق جوباسىن ىسكە اسىرۋ اياسىندا قازاقستاندىقتاردىڭ ءبىلىم بەرۋ سالاسىندا نەگە مۇقتاج ەكەندىگى انىقتالىپ, ولاردىڭ تسيفرلىق, قارجىلىق, كومپيۋتەرلىك ساۋاتتىلىعىن ارتتىرۋعا ارنالعان وقىتۋدى ۇيىمداستىرۋ ماقساتىندا ۆولونتەرلەر دايارلانادى. سونداي-اق ءۇش جىلدىڭ قورىتىندىسى بويىنشا اناليتيكالىق بايانداما ازىرلەنەدى دەپ جوسپارلانىپ وتىر.
ايتا كەتسەك, «Birgemiz Bilim» جوباسى 2024 جىلدىڭ سوڭىندا اياقتالماق.