تۇركىستاندا ەل پرەزيدەنتى قاسىم-جومارت توقاەۆتىڭ «جاڭا قازاقستان: جاڭارۋ مەن جاڭعىرۋ جولى» اتتى قازاقستان حالقىنا ارناعان جولداۋىن جۇزەگە اسىرۋ جولدارىن تالقىلاۋ ماقساتىندا «قازاقستان ءماسليحاتتارى دەپۋتاتتارىنىڭ بىرلەستىگى» رەسپۋبليكالىق قوعامدىق بىرلەستىگى ورتالىق كەڭەسىنىڭ وتىرىسى ءوتتى.
قوعامدىق بىرلەستىك توراعاسى تولەۋبەك مۇقاشەۆ جۇرگىزىپ وتىرعان جيىندا تۇركىستان وبلىسىنىڭ اكىمى ومىرزاق شوكەەۆ مەملەكەت باسشىسى تاراپىنان وڭىرگە جاقسى كوڭىل ءبولىنىپ جاتقانىن, كيەلى قالا – بىرلىك پەن تاتۋلىقتىڭ ورتالىعى رەتىندە داميتىنىن اتاپ ءوتتى. سونىمەن قاتار بيىلعى جولداۋدا ازاماتتىق قوعامدى دامىتۋ, ءماسليحاتتاردىڭ ءرولىن كوتەرۋ جانە وزگە دە ساياسي رەفورمالاردى جۇزەگە اسىرۋ جونىندە ماڭىزدى تاپسىرمالار جۇكتەلگەنىنە توقتالدى. «پرەزيدەنت ازاماتتاردىڭ وكىلدى بيلىككە دەگەن سەنىمىن نىعايتۋ ءۇشىن ماسليحاتتارعا باسا ءمان بەرۋ كەرەكتىگىن, ولاردىڭ ءرولىن ارتتىرىپ, دەربەستىگىن قامتاماسىز ەتۋ ءۇشىن ءماسليحات توراعاسى لاۋازىمىن ەنگىزۋدى ۇسىندى. ءماسليحاتتاردىڭ ىقپالىن بارىنشا كۇشەيتۋ ءۇشىن وبلىس اكىمدەرىن تاعايىنداۋ تارتىبىنە وزگەرىس ەنگىزىلۋى مۇمكىن. تاعى ءبىر ماڭىزدى ماسەلە, قاسىم-جومارت كەمەل ۇلى «ساياسي جاڭعىرۋ اياسىندا ءماسليحاتتار جەرگىلىكتى ءوزىن ءوزى باسقارۋدىڭ نەگىزگى بۋىنىنا اينالۋعا ءتيىس» دەي كەلە بىرقاتار مىندەتتەر جۇكتەدى. بۇل رەتتە وبلىسىمىزدا جەرگىلىكتى اتقارۋشى ورگاندار مەن ءماسليحاتتار بىرلەسە جۇمىس اتقارىپ, وزەكتى ماسەلەلەردى شەشۋگە اتسالىسىپ ءجۇر», دەدى ءوڭىر باسشىسى.
سونداي-اق وبلىس اكىمى ەل بىرلىگىن نىعايتۋدا تۇركىستان تاجىريبەسى جوعارى باعالانعانىن اتاپ ءوتتى. جولداۋداعى باسىم باعىتتارعا توقتالىپ, وبلىستىڭ دامۋ بارىسىمەن تانىستىردى. ء«ۇش جىلدان استام ۋاقىت ىشىندە تۇركىستان ءوڭىرى جاقسى دامىدى. جالپى, وڭىرلىك ءونىم كولەمى 2,5 ەسەگە ارتتى. وبلىستا مۇناي وڭدەۋ زاۋىتى جانە وزگە دە اۋقىمدى جوبالار قولعا الىنىپ, قۇرىلىسى ءجۇرىپ جاتىر. اۋىل شارۋاشىلىعىن ءارتاراپتاندىرۋ, جاڭا تەحنولوگيالاردى ەنگىزۋ, جاڭبىرلاتىپ, تامشىلاتىپ سۋعارۋ ارقىلى ءونىم كولەمى ارتا ءتۇستى. جىلىنا 40 مىڭداي جۇمىس ورنىن اشۋ مەجەسى قويىلىپ, بۇل جۇزەگە اسۋ ۇستىندە. تاعى ءبىر ايتا كەتەرلىگى, قۇرىلىس سالاسىندا بۇرىن-سوڭدى بولماعان كورسەتكىشكە قول جەتكىزىلدى. بىلتىر 700 مىڭ شارشى مەتردەن استام ءۇي پايدالانۋعا بەرىلدى. ءبىر تۇركىستان قالاسىنىڭ وزىندە 15 مىڭداي پاتەر سالىنىپ, 100 مىڭ تۇرعىنعا ساي پاتەر مەن ينفراقۇرىلىم جاساقتالىپ وتىر. تۇركىستان قالاسىنداعى ۇيلەردىڭ 90 پايىزىنا گاز بەرىلدى. ەكولوگيا جاقساردى. سۋ كانالدارى بەتوندالىپ, جاڭا سۋ قويمالار پايدالانۋعا بەرىلۋدە. مىنە, وسى جوبالار ارقىلى تۇركىستاننىڭ ەكولوگياسى جاقسارىپ, جاسىل قالاعا اينالادى دەگەن سەنىم مول. بارلىق سالاداعى جۇمىستار جالعاسىن تابا بەرەدى. مۇنىڭ ءبارى ەل بىرلىگىنىڭ, اتقارۋشى ورگان مەن ءماسليحاتتاردىڭ بىرلەسكەن جۇمىسىنىڭ جەمىسى», دەدى ومىرزاق شوكەەۆ.
وتىرىستا جەرگىلىكتى جانە وڭىرلەردەن كەلگەن ءماسليحاتتار حاتشىلارى بايانداما جاساپ, ءوز پىكىرلەرىن ءبىلدىردى. جاڭا قازاقستاندى قۇرۋ ءۇشىن قۋاتتى ءماسليحاتتار مەن بىلىكتى دەپۋتاتتاردى قالىپتاستىرۋ جولدارى ايتىلدى. سونداي-اق «قازاقستان ءماسليحاتتارى دەپۋتاتتارى بىرلەستىگى» رەسپۋبليكالىق قوعامدىق بىرلەستىگىنىڭ 2022 جىلعا ارنالعان جۇمىس جوسپارى بەكىتىلدى. جيىن سوڭىندا دەپۋتاتتار پرەزيدەنت جولداۋىن جۇزەگە اسىرۋ بويىنشا قازاقستاندىقتارعا ارنالعان «جاڭا قازاقستاندى بىرگە وركەندەتەيىك!» اتتى ۇندەۋ قابىلدادى.
تۇركىستان