مەملەكەت باسشىسى قاسىم-جومارت توقاەۆتىڭ «جاڭا قازاقستان: جاڭارۋ مەن جاڭعىرۋ جولى» اتتى قازاقستان حالقىنا ارنالعان جولداۋىندا ايتىلعان ماڭىزدى بولىمدەرگە توقتالا وتسەم, بىرىنشىدەن, پرەزيدەنتتىڭ ۇلتتىق قۇرىلتاي قۇرۋدى, وعان بارلىق وڭىردەن وكىلدەر قاتىساتىندىعى تۋرالى ۇسىنىسىن دۇرىس دەپ سانايمىن.
ۇلتتىق, مەملەكەتتىك دەڭگەيدەگى ماسەلەلەر ۇنەمى كۇن تارتىبىندە تۇرۋى قاجەت. جەرگىلىكتى جەردەگى قوردالانعان ماسەلەلەر تومەننەن جوعارى قاراي جەتىپ, شەشىمىن تاباتىنىنا سەنەمىن.
ەكىنشىدەن, پرەزيدەنتتىڭ وكىلەتتىلىگىن قىسقارتىپ, پارلامەنت ءرولىن ايتارلىقتاي ارتتىرۋدى ايتتى. بۇل وزگەرىس – زامان تالابى. رەت-رەتىمەن ىسكە اسىپ, دەموكراتيالىق جۇيەنىڭ ءپىسىپ-جەتىلە بەرەتىندىگىنىڭ ايقىن كورىنىسى.
ۇشىنشىدەن, پرەزيدەنت كونستيتۋتسيالىق سوت قۇرۋدى ۇسىندى. «باس پروكۋرور مەن ادام قۇقىعى جونىندەگى ۋاكىلگە دە كونستيتۋتسيالىق سوتقا جۇگىنۋ مۇمكىندىگىن بەرگەن ءجون. بۇل باستامالار ءادىل ءارى قۇقىقتىق مەملەكەت قۇرۋ جولىنداعى ماڭىزدى قادام بولادى», دەدى پرەزيدەنت.
تورتىنشىدەن, حالىقتىڭ كوڭىلىنەن شىققان ءۇش وبلىس قۇرۋ ماسەلەسى دە وتە ورىندى. تالاي دانا, ساياساتكەر تاربيەلەنىپ شىققان سەمەي وڭىرىندە اباي وبلىسىن قۇرۋ جانە بايتاق جەرىمىزدىڭ ءدال ورتاسىندا ۇلىتاۋ وبلىسىن قۇرۋ, سونىمەن قاتار الماتى وبلىسىن ەكىگە ءبولىپ, جەتىسۋ وبلىسىن قۇرۋ ماڭىزدى شەشىم دەپ ەسەپتەيمىن. جانە قاپشاعاي قالاسىن قوناەۆ اتىنا وزگەرتۋ يدەياسى وتە ورىندى.
جالپى, جاڭا قازاقستاندى قۇرۋدا ارقايسىسىمىز ەڭبەكتەنۋىمىز قاجەت. ءار ادام وزىنەن باستاپ دامىپ, جەتىلىپ, ەلدىڭ دامۋىنا قىزمەت ەتۋىمىز كەرەك.
ءۋاليحان بولاتبەك,
جامبىل وبلىستىق ءماسليحاتىنىڭ دەپۋتاتى