اتىراۋدا ءمودۋلدى جۇقپالى اۋرۋلار اۋرۋحاناسىندا COVID-19 ۆيرۋسىن جۇقتىرعان سوڭعى ناۋقاس ەمدەلىپ شىقتى, دەپ حابارلايدى Egemen.kz اتىراۋ وبلىسىنىڭ وڭىرلىك كوممۋنيكاتسيالار قىزمەتىنە سىلتەمە جاساپ.
70 جاستاعى ساۋلە جولدىباەۆا اۋرۋحاناعا 2022 جىلدىڭ 16 ناۋرىز كۇنى وكپەسىنىڭ 40%-ى زاقىمدانعان كۇيدە تۇسكەن. 10 كۇن ەم قابىلداعان ناۋقاس بۇگىندە اۋرۋىنان ايىعىپ, ەم العان سوڭعى پاتسيەنت رەتىندە اۋرۋحانادان شىقتى.
- اۋرۋحاناعا كەلگەننەن بەرى دارىگەرلەر مەن مەدبيكەلەر ءتيىستى كومەكتەرىن كورسەتتى. اۋرۋحانا باسشىلىعىنان باستاپ بارىنە ايتار العىسىم شەكسىز. باستىسى, قاۋىپتى ىندەت جويىلىپ, قالىپتى ومىرگە ورالساق ەكەن دەگەن تىلەگىم بار, - دەدى ساۋلە جولدىباەۆا.
وبلىستىق دەنساۋلىق ساقتاۋ باسقارماسى 2020 جىلدىڭ 27 ناۋرىزىندا العاشقى ناۋقاستى قابىلداعان مەديتسينا قىزمەتكەرلەرىنىڭ باتىلدىعىن ەرەكشە اتاپ ءوتىپ, قىزمەتكەرلەرگە العىس حاتتار تابىستادى.
- بۇگىنگى كۇنى وبلىس بويىنشا كوروناۆيرۋس ينفەكتسياسىنا قارسى ەم قابىلداپ جاتقان ناۋقاس جوق, - دەدى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى قايسار ابداليەۆ.