ون جىل كۇتتىرگەن جۇلدە

اتالعان جارىستىڭ تۇساۋى 1985 جىلى فران­تسيا­نىڭ استاناسى – پاريجدە كەسىلدى. كەڭەس وداعى ىدىراعانعا دەيىن ءتورت الەم چەمپيوناتى ۇيىمداستىرىلدى. سونىڭ ۇشەۋىندە جالپى ەسەپتە كسرو قۇراماسى جەكە-دارا كوش باستادى. سول كوماندانىڭ ساپىندا ونەر كورسەتكەن قازاقستاندىق گريگوري ەگوروۆ 1989 جىلى بۋداپەشتتە كۇمىس مەدالددى يەلەندى. وليمپيا ويىندارىنىڭ قولا جۇلدەگەرى دەگەن اتاعى بار شىمكەنتتىڭ سى­رىق­پەن سەكىرۋشىسى 5 مەتر 80 سانتيمەترلىك ناتيجە كور­سەتتى. باس جۇلدە تاشكەنتتىك راديون گاتاۋللينگە بۇيىردى. ول وتانداسىمىزدان بەس سانتيمەترگە بيىك سەكىردى. قولا مەدالدى امەريكالىق دجو دايپال ەنشىلەدى.

1993 جىلى ءدال سول ەگوروۆ تاۋەلسىز قازاقستانعا جابىق عيماراتتاعى الەم چەمپيوناتىنىڭ العاشقى جۇلدەسىن اپەردى. كانادانىڭ تورونتو قالاسىندا جالاۋى جەلبىرەگەن جارىستا دا ول تەك ءوزىنىڭ سىرالعى قارسىلاسى گاتاۋلليننەن وزا المادى. ءۇشىنشى ساتىعا فرانتسيالىق جان گالفيون تابان تىرەدى.

1995 جىلعى دودانى يسپانيانىڭ بارسەلوناسى قابىلدادى. «پالاۋ سانت جوردي» ستاديونىندا وتكەن جارىستا الماتىلىق يگور پوتاپوۆيچ كۇ­مىس مەدالدى موينىندا جارقىراتتى. جەرلەسىمىز ۋكراينانىڭ داڭقتى سپورتشىسى سەرگەي بۋبكانى عانا العا جىبەردى. تاعى ءبىر كۇمىستى ولگا شيشيگينا يەلەندى. 60 مەترگە كەدەرگىلەر ارقىلى جۇگىرگەن ول كۋبالىق اليۋسكا لوپەسپەن مارەگە بىردەي جەتتى. دەسەك تە قوسىمشا كورسەتكىشتەر بويىنشا بوستاندىق ارالىنان كەلگەن جەلاياقتىڭ جولى بولدى.

1997 جىلى پاريجدە پوتاپوۆيچكە تەڭ كەلەر ەشكىم تابىلمادى. 5 مەتر 90 سانتيمەترلىك ناتي­جەمەن ول وزگە قارسىلاستارىنان قارا ءۇزىپ كەتتى. ەكىنشى جانە ءۇشىنشى ورىنداردى امەريكالىق لورەنس دجونسون مەن رەسەيلىك ماكسيم تاراسوۆ ەنشىلەدى. 1999 جىلى جاپونيانىڭ ماەباسي قالاسىندا شيشيگينا شاشاسىنا شاڭ جۇقتىرمادى. الماتىلىق ارۋ بەلگىلەنگەن مەجەنى 7.86 سەكۋندتا جۇگىرىپ ءوتتى. نيگەريالىق گلوريا الوزي كۇمىسپەن كۇپتەلسە, كانادالىق كەتۋرا اندەرسون قولاعا قول سوزدى.

سودان كەيىن ليسسابون, بيرمينگەم, بۋداپەشت جانە ماسكەۋ قالالارىندا ۇيىمداستىرىلعان جارىستاردان قورجىنىمىز بوس قايتسا, 2008 جىلى يسپانيانىڭ ۆالەنسياسىندا دميتري كارپوۆ ءۇشىنشى ورىنعا تابان تىرەدى. 6 131 ۇپاي جيعان كاراعاندىلىق جەتىسايىسشى امەريكالىق براين كلەي مەن بەلورۋسسيالىق اندرەي كراۆچەنكودان قالىپ قويدى. پيرەنەي تۇبەگىندە ءۇش قارعىپ سەركىرۋشى ولگا رىپاكوۆا دا ولجاعا كەنەلدى. ول قولا مەدالدى موينىنا ءىلدى. ءسال كەيىنىرەك شىعىس قازاقستان وبلىسىنىڭ وكىلى تاعى ەكى رەت ۇزدىكتەر ساناتىنان كورىندى. رىپاكوۆا 2010 جىلى دوحادا التىننان القا تاقسا, 2012 جىلى ىستانبۇلدا كۇمىس مەدالدى قاناعات تۇتتى.

2014 جىلى سوپوت, 2016 جىلى پورتلەند جانە 2018 جىلى بيرمينگەمدەگى باسەكەدە قازاقستاننىڭ بىرنەشە سپورتشىسى باق سىناعانىمەن, ولاردىڭ ەشبىرىنىڭ باعى جانبادى. 2020 جىلى نانجيندە شىمىلدىعى تۇرىلۋگە ءتيىس ءدۇبىرلى دودا كۇللى الەمدى جايلاعان كوروناۆيرۋستىڭ كەسىرىنەن وتپەي قالدى. مىنە, ەندى اراعا تۋرا 10 جىل سالىپ, 24 جاستاعى سەمەيدىڭ سۇلۋى نادەجدا دۋبوۆيتسكايا ورەلى ونەرىمەن ءوز جانكۇيەرلەرىن قۋانتتى.

سەربيادا اياقتالعان الەم چەمپيوناتىنىڭ جالپى كوماندالىق ەسەبىندە 4 التىن, 3 كۇمىس جانە 2 قولانى ولجالاعان ەفيوپيا قۇراماسى الدىنا جان سالمادى. وسىلايشا, قارا قۇرلىق وكىلدەرى العاش رەت وسىنداي وراسان زور تابىسقا قول جەتكىزدى. ەكىنشى ورىندا – اقش. امەريكالىق ورەندەر 3 التىن, 7 كۇمىس جانە 9 قولانى يەلەندى. ءۇشىنشى ساتىعا بەلگيا جايعاستى. ولاردىڭ قورجىنىندا قوس التىن مەدال بار. ۇزدىك بەستىكتى شۆەيتساريا (1+2+0) مەن شۆەتسيا (1+1+1) تۇيىندەدى. اتالعان جارىستا 20 مەملەكەتتىڭ ءانۇرانى شىرقالىپ, بارلىعى 31 ەلدىڭ تۋى بيىكتە جەلبىرەدى.