اباي, ۇلىتاۋ جانە جەتىسۋ وبلىستارىن قۇرۋ اتالعان وڭىرلەردىڭ الەۋمەتتىك-ەكونوميكالىق دامۋىن جاڭا دەڭگەيگە كوتەرۋگە مۇمكىندىك بەرەدى. بۇل تۋرالى قر پرەمەر-ءمينيسترى مالىمدەدى, دەپ حابارلايدى Egemen.kz.
«جولداۋدىڭ نەگىزگى باسىمدىقتارىنىڭ ءبىرى – وڭىرلەردىڭ دامۋىنا جاڭا سەرپىن بەرۋ. اباي, ۇلىتاۋ جانە جەتىسۋ وبلىستارىنىڭ قۇرىلۋى اتالعان وڭىرلەردىڭ الەۋمەتتىك-ەكونوميكالىق دامۋىن جاڭا دەڭگەيگە كوتەرۋگە جانە جەرگىلىكتى حالىقتىڭ پروبلەمالارىن جەدەل شەشۋگە مۇمكىندىك بەرەدى», دەدى ءاليحان سمايىلوۆ ۇكىمەت وتىرىسىندا.
بۇل رەتتە ۇكىمەت الدىندا مەملەكەت باسشىسىنىڭ تاپسىرماسىن ناتيجەلى جۇزەگە اسىرۋ مىندەتى تۇرعانىن دا ايتتى.
«ول ءۇشىن وڭىرلەردى قارجىلاندىرۋ ءتارتىبىن تۇبەگەيلى قايتا قاراپ, بيۋدجەتارالىق قاتىناستاردىڭ وڭتايلى مودەلىن ازىرلەۋ قاجەت», دەپ اتاپ ءوتتى ۇكىمەت باسشىسى.
پرەمەر-ءمينيستردىڭ ايتۋىنشا, وڭىرلەر ءۇشىن مەملەكەتتىك ساتىپ الۋ ءتارتىبىن جەڭىلدەتۋ ماسەلەلەرىن پىسىقتاۋ قاجەت.
«جاڭا وبلىستاردى قالىپتاستىرۋ بويىنشا جەدەل جۇمىستى ۇيىمداستىرۋ ءۇشىن ۇلتتىق ەكونوميكا مينيسترلىگىنە مۇددەلى مەملەكەتتىك ورگاندارمەن بىرلەسىپ, ءبىر اپتا مەرزىمدە ءتيىستى جول كارتاسىنىڭ جوباسىن ەنگىزۋدى تاپسىرامىن», دەدى ءا.سمايىلوۆ.