قابانباي باتىردىڭ 330 جىلدىعى اياسىندا شىعىس قازاقستاندا باتىرعا ارنالعان مۋزەي اشىلادى. س.امانجولوۆ اتىنداعى ۋنيۆەرسيتەتتەن ورىن بەلگىلەنگەن مۋزەيدە ەكسپوزيتسيالار QR-كودتار مەن اۋديوگيدتەر ارقىلى زاماناۋي ۇردىستە رەسىمدەلىپ, كورەرمەنگە قازاقتىڭ دارابوز قولباسشىسى تۋرالى دەرەكتەر ۇسىناتىن بولادى.
بيىل اتالعان جوعارى وقۋ ورنىندا بىرقاتار تىڭ جوبا قولعا الىندى. قابانباي باتىر اتىنداعى مۇراجاي اشىلادى. سپورتزالى جاڭارتىلادى, اتۋ تيرىنە كۇردەلى جوندەۋ جۇمىستارى جۇرگىزىلەدى. سونداي-اق تسەرەبرالدى سال اۋرۋىنا شالدىققان بالالارعا ارنالعان وتاندىق ورىندىقتار, قيمىل-قوزعالىستى دامىتاتىن ويىنشىقتار ءوندىرۋدى قولعا الىپ وتىر.
مۇراجاي ۋنيۆەرسيتەتتىڭ ەكىنشى كورپۋسىندا ورنالاسپاق. ايتا كەتسەك, ءدال سول كورپۋستان ۋنيۆەرسيتەتتىڭ تاريحى باستالعان. قازىرگى ۋاقىتتا مۇندا ەلىمىزدىڭ قارۋلى كۇشتەرى ءۇشىن بولاشاق اسكەريلەر دايارلانادى. شقۋ رەكتورى مۇحتار تولەگەننىڭ ايتۋىنشا, مۇراجاي بولاشاق وفيتسەرلەرگە قاجەتتى ءبىلىم مەن تاجىريبە الۋعا باعىتتالعان. باستى ماقسات – جاستاردى اسكەري-پاتريوتتىققا تاربيەلەۋ.
– ۋنيۆەرسيتەت بازاسىندا قابانباي باتىر اتىنداعى مۇراجايدى اشۋ جوسپارى تالقىلاندى. جاڭا نىساندى اشۋعا كومەككە مۋزەيتانۋشىلار, ساۋلەتشىلەر, تاريحشىلار مەن اسكەريلەر كەلدى. ەسكيزدەردىڭ ءارتۇرلى نۇسقاسىن تالقىلادىق. قازىرگى زامانعى تسيفرلى تەحنولوگيالار قولدانىلادى. سوندىقتان بۇل مۋزەي تەك ءبىزدىڭ ستۋدەنتتەرگە, ماگيسترانتتار مەن دوكتورانتتارعا عانا ەمەس, قالا تۇرعىندارىنا دا قىزمەت ەتەدى, – دەدى مۇحتار تولەگەن.
مۋزەي اشىلعان سوڭ ەكسپوزيتسيالار اسەرىن كۇشەيتۋ ءۇشىن جاڭا زاماناۋي تەحنولوگيالار قولدانىلماق. ستاندارتتى ۆيترينالىق جابدىقتارمەن قاتار QR-كودتار مەن اۋديوگيدتەردى ىسكە قوسۋ جوسپارلانعان.
شىعىس قازاقستان وبلىسى