ساڭلاقتاردى سان سوقتىرعان جاستاردىڭ جانكەشتىلىگى ءسۇيسىنتتى

كوزى تىرىسىندە-اق كەرەي قويشىبەكتىڭ «سامبونىڭ اكادەميگى» اتانعانىن جان­كۇيەرلەر جاقسى بىلەدى. ايتۋلى ازامات تابانى كۇرەكتەي 18 جىل بويى قازاق­ستان ۇلتتىق قۇراماسىنىڭ باس باپكەرى (1992-2010 جىلدار) بولدى. سول ۋاقىت ارالىعىندا ءبىزدىڭ  جىگىتتەر تەك الەم چەمپيوناتتارىندا 10 التىن جانە 50-دەن اسا كۇمىس پەن قولا مەدالدى يەلەندى. ودان بولەك, الەم كۋبوگى, ازيا بىرىنشىلىگى جانە باسقا دا ءدۇبىرلى دودالاردا تولاعاي تابىستارعا قول جەت­كىزدى. سونىڭ ارقاسىندا وتاندىق سام­بوشىلارىمىز جەر-جاھانداعى ەڭ ۇزدىك كوماندالاردىڭ ساناتىنا ەر­كىن قوسىلدى. ونىڭ الدىندا ايتۋلى باپكەر ەلىمىزدىڭ جاستار قۇراماسىن 10 جىل بويى جاتتىقتىردى. بۇل جارىس­تاردا دا كەراعانىڭ شاكىرتتەرى وزا شاپتى. سونىمەن قوسا ءوزى دە ەگدە تارتقانشا با­ۋ­ىرى ىستىق بوز كىلەمنەن ەش الىستاعان جوق. ءتۇرلى جارىستارعا قاتىسىپ, قان­جىعاسى ۇنەمى مايلانىپ ءجۇردى. ەڭ عاجابى, قويشىبەك الپىستان اسىپ, جەتپىسكە جەتەر تۇستىڭ وزىندە سامبو مەن دزيۋدو كۇرەسىنەن ارداگەرلەر اراسىندا بىرنەشە رەت الەم چەمپيونى اتاندى.

پاندەميا كۇللى الەمدى شارلاعان كەزدە تالاي جاقسىلارىمىز بەن جايساڭ­دارىمىزدان ايرىلىپ قالدىق. سول ىندەتتىڭ كەسىرىنەن بىلتىرعى كوكتەمدە, 74 جاسقا قاراعان شاعىندا كەرەي قويشى­بەك تە جارىق دۇنيەمەن قوش ايتىستى. بىراق ونىڭ ارتىندا ولمەيتىن ءىسى, اسىل مۇراسى جانە قالىڭ شوعىر شاكىرتتەرى قالدى. مىنە, سول ازاماتتار بيىلعى قازاقستان چەمپيوناتىن وزدەرىنىڭ ۇلاعاتتى ۇستازدارىنىڭ رۋحىنا ارناۋدى قۇپ كورگەن ەكەن. بۇل باستامانى ايدوس اقجانوۆ جەتەكشىلىك ەتەتىن سپورتتىق جانە جاۋىنگەرلىك سامبو فەدەراتسيا­سى ءبىراۋىزدان قولدادى. كەراعانىڭ تۋعان ءىنىسى, ەلىمىزدىڭ ەڭبەك سىڭىرگەن جاتتىقتىرۋشىسى مەرەي كوشكىن, جاس­تار مەن جاسوسپىرىمدەر اراسىنداعى الەم چەمپيونى, ەرەسەكتەر اراسىنداعى ازيا چەمپيونى, الەم بىرىنشىلىگىنىڭ قولا جۇلدەگەرى قايرات كۇنسافين جانە تاعى باسقا كوپتەگەن شاكىرتى اتالعان جارىستىڭ اسا جوعارى دەڭگەيدە وتۋىنە بارىنشا كۇش سالدى. 

ءسويتىپ, سەمەيدەگى سپورت كەشەنىنە جينالعان كورەرمەندەر ءۇش كۇن بويى بوز كىلەمدەگى «جان الىسىپ, جان بەرىسكەن» بەلدەسۋلەردىڭ كۋاسى بولدى. ەرلەر سا­يىسىندا بىرنەشە توسىن ناتيجەلەر تىركەلدى. اتاپ ايتساق, كىلەڭ سايدىڭ تاسىنداي ىرىكتەلگەن جىگىتتەر جينالعان 64 كيلو سالماق دارەجەسىندە اسا دارىندى بالۋان ەسەنتاي يماحانوۆ دارا شىقتى. باستاپقى بەلدەسۋلەرىندە نەبىر ساقا سپورتشىلاردى سان سوقتىرعان 20 جاستاعى سەمەي ءوڭىرىنىڭ تۋماسى جارتىلاي فينالدا الەم بىرىنشىلىگىنىڭ كۇمىس جۇلدەگەرى, تۇركىستاندىق كەمەل­بەك مولداشتى جىعىپ, جەرگىلىكتى جانكۇيەردى ءبىر جەلپىندىرىپ تاستادى. اقتىق سىندا ول قاراعاندىلىق راحات جاڭانيەتپەن كۇش سىناستى. ارقا تو­سىنەن كەلگەن سامبوشىنىڭ 2018 جىلعى الەم چەمپيونى دەگەن اتاعى بار. بىراق ايگىلى قارسىلاسىنان ەش قايمىقپاعان ەسەنتاي ونى دە ەڭسەرىپ, باس جۇلدەنى قانجىعاسىنا بايلادى. 

71 كيلو سالماقتاعى تالدىقورعاندىق ارنۇر قۋاتايدىڭ دا ونەرى كوپشىلىكتىڭ كوڭىلىنەن شىقتى. جاستار اراسىنداعى الەم بىرىنشىلىگىنىڭ كۇمىس جۇلدەگەرى جارىستى ءبىر دەممەن وتكىزدى. قارسى كەلگەندەرىن الىپ تا, شالىپ تا جىققان ارنۇر شەشۋشى تۇستا الەم جانە ازيا چەمپيونى, كوپتەگەن حالىقارالىق جارىس­تىڭ جەڭىمپازى, ورالدىق نۇر­بول سەرىكوۆتى سان سوقتىرىپ, جەڭىس تۇعى­رىنىڭ ەڭ بيىك ساتىسىنا كوتەرىلدى.

ال وزگە سالماق دارەجەلەرىندە مىنا با­لۋاندار باس جۇلدەنى ولجالادى: 53 كيلو – مەرەي ءسادۋ (اتىراۋ), 58 كيلو – قايىربەردى ايدىنباي (اتىراۋ), 64 كيلو – مارلەن جاڭعابىل (قاراعاندى), 88 كيلو – ەلامان قويشىباەۆ (اقتوبە), 98 كيلو – الىبەك زەكەنوۆ (نۇر-سۇلتان) جانە + 98 كيلو – تەمىرلان كولباي (باتىس قازاقستان).

جالپىكوماندالىق ەسەپتە اتىراۋ وبلىسىنان كەلگەن سامبوشىلاردىڭ اسىعى الشىسىنان ءتۇستى. ولار 2 التىن مەن 1 قولانى ولجالاپ, جارىس كەستەسىندە كوش باستادى. قاراعاندى (1 التىن +2 كۇمىس + 1 قولا) مەن باتىس قازاقستان وبلىستارىنىڭ (1+2 +1 قولا) وكىلدەرى ەكىنشى جانە ءۇشىنشى ورىنداردى ءوزارا ءبولىستى. الماتى (1+1+5) مەن اقتوبە وبلىستارىنىڭ (1+1+2) ورەندەرى ءتورتىنشى جانە بەسىنشى ساتىلارعا تۇراقتادى.  

بۇرىمدىلار اراسىنداعى جارىستا الماتى وبلىسىنىڭ قىزدارى الدارىنا جان سالمادى. جەتى جۇلدەگە قول جەت­كىزگەن ولار ايدى اسپانعا ءبىر-اق شىعاردى. اسىرەسە, ءبىز 72 كيلو سالماقتا بەلدەسكەن ءدىلداش قۇرىشباەۆانىڭ اسقان شەبەرلىگىنە ءتانتى بولدىق. باقىت قوقىسبەكوۆتەي بىلىكتى باپكەردەن ءتا­لىم-تاربيە العان ول – بۇگىنگى تاڭدا ۇلت­تىق قۇراما ساپىنداعى ەڭ بەلدى سام­بوشىلاردىڭ ءبىرى ءارى بىرەگەيى. ولاي دەۋگە نەگىز, قۇرىشباەۆا 2013-2021 جىلدار ارالىعىندا وتكەن الەم چەمپيو­ناتتارىندا التى رەت جەڭىس تۇعىرىنا كوتەرىلدى. سول مەدالداردىڭ ۇشەۋى كۇمىس جانە ۇشەۋى قولا. ونىڭ سىرتىندا ازيا ويىندارىنىڭ جەڭىمپازى, قۇرلىق بىرىنشىلىگىنىڭ بىرنەشە دۇركىن جەڭىمپازى جانە باسقا دا تولىپ جاتقان اتاقتارى بار. بۇل جولى دا ءدىلداش ءوزىنىڭ دەڭگەيى مەن دارەجەسىنە ساي ونەر كورسەتتى. بارلىق بەلدەسۋىن مەرزىمىنەن بۇرىن اياقتاعان بالۋان فينالدا ورالدىق ريزا سۇلەيمەنوۆانى ساناۋلى سەكۋندتاردا «اۋىرتۋ» ادىسىمەن ۇتتى. اتالعان كوماندانىڭ قورجىنىنا تاعى ءبىر التىندى ارايلىم ابەنوۆا (+80 كيلو) سالسا, دينارا جۇماباەۆا (59 كيلو) كۇمىس الدى. ال گۇلناست نۇردينوۆا (54 كيلو), اينۇر تورەباي (59 كيلو), جانار قاشقىن (65 كيلو) جانە گۇلجاينا بيسەنوۆا (80 كيلو) قولا مەدالدى ەنشىلەدى. 

چەمپيونات اياقتالعان بەتتە الماتى وبلىسىنىڭ اعا جاتتىقتىرۋشىسى بولات قوجاحمەتوۆپەن از-كەم سۇحباتتاسۋدىڭ ءساتى ءتۇستى. «وتاندىق سامبونىڭ وركەن­دەۋىنە بارلىق كۇش-قاجىرىن جۇمساعان مايتالمان مامان كەرەي قويشىبەكتى ەسكە الۋعا ارنالعان ەل چەمپيوناتىنا ءبىز تىڭعىلىقتى دايارلانىپ, كوماندالىق سايىستا قالاي دا توپ جارۋدى كوزدەدىك. سول ءۇشىن دە كوپ ەڭبەكتەندىك, ىزدەندىك. اقىرى جۇيەلى تۇردە جۇرگىزىلگەن جۇمىس ءوز ناتيجەسىن بەردى. سەمەي تورىندە جاسىنداي جارقىلداعان جەتىسۋ ءوڭىرىنىڭ ورەندەرى 4 التىن, 2 كۇمىس جانە 9 قولا مەدالدى ولجالاپ, مامانداردىڭ سۇيىسپەنشىلىگىنە بولەندى. جانە دە بۇل جەڭىسىمىزدى ءبىز كەراعانىڭ رۋحىنا ارنايمىز! شىنى كەرەك, ول كىسىدەن ءبىز كوپ نارسە ۇيرەندىك. كەرەي قويشىبەك ءوز ىسىنە شىنايى بەرىلگەن ناعىز مايتالمان مامان ەدى. قازىر ونداي ازاماتتار ارامىزدا تىم سيرەك», دەپ بولات باپكەر كوزىنە جاس الدى. 

سونىمەن قاتار التىننان القا تاق­قاندار اراسىندا قاراعاندىلىق مار­گاريتا باجاەۆا (50 كيلو) مەن اجار سالىقوۆا (65 كيلو), ماڭعىستاۋلىق گۇلدانا المۇحانبەتوۆا (54 كيلو), شىمكەنتتىك مارجان بيزاق (59 كيلو) پەن ازمان اماەۆا (80 كيلو) سىندى بالۋان قىزدار بار. جالپى ەسەپتە جەتىسۋ وڭىرىنەن كەلگەن كوماندادان بولەك, قاراعاندى (2+0+2), شىمكەنت (2+0+0), ماڭعىستاۋ (1+0+0) جانە باتىس قازاقستان وبلىستارىنىڭ (0+3+0) قىزدارى تابىستى ونەر كورسەتىپ, الدىڭعى لەكتەن كورىندى.

جاۋىنگەرلىك سامبوشىلاردىڭ سايىسىندا مىنا ساڭلاقتار جەڭىس تۇعىرىنىڭ ەڭ بيىك ساتىسىنا كوتەرىلدى: 53 كيلو – ارمان تۇرىمبەتوۆ (اقتوبە), 58 كيلو – ميراس ۋاليەۆ (الماتى), 64 كيلو – ادىلبەك سەيسوۆ (باتىس قازاقستان), 71 كيلو – اسەت انارباەۆ (شىمكەنت), 79 كيلو – اسىلبەك سمايىلوۆ (شىعىس قازاقستان), 98 كيلو – ءمادي رايحان (شىعىس قازاقستان) جانە +98 كيلو – تالعات جيەنتاەۆ (قوستاناي).