بۇگىندە قازاق بەينەلەۋ ونەرىنە تالانتتى جاستار لەگى كەلدى. سولاردىڭ ءبىرى – ورالبەك قابوكە. ونىڭ تۋىندىلارى ۇلتتىق كالوريتكە بايلىعىمەن عانا ەمەس, جىلى اسەرگە تولى اسەمدىگىمەن, ءتۇپسىز تەرەڭدىگىمەن ەرەكشەلەنەدى. ايتالىق, سۋرەتشىنىڭ «تارتىلىس» اتتى كارتيناسىن قاراڭىزشى. اق ساقالدى قاريانىڭ قۇشاعىندا مامىراجاي ۇيقىدا جاتقان سابيلەردىڭ بەينەسىن كورىپ, حالقىمىزدىڭ «بالا – باۋىر ەتىڭ» دەيتىن عاجايىپ فيلوسوفياسىن بوياۋ سىرىمەن جەتكىزگەن شەبەرلىگىنە ءتانتى بولاسىز.
سونداي-اق اۆتور مۇندا ءتۇرلى زوبالاڭ مەن زۇلماتتى كورسە دە, كەلەشەكتەن ءۇمىت ۇزبەي, ۇرپاعىن امان ساقتاپ قالعان قازاقتىڭ تەكتى بولمىسىن ايشىقتى بەينەلەگەن. جالپى, قىلقالام شەبەرىنىڭ شىعارماشىلىعىندا ۇلت تاريحى, سالت-ءداستۇر, وتباسى, تۋعان جەر تاقىرىپتارى كەڭىرەك قامتىلعان. ماسەلەن, «تاريحپەن بىرگە» اتتى كارتينادا زاماناۋي كيىنگەن قازاق بالاسىنىڭ كونەدەن سىر بۇككەن بالبالتاستاردىڭ ورتاسىندا تاريحتان سىر شەرتىپ تۇرعان بەينەسىن بۇگىنگى ۋاقىتپەن شەبەر ۇيلەستىرە بىلسە, «ماگنيت» دەگەن ەڭبەگىندە ادامنىڭ قاي قيىردا جۇرسە دە, قاسيەتتى وتانى مەن اتا-باباسىنىڭ كىندىك قانى تامعان جەرگە دەگەن ساعىنىشىن, تارتىلىس كۇشىن ءدال جەتكىزگەن. سونىمەن قاتار «اتانىڭ ينستيتۋتى», «جاسىل تەكەمەت», «قۇراق», «بەرەكەلى كيىم» اتتى جۇمىستارىنان قۇندىلىقتاردىڭ قادىرىن بىلۋگە, سالت-ءداستۇردى قۇرمەتتەۋگە, اتا-انانى سىيلاۋدى ايتىپ قانا قويمايدى, سول ارقىلى ۇلتتىق بولمىسىڭدى, ەرەكشەلىگىڭدى ساقتاۋعا ۇندەيدى.
بەلگىلى سۋرەتشى, قازاقستاننىڭ ەڭبەك سىڭىرگەن قايراتكەرى بايتۇرسىن ومىربەكوۆ ونى قازاق بەينەلەۋ ونەرىندەگى جاس بۋىننىڭ بەدەلدى وكىلى دەي كەلىپ:
«سۋرەتشى ءوز كارتينالارىنا تاقىرىپ ىزدەپ, قيادان اسىپ, ەل شەتىنە شىعىپ كەتپەيدى. ءومىر مەن بولمىستىڭ زاڭدىلىقتارىن اتا داستۇردەن, ۇلتتىق تۇرمىستىڭ عاسىرلار بويى سىننان ءوتىپ, دالەلدەنگەن قارىم-قاتىناسىنان, جان دۇنيەنىڭ قوڭىر قوبىز سارىنىنداي مىڭ قۇبىلىسى بار يىرىمدەرىنەن ىزدەيدى» دەسە, تانىمال سۋرەتشى لەيلا ماحات: «ورالبەك – ومىرگە وزگەشە قارايتىن سۋرەتشى. ول تۋعان حالقىنىڭ تاريحى مەن ءداستۇرىن جەتىك بىلەدى. ونىڭ شىعارمالارىنان ونەرگە ادالدىعى كورىنىپ تۇرادى» دەپ باعا بەرىپتى.
ءبىزدىڭ كەيىپكەرىمىز بالا كۇنىنەن ونەرگە جاقىن بولىپ وسكەن. ءبىر سوزىندە «ەگەر سۋرەتشى بولماسام, ادەبيەتشى بولار ەدىم» دەپ ايتىپتى. كەيىن ت.جۇرگەنوۆ اتىنداعى قازاق ۇلتتىق ونەر اكادەمياسىنا وقۋعا ءتۇسىپ, سونداعى ۇلاعاتتى ۇستازدارىنان بەينەلەۋ ونەرىنىڭ قىر-سىرىن ۇيرەنەدى.
ء«بىز قازىر ۋاقىتپەن جارىسىپ كۇن كەشىپ جاتىرمىز. ءاربىر ونەر ادامى ءوزى ءومىر سۇرگەن ۋاقىتتى بەدەرلەيدى. مەن دە ۇلتتىق بەينەدەن اجىراماي, ءوز ءداۋىرىمنىڭ كەلبەتىن بەينەلەپ, حالقىمنىڭ بولمىسى مەن ادامزاتتىق فيلوسوفياعا قوساتىن ەرەكشەلىگىن كوركەمدەسەم» دەيدى ول.
بۇگىنگە دەيىن ورالبەك قابوكەنىڭ نۇر-سۇلتاندا «كوزقاراس», الماتىدا «ىزدەر» اتتى جەكە كورمەسى ءوتىپ, مازمۇندى تۋىندىلارىمەن جۇرتشىلىقتىڭ ىقىلاسىنا بولەندى. سونىمەن بىرگە «شەتەلدەگى قازاق جاستارى جانە انا ءتىلى» اتتى حالىقارالىق ونەر فەستيۆالىندە باس جۇلدەنى يەلەنسە, قازاق حاندىعىنىڭ 550 جىلدىعىنا ارنالعان رەسپۋبليكالىق «كاسپي كوكجيەگى» اتتى سۋرەتشىلەر بايقاۋىندا جانە تاعى باسقا حالىقارالىق كونكۋرستاردا توپ جارعان.