ۇلتتىق كينونىڭ جان-جاقتى كاسىبي دامۋى جولىندا ايانباي ەڭبەك ەتىپ, وتاندىق كينەماتوگرافياعا «شوق پەن شەر», «ومپا», «قىزجىلاعان», «مۇستافا شوقاي», «امانات» سەكىلدى سوم تۋىندىلار سىيلاعان بەلگىلى رەجيسسەر-دراماتۋرگ, مەملەكەتتىك سىيلىقتىڭ لاۋرەاتى, جورج سادۋل اتىنداعى حالىقارالىق سىيلىقتىڭ يەگەرى ساتىبالدى نارىمبەتوۆ اتىنداعى كينوزال اشىلدى. بۇل – وتاندىق كينو تاريحىنداعى ەلەۋلى وقيعا.
الماتىداعى «تۇران» ۋنيۆەرسيتەتىنىڭ «كينو جانە تەلەۆيزيا اكادەمياسى» اياسىندا پايدالانۋعا بەرىلگەن كينوزالدىڭ اشىلۋىنا رەجيسسەردىڭ قوس قاناتى – ۇلدارى ەسكەندىر مەن مۇحيت نارىمبەتوۆتەر عانا ەمەس, يدەيانى جۇزەگە اسىرۋعا «ۇلتتىق كينونى قولداۋ مەملەكەتتىك ورتالىعى» مەن ش.ايمانوۆ اتىنداعى «قازاقفيلم» كينوستۋدياسى دا اتسالىسىپ, وتاندىق كينو سالاسىنىڭ قايراتكەرلەرى تۇتاس قولداۋ بىلدىرگەن. «اكەم تەك قازاق كينوسىنىڭ تاريحىندا عانا ەمەس, الەمدىك كينەماتوگرافيا تاريحىندا دا وشپەس ءىز قالدىردى. بۇل كينوزالدىڭ اشىلۋىنىڭ ۇلكەن ءمانى بار. بۇگىندە بارلىق ونەردىڭ ىشىندە كينو ونەرى الدىڭعى ورىنعا شىعىپ, وسكەلەڭ ۇرپاقتى وزىنە تابىندىرىپ, ماڭىزدى تاربيە قۇرالىنا اينالىپ وتىرعاندىقتان, قازاقستاندىق كەيىنگى جاس بۋىن وتاندىق كينونىڭ الدىڭعى لەگىندە بولعان س.نارىمبەتوۆ تۋرالى بىلۋگە ءتيىس. سوندىقتان بۇل وقيعا اكەمدى ماڭگى ەستە ساقتاۋدىڭ از عانا ۇلەسى دەپ بىلەمىن», دەدى كينوزالدىڭ سالتاناتتى اشىلۋ راسىمىندە العاشقى ءسوزدىڭ تىزگىنىن العان رەجيسسەردىڭ ۇلى, بەلگىلى رەجيسسەر ەسكەندىر نارىمبەتوۆ.
كينوزال بۇگىن اشىلعانىمەن, رەجيسسەردىڭ ءوزى ۇزاق جىلدار بويى «تۇران» ۋنيۆەرسيتەتىنىڭ ستۋدەنتتەرىنە ءدارىس وقۋعا شاقىرىلعان. ۋنيۆەرسيتەت رەكتورى راحمان الشانوۆ: «رەجيسسەردىڭ ۋاقىتىنىڭ تىعىزدىعىنا بايلانىستى كەرى شەگەرىلە بەرگەن ۇسىنىستىڭ ورايى وسىلاي كەلسە دە, ساتىبالدى اعامىز ءبارىبىر ۋنيۆەرسيتەتىمىزگە كەلدى» دەپ, كينو اكادەمياسى ءۇشىن بۇل زالدىڭ ماڭىزى زور ەكەنىن اتاپ ءوتتى. «ەلىمىزدە 180 كينوتەاتر بار. بۇگىندە كينوپروكاتتاعى وتاندىق كينو ۇلەسىنىڭ ارتىپ كەلە جاتقانىن ەسكەرسەك, كورەرمەن ءۇشىن مۇنداي ورىندار كەرەك», دەيدى رەكتور.
سالتاناتتى شاراعا سماعۇل ەلۋباي, گۇلنار ابىكەەۆا, رۇستەم ءابدىراش, الىشەر سۇلەيمەن, ارمان اسەنوۆ, بولات قالىمبەتوۆ سىندى ارىپتەستەرى مەن شاكىرتتەرى قاتىسىپ, ازاماتتىق كوزقاراسىن ايقىن ءبىلدىرۋدى بورىشى ساناعان رەجيسسەردىڭ كۇرەسكەرلىك قاسيەتى تۋرالى كەڭىنەن باياندادى. ايگىلى ناتاليا ارينباساروۆا, پانكراتوۆ-چەرنىي, يۋري مامين, ماريام ياكۋبوۆا ۋاقىت وتكەن سايىن ورنى ويسىراپ, قيماستىق پەن ساعىنىش سەزىمىن ۇلعايتا تۇسكەن تۇلعاعا دەگەن جۇرەكجاردى ەستەلىگىن ارنايى دايىندالعان دەرەكتى فيلم ارقىلى جولدادى. ادامي بولمىسى, دارىنى مەن شىعارماشىلىعىنا بايلانىستى جىلى ەستەلىكتەرىن ورتاعا سالدى.
كينوزال زاماناۋي قۇرىلعىلارمەن جابدىقتالىپ, الداعى ۋاقىتتا بولاشاق رەجيسسەرلەردىڭ شىعارماشىلىق زەرتحاناسىنا اينالدىرىپ, كينو ونەرىنە بايلانىستى مادەني شارالار وتكىزۋ جوسپارلانعان.
الماتى