ەلورداداعى ۇلتتىق مۋزەيدە قازاقستاننىڭ حالىق قاھارمانى, كسرو حالىق ءارتىسى روزا باعلانوۆانىڭ تۋعانىنا ءجۇز جىل تولۋىنا وراي ء«ان ونەرىنىڭ پاديشاسى» اتتى كورمە ءوتتى. وعان داڭقتى ونەر يەسىنىڭ ۇرپاقتارى مەن زيالى قاۋىم وكىلدەرى قاتىستى.
مازمۇندى ءىس-شارانىڭ اشىلۋىندا ۇلتتىق مۋزەي ديرەكتورى ارىستانبەك مۇحامەدي ۇلى كورمەنىڭ ماقساتى تۋرالى ايتا كەلىپ, كۇمىس كومەي ءانشىنىڭ قازاق ەلىنىڭ عانا ەمەس, كەزىندەگى كەڭەس وداعىنىڭ ماقتانىشىنا اينالعاندىعىن جەتكىزدى.
ودان كەيىن ءسوز العان ر.باعلانوۆا اتىنداعى قوعامدىق قوردىڭ توراعاسى, ءانشىنىڭ كەلىنى مارال باعلانوۆا ارداقتى تۇلعانىڭ عاسىرلىق مەرەيتويىنا ارناپ كوپتەگەن ءىس-شارالار ءوتىپ جاتقاندىعىن, سونىڭ ىشىندە بۇگىنگى كورمەنىڭ ماڭىزى بولەك ەكەندىگىن ايتتى.
«سەبەبى كورمەگە انامىزدىڭ ءوزى قولدانعان جەكە زاتتارى ۇسىنىلىپ وتىر. ونىڭ ءبارى – ءبىزدىڭ وتباسىمىز ءۇشىن باعالى جادىگەرلەر سانالادى. وسى ءىس-شارانى وتكىزۋگە مۇرىندىق بولعان ازاماتتارعا العىسىمدى ايتامىن. ول كىسى ءبىزدىڭ عانا انامىز ەمەس, بارشا حالىقتىڭ اناسى», دەدى كەلىنى. سونداي-اق روزا اپامىزدىڭ ۇلى تاجەن باعلانوۆ اناسى جايىنداعى قىزىقتى ەستەلىكتەرىمەن ءبولىستى.
كورمەگە ايتۋلى ونەر يەسىنىڭ ومىرىنەن سىر شەرتەتىن وتباسىلىق قورىنان الىنعان ساحنالىق كيىمدەرى, اشەكەي بۇيىمدارى, ماراپاتتارى مەن جەكە تۇتىنعان زاتتارى, فوتوسۋرەتتەرى قويىلدى. بۇل جادىگەرلەردىڭ ءبارى جۇرتشىلىقتىڭ قىزىعۋشىلىعىن تۋعىزىپ, جىلى اسەرگە بولەدى.
ودان ءارى مادەني شارا دوڭگەلەك ۇستەل ماجىلىسىنە ۇلاسىپ, وندا بەلگىلى كومپوزيتور سەرىك ەركىمبەكوۆ, ءانشى مايرا يلياسوۆا, كۇيشى جانعالي ءجۇزباي, مادەنيەت قايراتكەرى قۋانىش ابدىقالىموۆ جانە ت.ب. زيالى ازاماتتار قازاق ءان ونەرىنىڭ دامۋىنا ولشەۋسىز ۇلەس قوسقان ءانشىنىڭ ءومىرى مەن شىعارماشىلىعى تۋرالى سالماقتى وي قوزعادى.
اسىرەسە قازاقستاننىڭ ەڭبەك سىڭىرگەن قايراتكەرى جانعالي ءجۇزباي: «قازاق ەستراداسىنىڭ ءوز ۇلگىسىمەن قالىپتاسقان تاريحى, مەكتەبى بار. وسى مۋزىكالىق باعىتتىڭ ەلىمىزدە كەڭ قانات جايۋىنا روزا باعلانوۆا زور ۇلەس قوستى. سول سەبەپتى دە, مەن ول كىسىنى «قازاق ەستراداسىنىڭ العاشقى قارلىعاشى» دەپ اتاعىم كەلەدى», دەپ پاراساتتى پىكىرىن ءبىلدىردى.
سونىمەن قاتار ءىس-شارا اياسىندا روزا باعلانوۆا اتىنداعى «قازاقكونتسەرت» مەملەكەتتىك ۇيىمىنىڭ انشىلەرى جينالعاندارعا اسەم ءان سىيلاپ, كورمە مازمۇنىن بايىتتى.