تەننيستەن قازاقستان ايەلدەر قۇراماسى بيىلعى بيللي دجين كينگ كۋبوگىنىڭ پلەي-وفف ساتىسىندا گەرمانيا تەننيسشىلەرىمەن شەبەرلىك بايقاسادى. فينالدىق كەزەڭگە جولداما بەرەتىن ماتچ ءساۋىر ايىندا ەلورداداعى «داۋلەت» تەننيس ورتالىعىندا وتەدى.
قازاقستان تەننيس فەدەراتسياسىنىڭ مالىمەتى بويىنشا اتالعان سايىس ەلورداداعى ۇلتتىق تەننيس ورتالىعىنىڭ ارنايى قۇرىلعان توپىراق توسەنىشىندە ۇيىمداستىرىلادى. ارەنا 2500-دەن استام كورەرمەنگە ەسەپتەلگەن, مۇندا قازاقستان ەرلەر جانە ايەلدەر قۇرامالارىنىڭ ويىندارى بۇعان دەيىن دە بىرنەشە رەت وتكەنى بەلگىلى. قازاقستان تەننيس فەدەراتسياسىنىڭ ۆيتسە-پرەزيدەنتى يۋري پولسكي ۇلتتىق تەننيس ورتالىعىنىڭ كەزدەيسوق تاڭدالماعانىن ايتتى. «ەلوردا كورتتارىندا ءبىزدىڭ قۇرامالار جاقسى ونەر كورسەتىپ كەلەدى. ولار شۆەيتساريا, ارگەنتينا, جاپونيا, يتاليا, پورتۋگاليا, نيدەرلاند سەكىلدى اتاقتى قارسىلاستارىن جەڭدى. ساپالى دايىندىق پەن جانكۇيەرلەردىڭ قولداۋىنىڭ ارقاسىندا 20 ماتچتا جەڭىسكە قول جەتكىزدىك. سوندىقتان بۇل جولى دا وسى تابىستى جالعاستىرۋ ءۇشىن بار كۇشىمىزدى سالامىز», دەدى يۋ.پولسكي.
قازاقستان – گەرمانيا ماتچى 15-16 ساۋىردە وتەدى. جەڭىمپاز قۇراما جىل سوڭىندا ۇيىمداستىرىلاتىن فينالدىق كەزەڭگە جولداما الادى. قازاقستان قىزدار قۇراماسى بىلتىرعى ساۋىردە ارگەنتينادا كورت يەلەرىن اسا تارتىستى وتكەن ويىندا 3:2 ەسەبىمەن جەڭىپ, پلەي-وفف كەزەڭىنە جولداما العان بولاتىن.