اڭگىمە زۇلقارناي الدامجار اتىنداعى قوستاناي الەۋمەتتىك-تەحنيكالىق ۋنيۆەرسيتەتى جايىندا بولىپ وتىر, دەپ حابارلايدى Egemen.kz ءبىلىم جانە عىلىم مينيسترلىگىنە سىلتەمە جاساپ.
بۇعان دەيىن قر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنە ۋنيۆەرسيتەت قىزمەتكەرلەرىنەن وقۋ ورداسىنا قاتىستى شاعىمدار كەلىپ تۇسكەن بولاتىن. بۇل ۋنيۆەرسيتەتتە جوسپاردان تىس تەكسەرۋ جۇرگىزۋگە سەبەپ بولدى. ناتيجەسىندە كوميسسيا تەكسەرۋ پاراعىنىڭ 46 تارماعىنىڭ 35-ءى بويىنشا زاڭسىزدىقتاردى انىقتادى.
ء«بىزدىڭ باستى مىندەتىمىز – ەلىمىزدە ءبىلىم مەن كادرلار دايارلاۋدىڭ ساپاسىن ارتتىرۋ. ەگەر بۇگىن ۋنيۆەرسيتەتتەر ءتيىستى تالاپتارعا ساي بولماسا, وندا ەرتەڭ ءبىلىمى مەن بىلىكتىلىگى جۇمىس بەرۋشىلەردىڭ سۇرانىسىنا ساي كەلمەيتىن مامانداردى شىعارامىز. ارينە, تەكسەرۋ جانە ليتسەنزيانى قايتارىپ الۋ – بۇل ساپالى ءبىلىم بەرۋدى ەمەس, تەك پايدا تابۋدى ءبىرىنشى ورىنعا قوياتىندار ءۇشىن ءتيىمسىز شارا. مينيسترلىك ءبىرىنشى تەكسەرۋدەن كەيىن جوو باسشىلىعىنا بۇزۋشىلىقتاردى جويۋعا ۋاقىت بەردى. بىراق ولار سوت تالقىلاۋلارىنا ۋاقىت جۇمساۋدى ءجون ساناپ, كەمشىلىكتى جويۋعا اسىقپادى. ارينە, بۇل ۋنيۆەرسيتەتتىڭ جابىلۋ ۋاقىتىن ەداۋىر كەشىكتىرىپ, ستۋدەنتتەردەن تولەم تۇرىندە كىرىس الۋعا مۇمكىندىك بەرەدى», دەدى كوميتەتى توراعاسىنىڭ ورىنباسارى مانشۇك ابدىكارىم.
ونىڭ ايتۋىنشا, ۋنيۆەرسيتەت قىزمەتىنە قاتىستى شاعىمدار 2020 جىلدان باستاپ تۇسە باستاعان. ءوز كەزەگىندە ۋنيۆەرسيتەت باسشىلىعى تەكسەرۋ ناتيجەلەرىنە شاعىم ءتۇسىردى. الايدا, ءبىرىنشى جانە ەكىنشى ساتىداعى سوتتاردىڭ شەشىمدەرىمەن كوميتەتتىڭ تەكسەرۋ ناتيجەلەرى بويىنشا بارلىق اكىمشىلىك اكتى وزگەرىسسىز قالدىرىلىپ, ۋنيۆەرسيتەتتىڭ شاعىمدارى قاناعاتتاندىرىلمادى. ەندى ونى جوعارعى سوت قارايدى.
سونىمەن قاتار كوميتەتتىڭ شەشىمىمەن ۋنيۆەرسيتەت باس ليتسەنزياسىنان ايىرىلدى. بۇل شەشىمگە قاتىستى دا ۋنيۆەرسيتەت تاراپى سوتقا شاعىمداندى.