گاگارين كۋبوگى جولىنداعى پلەي-وفف باسەكەسىندە باق سىناپ جاتقان ەلوردانىڭ «بارىسى» بۇل جولى دا «مەتاللۋرگتەن» ايلاسىن اسىرا المادى. «بارىس ارەنادا» وتكەن ءۇشىنشى كەزدەسۋدە قوناقتار 5:3 ەسەبىمەن جەڭىسكە جەتتى.
ماگنيتوگورسكىدە وتكەن العاشقى ەكى ويىندا ەكى كوماندا دا ءبىر-ءبىر جەڭىسكە قول جەتكىزگەن ەدى. ءبىرىنشى ماتچتا «بارىس» 3:2 ەسەبىمەن باسىمدىق تانىتقان بولسا, ەكىنشى كەزدەسۋدە مۇزايدىن يەلەرى جەڭىسكە جەتتى – 6:2. ەلورداداعى ءۇشىنشى باسەكەدە دە قارسىلاستار قارىمدى بولدى. ويىننىڭ العاشقى مينۋتتارى «بارىستىڭ» باسىمدىعىمەن باستالسا دا, 2-مينۋتتا سان باسىمدىعىنا يە بولعان قارسىلاستار وڭتايلى ءساتتى ءمۇلت جىبەرگەن جوق. سەميون كوشەلەۆ مەرگەندىگىمەن كوزگە ءتۇسىپ, ەسەپ اشتى. بۇدان كەيىن دە «مەتاللۋرگ» حوككەيشىلەرى ورتيو قورعاعان قاقپاعا جاۋاپسىز ءتورت شايبا سوقتى. گول اۆتورلارى – پاۆەل اكولزين (22-مينۋت), فيليپپ مايە (24-مينۋت), گريگوري درونوۆ (35-مينۋت), ماكسيم كارپوۆ (44-مينۋت).
تابلوداعى كورسەتكىش 5:0-گە جەتكەن كەزدە عانا «بارىس» ويىنشىلارى ەس جيا باستادى. بىراق بۇل كەزدە ماتچتىڭ اياقتالۋىنا 11 مينۋت قالعان ەدى. دەسە دە وسى ۋاقىت ارالىعىندا جەرلەستەرىمىز قارسىلاس قاقپاسىن ءۇش مارتە ءدال كوزدەدى. بۇل ويىندا كيورتيس ۆالك (49-مينۋت), نيكيتا ميحايليس (51-مينۋت), كودي كۋنيك (59-مينۋت) مەرگەندىك تانىتتى.
ەكى كوماندا اراسىنداعى ءتورتىنشى كەزدەسۋ بۇگىن دە ەلوردادا وتەدى.