بۇل كۇندەرى قاتار استاناسى – دوحادا سپورتتىق گيمناستيكادان الەم كۋبوگى كەزەڭى ءوتىپ جاتىر. العاشقى ىرىكتەۋ كەزەڭىنىڭ ناتيجەسى بويىنشا ەكى قازاقستاندىق سپورتشى جارىستىڭ فينالىنا جولداما الدى.
ۇلتتىق وليمپيادا كوميتەتىنىڭ مالىمەتى بويىنشا دوحاداعى جارىستا گيمناستيكالىق ات سناريادىندا ىرىكتەۋ كەزەڭىنە قاتىسقان جەرلەسىمىز ناريمان قۇربانوۆ 14.566 ۇپاي ولجالاپ, فينالدا باق سىنايتىن سپورتشىلاردىڭ قاتارىنان كورىندى. سونىمەن قاتار ەركىن جاتتىعۋ باسەكەسىندە ونەر كورسەتكەن ميلاد كاريمي دا باس جۇلدەگە تالاسىپ كورەدى. ول ىرىكتەۋ جارىسىندا 13.900 ۇپاي جيناپ, جەتىنشى ناتيجە كورسەتتى. دوحاداعى الەم كۋبوگى كەزەڭى 7 ناۋرىزعا دەيىن جالعاسادى.
ايتا كەتەيىك, قازاقستاندىق گيمناسشىلار وتكەن اپتادا گەرمانيانىڭ كوتبۋس قالاسىندا ۇيىمداستىرىلعان الەم كۋبوگىنىڭ فينالىندا دا باق سىناعان ەدى. ناريمان قۇربانوۆ گيمناستيكالىق ات سناريادىندا جەتىنشى ورىنعا تابان تىرەسە, ميلاد كاريمي ەركىن جاتتىعۋدا – بەسىنشى, كەرمەدە – سەگىزىنشى, قول تىرەپ سەكىرۋدە ءتورتىنشى ورىن العان بولاتىن.