شايبالى حوككەيدەن گاگارين كۋبوگى جولىنداعى پلەي-وفف باسەكەلەرى باستالدى. جارىستىڭ العاشقى ىرىكتەۋ كەزەڭىنە قاتىسىپ جاتقان ەلوردانىڭ «بارىسى» سىرت ايدىندا ماگنيتوگورسكىنىڭ «مەتاللۋرگىمەن» كەزدەسىپ, 3:2 ەسەبىمەن باسىم ءتۇستى.
تۇراقتى بىرىنشىلىكتىڭ بيىلعى ويىندارىندا قارسىلاس شىداتپاي, «شىعىس» كونفەرەنتسياسىن عانا ەمەس, بۇكىل ليگانى ءبىرىنشى ورىنمەن قورىتىندىلاعان «مەتاللۋرگ» كەشەگى ويىندا «بارىسقا» باسىمدىق تانىتا المادى. ويىننىڭ ءبىرىنشى كەزەڭى تەڭ دارەجەدە وتكەنىمەن, ەكىنشى 20 مينۋتتا «بارىس» حوككەيشىلەرى ەسەپ اشتى. گولدىڭ اۆتورى – بەيجىڭدەگى قىسقى وليمپيا ويىندارىندا سلوۆاكيا قۇراماسىمەن بىرگە قولا جۇلدەنى جەڭىپ العان توماش يۋرچو. ال ءۇشىنشى كەزەڭنىڭ باسىندا ياكوب ليليا «بارىستىڭ» باسىمدىعىن ودان ءارى ارتتىرىپ, ەسەپتى 2:0-گە جەتكىزسە, 52-مينۋتتا توماش يۋرچو ءدۋبلدىڭ اۆتورى اتاندى.
مۇزايدىن يەلەرى ساپىنان بۇل ويىندا ەلوردالىق كوماندانىڭ بۇرىنعى ويىنشىسى لينۋس ۆيدەلل مەن نيكولاي گولدوبين ءبىر-ءبىر گولمەن كوزگە ءتۇستى. ەكى كوماندا اراسىنداعى ەكىنشى ماتچ بۇگىن دە ماگنيتوگورسكىدەگى «مەتاللۋرگ ارەنادا» وتەدى. كەيىنگى ەكى ويىن 5 جانە 7 ناۋرىزدا ەلوردادا وتەدى دەپ جوسپارلانعان. ايتا كەتەيىك, پلەي-وففتىڭ كەلەسى كەزەڭىنە ءتورت ويىندا جەڭىسكە جەتكەن كوماندا جولداما الادى.