الماتى كاسىپكەرلەرىنە الداعى 8 جىلدا ستۋدەنتتىك جاتاقحانالار سالۋعا ينۆەستيتسيا قاراستىرۋ تۋرالى ۇسىنىس جاسالدى. بيىل ەلىمىزدە 11 057 ورىنعا ارنالعان 32 جاتاقحانا سالۋ كوزدەلىپ وتىر. ءبىلىم جانە عىلىم مينيسترلىگى «قارجى ورتالىعى» اق ىلگەرىلەتۋ جانە سىرتقى كوممۋنيكاتسيالار دەپارتامەنتىنىڭ ديرەكتورى الپامىس ساتىبالدين وڭىرلىك كوممۋنيكاتسيالار قىزمەتىنىڭ ءباسپاسوز كونفەرەنتسياسىندا بيزنەس وكىلدەرىنىڭ ينۆەستيتسيا سالۋ جانە وتەماقى الۋ مەحانيزمدەرىن ءتۇسىندىردى.
بۇل ءۇردىس مەملەكەتتىك تاپسىرىس جاعدايىندا جۇزەگە اسادى. ا.ءساتىبالديننىڭ ايتۋىنشا, الەۋمەتتىك نىساندار سالۋ تۇراقتى ءارى بولاشاعى بار بيزنەس جوباعا اينالماق. ال كاسىپكەرگە وتەماقى جاتاقحانا قۇرىلىسى نەمەسە جوندەۋ جۇمىستارى تولىعىمەن اياقتالعاننان كەيىن تولەنەتىن بولادى. مەملەكەتتىك تاپسىرىستىڭ باستى تالابى جان باسىنا قارجىلاناتىندىعىندا. ال ستۋدەنت وسى سالىنعان جاتاقحانادا مىندەتتى تۇردە تۇرۋى قاجەت. قۇرىلىس جۇمىستارىنا مەملەكەتتىك ەمەس ۇيىمدار قاتىسا الادى. مەملەكەتتىك تاپسىرىستىڭ جىلدىق مولشەرى قۇرىلىس سالىنعان جاعدايدا ءبىر ستۋدەنتكە 122 اەك (الماتىدا – 144 اەك), قايتا جوندەۋ كەزىندە – 47 اەك (نۇر-سۇلتان جانە الماتىدا 92 اەك) قاراستىرىلعان. بۇل جوباعا رەسپۋبليكالىق بيۋدجەتتەن 152 ملرد تەڭگە بولىنەدى.
ا.ساتىبالدين ستۋدەنتتەردىڭ اي سايىنعى تولەمدەرى مەملەكەتتىك تاپسىرىس قۇنىنا كىرمەيتىندىگىن اتاپ ءوتتى. ونىڭ مولشەرىن جاتاقحانا يەسى رەتتەيدى جانە بەلگىلى ءبىر ايماقتىڭ تۇرعىن ءۇي نارىعىنىڭ جاعدايىمەن انىقتالادى. سونداي-اق كاسىپكەر تۇرمىستىق قىزمەت كورسەتۋ ءۇشىن اسحانا, شاشتاراز, ترەناجەر زالى سياقتى كوممەرتسيالىق قىزمەت الاڭدارىن دا جاساقتاۋ قۇقىعىنا يە. بۇگىندە 30 630 ورىندى 124 جاتاقحانا پايدالانۋعا بەرىلگەن.
ا.ساتىبالدين سونىمەن قاتار جەكەمەنشىك مەكتەپتەردى سالۋدىڭ تيىمدىلىگىنە توقتالدى. سپيكەر اتاپ وتكەندەي, ەلىمىزدەگى وقۋشىلار سانى جىل سايىن ارتىپ كەلەدى, ال مەملەكەتتىك مەكتەپتەردىڭ جۇكتەمەسىن ازايتۋ ۋاقىت كۇتتىرمەيتىن ماسەلە. ايتا كەتسەك, قازاقستاندا 2019-2021 جىلدارى 94 696 ورىندى 287 جەكەمەنشىك مەكتەپ اشىلسا, ونىڭ 41-ءى الماتىدا ورنالاسقان.
ال 2018 جىلدان باستاپ جەكەمەنشىك ءبىلىم بەرۋ ۇيىمدارىندا ورتا ءبىلىم بەرۋگە مەملەكەتتىك ءبىلىم بەرۋ تاپسىرىسىن ورنالاستىرۋ مۇمكىندىگى زاڭدى تۇردە بەكىتىلگەن. جاڭادان ىسكە قوسىلاتىن جەكەمەنشىك مەكتەپتەر ءۇشىن اعىمداعى جىلعا نورماتيۆ ورتا ەسەپپەن 532 مىڭ تەڭگەنى, جىلىنا جاڭادان ەنگىزىلگەن ءاربىر وقۋشى ورنى ءۇشىن عيماراتتىڭ امورتيزاتسياسىنا ارنالعان شىعىستار: قۇرىلىس كەزىندە – 96 اەك (294 مىڭ تەڭگە), رەكونسترۋكتسيا كەزىندە – 47 اەك (143 مىڭ تەڭگە) قۇرايدى. قارجى ورتالىعىنىڭ وكىلى قازىرگى ۋاقىتتا «دامۋ» كاسىپكەرلىكتى دامىتۋ قورى ارقىلى جاتاقحانالاردى دا, جەكەمەنشىك مەكتەپتەردى سالۋ جانە رەكونسترۋكتسيالاۋ بويىنشا بانكتىك قارىزداردى سۋبسيديالاۋ تەتىگى جۇمىس ىستەپ تۇرعانىن حابارلادى. سالىنعان قۇرىلىستار مەملەكەتتەن تولەۋ مەرزىمى وتكەننەن كەيىن قۇرىلىس سالۋشىنىڭ مەنشىگىندە قالادى.
الماتى