سپورتتى دامىتۋدىڭ بەس باسىم باعىتى

ءىس-شاراعا پرەمەر-ءمينيس­تردىڭ ورىنباسارى ەرالى توع­جانوۆ, پرەزيدەنت اكىمشىلىگىنىڭ مەم­لەكەتتىك ينسپەكتورى جانات يسكاكوۆ, مادەنيەت جانە سپورت مي­نيستر داۋرەن اباەۆ, پارلامەنت سە­ناتى مەن ءماجىلىسىنىڭ دەپۋتات­تارى, قوعامدىق كەڭەس وكىلدەرى, جەرگىلىكتى اتقارۋشى ورگانداردىڭ, ۇيىمداردىڭ باسشىلارى, ۇكى­مەت­تىك ەمەس ۇيىمدار, زيالى قاۋىم وكىلدەرى, سپورتشىلار, جاتتىق­تى­رۋ­شىلار قاتىسىپ, ءوز ويلارىن ورتاعا سالدى.

ۆەدومستۆو باسشىسى داۋ­رەن اباەۆ جيىن بارىسىندا ەڭ ءبى­رىنشى 2021 جىل سپورت سالاسىندا اتقا­رىل­عان جۇمىستار مەن سپورتشى­لاردىڭ جەتكەن جەتىستىكتەرىنە توق­تالدى. بىلتىردان باستاپ ەلىمىزدە العاش رەت سپورت سەكتسيالارىنا جان باسىنا شاققانداعى قارجى­لاندىرۋ ينستيتۋتى ەنگىزىلگەنى بەلگىلى. سونىڭ ارقاسىندا بىلتىر 162 مىڭنان استام بالا مەن ءجاسوسپىرىم سپورت سەكتسيالارىنا تەگىن قاتىسقان. سپورت سەكتسيالارىن اشۋعا مەملەكەتتەن 6 ملرد تەڭگە قارجى بولىنگەن.

«سونىمەن قاتار مەملەكەتتىك ءبىلىم بەرۋ ۇيىمدارىنىڭ مۇعا­لىم­دەرىنە ساباقتان تىس سپورتتىق دارىستەر جۇرگىزگەنى ءۇشىن بازالىق لاۋازىمدىق جالاقىدان 100 پايىز مولشەرىندە قوسىمشا اقى تولەۋ جۇيەسى ەنگىزىلدى. دەنە شىنىقتىرۋ جانە سپورت سالاسىنداعى مامان­داندىرىلعان مەكتەپ پەن كوللەدج قىزمەتكەرلەرىنىڭ جالاقىسى 25 پايىز ءوستى. 2023 جىلعا دەيىن جالاقى جىل سايىن كوبەيتىلىپ, 2023 جىلعا قاراي بۇل ءوسىم 100 پايىزدى قۇرايدى. سپورتشىلاردىڭ دوپينگكە قارسى زەرتحاناسى مەن ۇلتتىق دوپينگكە قارسى ورتا­لىق­تىڭ, دەنە شىنىقتىرۋ جانە سپورت بويىنشا رەسپۋبليكالىق وقۋ-ادىستەمەلىك جانە تالداۋ ورتا­لىعىنىڭ باسقارۋشى جانە نەگىزگى قىزمەتكەرلەردىڭ جالاقى مولشەرى لاۋازىمدىق جالاقىدان 100 پا­يىز ءوستى. ءبىلىم بەرۋدىڭ بارلىق دەڭگەيىندەگى دەنە شىنىقتىرۋ ساباقتارىندا «قازاق كۇرەسى», «تو­عىزقۇمالاق» جانە «اسىق اتۋ» ۇلت­تىق سپورت تۇرلەرى مىندەتتى كوم­پونەنت رەتىندە ەنگىزىلدى», دەدى د.اباەۆ.

سونداي-اق مينيستر بىلتىر سالا­ماتتى ءومىر سالتىن ناسيحاتتاۋ اياسىندا رەسپۋبليكا بويىنشا 27 مىڭنان استام بۇقارالىق-سپورت­تىق ءىس-شارا وتكىزىلگەنىن اتاپ ءوتتى. وعان جالپى سانى 1,5 ملن ادام قاتىسقان بولسا, ونىڭ 900 مى­ڭى اۋىلدىق جەرلەردە. 2021 جىل­دىڭ قورىتىندىسى بويىنشا قازاق­ستاندىق سپورتشىلار ءتۇرلى دەڭگەيدەگى 474 حالىقارالىق جارىستا باق سىناپ, ءارتۇرلى دارە­جە­دەگى 632 مەدال جەڭىپ العان. ال رەسپۋبليكا اۋماعىندا 51 حالىقارالىق جارىس وتكىزىلگەن.

جيىن بارىسىندا داۋرەن اباەۆ 2022 جىلى مينيسترلىكتىڭ الدىندا تۇرعان بەس وزەكتى مىندەت تۇر­عا­نىن ايتتى. ونىڭ ەڭ ءبىرىنشىسى جا­نە قازىرگى تاڭداعى ەڭ ماڭىزدىسى – سپورت ينفراقۇرىلىمىنىڭ بول­ماۋى.

«قازىرگى تاڭدا رەسپۋبليكا بويىنشا جابىق سپورت عيما­رات­تارىنىڭ سانى وتە از. ەل بويىنشا ەڭ جاعدايى ناشار تۇركىستان جانە الماتى وبلىستارى, سونداي-اق نۇر-سۇلتان جانە شىمكەنت قالالارى بو­­لىپ تۇر. ال ەڭ قولايلى جاع­داي پاۆلودار, قاراعاندى جانە باتىس قازاقستان وبلىستارىندا باي­قا­لادى. الايدا, بۇل وڭىرلەردە دە ين­فرا­قۇرىلىمنىڭ تاپشىلىعى سەزىلەدى.

ەكىنشى مىندەت – بۇقارالىق سپورت­تى دامىتۋ, ونىڭ ىشىندە مەملە­كەتتىك سپورتتىق تاپسىرىستى دۇرىس ورىنداۋ. پرەزيدەنت وسى باعىت بو­يىنشا ناقتى تاپسىرما بەردى. بۇل – ازاماتتاردىڭ الەۋ­مەت­تىك كوڭىل كۇيىن جاقسارتۋدىڭ ەڭ ۇتىمدى جولى.

ءۇشىنشى – جاتتىقتىرۋشىلاردى, تورەشىلەردى جانە سپورت ارداگەرلەرىن قامتاماسىز ەتۋ. جۇرگىزىلگەن تال­داۋ بويىنشا ەلىمىزدە جوعارى بىلىك­تى جاتتىقتىرۋشىلاردىڭ جەتىسپەۋ­شىلىگى انىقتالدى. مۇنىڭ باستى سەبەبى – جالاقىنىڭ ازدىعى. بۇگىندە ەڭبەكاقى تولەۋ جۇيەسىنە سايكەس بىلىكتىلىگى ورتاشا دەڭگەيدەگى ساناتى جوق جاتتىقتىرۋشىنىڭ جالاقىسى 63 مىڭ تەڭگە.

ءتورتىنشى – ۇلتتىق سپورت رە­زەر­ۆىن دايارلاۋ. ۇلتتىق قۇراما كوماندالاردىڭ قۇرامىن لايىقتى ورىن­باسارلارمەن قامتاماسىز ەتپەي, ۇلكەن جەتىستىكتەرگە جەتۋ مۇمكىن ەمەس. بۇل ءۇشىن بۇگىندە بار­لىق العىشارت بار, بۇعان جاس­تار قۇراما كوماندالارىنىڭ الەم چەم­پيوناتتارىنداعى, ازيا چەمپيو­نات­تارىنداعى, الەم كۋبوكتار­ىنداعى ناتيجەلەرى دالەل بولا الادى. ءوسىپ كەلە جاتقان جاستاردىڭ سپورتتىق الە­ۋەتى جوعارى جانە ءبىز ولاردى نا­زاردان تىس قالدىرماۋىمىز كەرەك.

بەسىنشى –  سپورتتىق مەديتسيناعا ءتيىستى كوڭىل ءبولۋ. بۇگىندە الماتى قالا­سىنداعى دوپينگكە قارسى زەرت­حانانىڭ WADA اككرەديتتەۋىن قايتارۋ بويىنشا جۇمىستار جوسپارلى تۇردە جۇرگىزىلۋدە. 2021 جىلى ەلىمىزدە دوپينگكە قارسى ەرەجەلەردى بۇزۋدىڭ 41 جاعدايى انىقتالدى», دەدى مينيستر.

پرەمەر-ءمينيستردىڭ ورىن­باسارى ەرالى توعجانوۆ وليمپيادا رەزەرۆىن دايارلاۋدىڭ ءبىرتۇتاس جۇيەسىن قۇرۋ كەرەك ەكەنىن ايتتى. «وليمپيادا رەزەرۆىن دايارلاۋدىڭ ءبىرتۇتاس جۇيەسىن قۇرۋ ۋاقىتى كەلدى. بۇل سالادا تۇبەگەيلى ءىس-شارا قابىلداۋ قاجەت. مينيسترلىك, ۇلتتىق وليمپيادا كوميتەتى, اكىمدىكتەر, عىلىمي ينستيتۋتتار مەن فەدەراتسيالار سپورتشىلاردى دايارلاۋ بارىسىندا وزدەرىنىڭ مىندەتتەرى مەن رولدەرىن انىق ءتۇسىنىپ, ولاردى تياناقتى ورىنداۋى ءتيىس. وسى جۇمىستى ۇيلەستىرۋ – مينيس­تر­لىكتىڭ باستى مىندەتى. وليم­پيادا رەزەرۆىن دايارلاۋ قىزمەتىن ناقتى دەڭگەيلەرگە ءبولىپ, ءاربىر دەڭ­گەي ءۇشىن ءتيىستى نورماتيۆتەردى, كورسەت­كىشتەردى, جاۋاپتى ۇيىم­داردى جانە قارجىلاندىرۋ كوزدەرىن انىقتاۋ قاجەت», دەدى ۆيتسە-پرەمەر.

جيىن بارىسىندا قازاقستان بوكس فەدەراتسياسىنىڭ اتقارۋشى ديرەكتورى ماراتبەك مىقتىبەكوۆ, گيمناستيكا فەدەراتسياسىنىڭ پرەزيدەنتى, كوركەم گيمناستيكادان ۇلتتىق قۇرامانىڭ باس جاتتىق­تىرۋشىسى ءاليا يۋسۋپوۆا, اۋىر اتلەتيكادان ەرلەر ۇلتتىق قۇرا­ما كومانداسىنىڭ  باس جاتتىق­تىرۋشىسى نۇرجان سماحانوۆ, Qazaq Batyry جەكپە-جەك اكادەميا­سى­نىڭ نەگىزىن قالاۋشى قانات الين, سولتۇستىك قازاقستان وبلىسىنىڭ «قۋانىش» ۆولەيبول كلۋبىنىڭ ديرەكتورى قايىربەك حامزين ءسوز سويلەدى.