تەننيستەن قازاقستان ۇلتتىق قۇراماسى كەيىنگى جىلدارى جاڭا فورماتتاعى دەۆيس كۋبوگىنىڭ فينالدىق باسەكەسىندە ۇنەمى ونەر كورسەتىپ كەلە جاتقانى بەلگىلى. جەرلەستەرىمىز بيىل دا باس جۇلدە ءۇشىن وتەتىن باسەكەدەن ءۇمىتتى. ول ءۇشىن الەكساندر بۋبليك پەن ميحايل كۋكۋشكين باستاعان جەرلەستەرىمىز وسى اپتاداعى جارىستىڭ ىرىكتەۋ كەزەڭىندە نورۆەگيا قۇراماسىن جەڭۋى ءتيىس.
قازاقستان مەن نورۆەگيا اراسىنداعى شەشۋشى سىنعا جولداما بەرەتىن ىرىكتەۋ باسەكەسى 4-5 ناۋرىز كۇندەرى نورۆەگيانىڭ باس شاھارى – وسلوداعى Oslo Tennisarena سپورت كەشەنىندە وتەدى. بۇل سىندا ەل نامىسىن ميحايل كۋكۋشكين, اندرەي گولۋبەۆ, الەكساندر نەدوۆەسوۆ, دميتري پوپكو جانە قازاقستاننىڭ ءبىرىنشى راكەتكاسى الەكساندر بۋبليك قورعايدى. قازاقستاندىق تەننيسشىلەر دەۆيس كۋبوگى اياسىندا نورۆەگيالىقتارمەن تۇڭعىش رەت كەزدەسپەك. جارىس ەرەجەسى بويىنشا قۇرامالار ءتورت جەكەلەي سىندا جانە ءبىر جۇپتىق ماتچتا باق سىنايدى. ءار ويىن ءۇش سەتكە دەيىن سوزىلادى. جەڭىمپاز قۇراما وسى جىلدىڭ قىركۇيەك ايىندا وتەتىن دەۆيس كۋبوگىنىڭ فينالدىق كەزەڭىنە (كوماندالىق الەم چەمپيوناتىنا) جولداما الادى.
«وسلوداعى ويىنعا تولىق دايىنبىز. حارد توسەنىشى ەكى كومانداعا دا قولايلى دەپ ويلايمىن. كوماندامىزبەن ويىنعا تىڭعىلىقتى دايىندالىپ جاتىرمىز. قۇراماداعى جىگىتتەر نورۆەگيامەن ويىنعا ناعىز بابىندا كەلدى. ەشكىمدە جاراقات جوق. جەڭىسكە جەتىپ, جانكۇيەرلەرىمىزدى قۋانتامىز دەگەن ۇمىتتەمىن», دەدى ميحايل كۋكۋشكين.
نورۆەگيا قۇراماسى قازىرگى تاڭدا دەۆيس كۋبوگىنىڭ رەيتينگىندە 39-ورىندى يەلەنۋدە. سكانديناۆيا ەلىنىڭ وكىلدەرى 2019 جىلدان بەرى جاڭا فورماتتاعى ءتۋرنيردىڭ ءالى كۇنگە دەيىن فينالعا جولداما الا الماي كەلەدى. دەگەنمەن ولار بۇگىنگە دەيىنگى ەڭ ۇزدىك ناتيجەسىنە سوناۋ 1995 جىلى قول جەتكىزگەن. سول جىلى ۇيىمداستىرىلعان تەننيستەن الەمدىك كەزەڭنىڭ باسەكەسىندە نورۆەگيا پلەي-وفف ساتىسىنا دەيىن جەتكەن بولاتىن. سونداي-اق نورۆەگيا دەۆيس كۋبوگىنا 1928 جىلدان بەرى قاتىسىپ كەلەدى.
قازىرگى تاڭدا نورۆەگيا قۇراماسىنىڭ كوشباسشىسى – 23 جاستاعى كاسپەر رۋد. كەزىندە كاسپەردىڭ اكەسى دە, اتاسى دا تەننيسپەن كاسىبي تۇردە اينالىسىپ, ءبىرتالاي جەتىستىككە قول جەتكىزگەن. رۋد بۇل كۇندەرى ەرلەر اراسىنداعى جاڭارعان الەمدىك رەيتينگتە 8-ورىندا تۇر. ول وسى كۇنگە دەيىن اتر تۋرنيرىندەگى جەتى جارىستىڭ باس جۇلدەسىن جەڭىپ العان.
نورۆەگيا قۇراماسىنىڭ ەكىنشى راكەتكاسى سانالاتىن 24 جاستاعى ۆيكتور دۋراسوۆيچ الەمدىك رەيتينگتە 326-ورىنعا جايعاسقان. سونداي-اق ۆيكينگتەر ەلىنىڭ قۇرامىندا 21 جاستاعى لۋكاس حەللۋم ليللەنگەن (الەمدىك رەيتينگتە 1302-ورىندا تۇر), 20 جاستاعى گەرمان حويەرال جانە 22 جاستاعى سيمەن سۋندە براتحولم بار. قۇراما كاپيتانى – اندەرس حاسەت.
ويىندار كەستەسى: 4 ناۋرىز كۇنى ەكى جەكەلەي كەزدەسۋ وتەدى. ماتچتار ەلوردا ۋاقىتى بويىنشا 23.00-دە باستالادى. 5 ناۋرىزدا تەننيسشىلەر جەكەلەي جانە جۇپتىق سىندا شەبەرلىك بايقاسادى. بۇل ويىننىڭ ۋاقىتى 19.00-گە جوسپارلانعان.