قازاقستاندىق تەننيسشى زاڭعار نۇرلان ۇلى 14 جاسقا دەيىنگى سپورتشىلار اراسىنداعى Tennis Europe ءتۋرنيرىنىڭ چەمپيونى اتاندى. جارىس فرانتسيا استاناسى – پاريجدە ۇيىمداستىرىلدى.
ەۋروپانىڭ 14 جاسقا دەيىنگى تەننيسشىلەرى اراسىندا الەمنىڭ 5-راكەتكاسى سانالاتىن زاڭعار نۇرلان ۇلى فينالدا جەرگىلىكتى تەننيسشى تيمەو ترۋفەلليمەن باس جۇلدەنى ساراپقا سالدى. ءبىرىنشى پارتيادا كورت يەسى 7:5 ەسەبىمەن جەڭىسكە جەتسە, ەكىنشى سەتتە جەرلەسىمىز ويىن تىزگىنىن ءوز قولىنا الىپ, تارازى باسىن تەڭەستىردى – 6:1. ءۇشىنشى, شەشۋشى پارتيادا دا ز.نۇرلان ۇلى قارسىلاسىنا ەش مۇمكىندىك بەرگەن جوق – 6:1. وسىلايشا جەرلەسىمىز Tennis Europe سەرياسى بويىنشا وتكەن تۋرنيرلەردە ءتورتىنشى تيتۋلىنا قول جەتكىزدى. ايتا كەتەيىك, كەزىندە بۇل جارىستا رودجەر فەدەرەر, رافاەل نادال, گاەل مونفيس سياقتى مىقتى تەننيسشىلەر دە جەڭىمپاز اتانعان بولاتىن.
جارىس بارىسىندا وتانداسىمىز اۋەلى اۋستريالىق ماكسيميلليان حەيدەلمايەردى, كەيىن فرانتسيانىڭ جاسوسپىرىمدەر اراسىنداعى ءبىرىنشى راكەتكاسى لەني كۋتۋرەنى, شيرەك فينالدا رەسەي وكىلى ساۆا رىبكيندى, جارتىلاي فينالدا ليۆاندىق دانيەل جادتى جەڭگەن بولاتىن.