تەننيستەن 16 جاسقا دەيىنگى قازاقستان ۇلتتىق قۇراماسىنىڭ سپورتشىلارى شري-لانكادا وتكەن كوماندالىق Juniors Davis Cup ءتۋرنيرىنىڭ الدىن الا ىرىكتەۋ باسەكەلەرىندە ءساتتى ونەر كورسەتىپ, نەگىزگى ىرىكتەۋ كەزەڭىنە جولداما الدى.
قازاقستان تەننيس فەدەراتسياسىنىڭ مالىمەتى بويىنشا قازاقستان قۇراماسىنىڭ ويىنشىلارى جانسۇلتان چەمبوتەۆ (كاپيتان), دامير قالدىبەكوۆ, ءامىر ومارحانوۆ جانە ۆيتالي زاتسەپين الدىن الا ىرىكتەۋ سايىستارىنىڭ ءبىرىنشى كەزدەسۋىندە مالايزيالىق تەننيسشىلەردى 3:0 ەسەبىمەن تىزە بۇكتىرسە, ەكىنشى ويىندا دا ءدال سونداي ەسەپپەن يراكتان ايلاسىن اسىردى. ال شيرەك فينالدا موڭعوليانى ۇتتى – 3:0.
الايدا جەرلەستەرىمىز ءۇشىن ۆەتناممەن وتكەن جارتىلاي فينال كەزدەسۋى ءبىراز قيىندىق تۋدىردى. اسا تارتىستى وتكەن ويىندا جەرلەستەرىمىز 2:1 ەسەبىمەن جەڭىسكە جەتىپ, فينالعا جولداما الدى. فينالدا يران تەننيسشىلەرىمەن كەزدەسكەن قازاقستان قۇراماسى 0:2 ەسەبىمەن ۇتىلىپ قالدى. سوعان قاراماستان, قازاقستان جاسوسپىرىمدەر قۇراماسى ءساۋىر ايىندا وسى شري-لانكادا وتەتىن «دەۆيس كۋبوگىنىڭ» ىرىكتەۋ كەزەڭىندە دە ونەر كورسەتۋ مۇمكىندىگىنە يە بولدى.