ورتا سالماقتاعى قازاقستاندىق بوكسشى قانات يسلام اقش-تىڭ پلانت-سيتي قالاسىنداعى بوكس كەشىندە شارشى الاڭعا كوتەرىلىپ, بريتانيالىق دجيممي كەلليمەن (25-2, 10 كو) جۇدىرىقتاستى. WBO Global بەلبەۋى ءۇشىن وتكەن ايقاستا جەرلەسىمىز ون راۋند قورىتىندىسى بويىنشا تورەشىلەردىڭ شەشىمىمەن جەڭىلىپ قالدى. بۇل وتانداسىمىزدىڭ 28 جەكپە-جەكتەگى جەڭىسىنەن كەيىن العاشقى جەڭىلىسى بولدى.
بوكس كەشىنە دەيىن بىرقاتار بوكس مامانى بۇل ايقاستىڭ نەگىزى ءفاۆوريتى رەتىندە قازاقستاندىق بوكسشىنى اتاعان بولاتىن. ويتكەنى جەرلەسىمىز تاجىريبە جاعىنان دا, ستاتيستيكالىق ناتيجە بويىنشا دا قارسىلاسىنا قاراعاندا ءبىر باس جوعارى ەدى. 29 جاستاعى دجيممي وسى كۇنگە دەيىن كاسىبي شارشى الاڭدا 27 كەزدەسۋ وتكىزىپ, 25 مارتە جەڭىسكە جەتكەن. 10 قارسىلاسىن نوكاۋتقا جىبەرسە, ءوزى ەكى مارتە جەڭىلىستىڭ كەرمەك ءدامىن تاتقان. ۇلىبريتانيا بوكسشىسىنىڭ 2015 جىلدىڭ جەلتوقسان ايىندا WBO نۇسقاسى بويىنشا الەم چەمپيونى اتانۋعا تاماشا مۇمكىندىگى بولدى. الايدا ءوزىنىڭ وتانداسى ليام سميتپەن بولعان جەكپە-جەكتىڭ جەتىنشى راۋندىندا تەحنيكالىق نوكاۋتپەن ۇتىلدى. 2018 جىلدىڭ جەلتوقسانىندا يرلانديالىق دەننيس حوگانمەن جۇدىرىقتاسىپ, قارسىلاسىنان ۇپاي سانى بويىنشا جەڭىلىپ قالدى. ءوزىنىڭ سوڭعى باسەكەسىن كەللي وسى جىلدىڭ 12 جەلتوقسانىندا گارري مەتتيۋسقا قارسى وتكىزىپ, ونى ءۇشىنشى راۋندتا ۇرىپ جىقتى.
ءيا, ايقاسقا دەيىن بريتانيالىق بوكسشىدا از عانا باسىمدىق بار ەدى. سەبەبى ول قانات يسلامعا قاراعاندا ءۇش اي بۇرىن جەكپە-جەككە شىعىپ, ءوز بابىن جوعالتا قويماعان بولاتىن. ال وتانداسىمىز ەڭ كەيىنگى جەكپە-جەگىن ءبىر جىل بۇرىن, ياعني 2021 جىلدىڭ 20 اقپانىندا وتكىزگەن. ءبىر جىل بويى شارشى الاڭعا شىقپاعان وتانداسىمىزعا رينگتە ءوزىن ەركىن سەزىنۋى قيىن بولدى.
پلانت-سيتيدەگى جەكپە-جەكتىڭ العاشقى ءۇش مينۋتىندا-اق كەللي ستاتيستيكاداعى باسىمدىق ءاردايىم شىندىققا سايكەس كەلە بەرمەيتىنىن دالەلدەپ بەردى. گونگ بەلگىسى سوعىلا سالىپ, العا قاراي ۇمتىلعان بريتانيالىقتىڭ قاناتقا قاراعاندا جەڭىسكە دەگەن قۇشتارلىعى, رينگتە ءوزىن ەركىن ۇستاپ, شيراق قيمىلداۋى ءبىزدى سەكەمدەندىرىپ قويدى. ءتىپتى ءۇشىنشى راۋندتا كەللي وتانداسىمىزدى توپەلەپ سوققىنىڭ استىنا الىپ, بار ماسەلەنى وسى ساتتە-اق شەشىپ تاستاۋدى كوزدەپ ەدى. الايدا قانات تاجىريبەسىنىڭ ارقاسىندا بۇل ساتتەن وڭاي سىتىلىپ شىقتى. ال ءتورتىنشى راۋندتا ەكى بوكسشى دا ابايسىزدا ءبىر-بىرىمەن سوقتىعىسىپ, قاباقتارىن جارىپ الدى. بىراق تورەشى جەكپە-جەكتى جالعاستىرۋعا پارمەن بەردى. ەگەر ايقاس جاراقاتقا بايلانىستى ءتورتىنشى راۋندتا اياقتالعاندا ءدجيمميدىڭ جەڭىسكە جەتۋى كۇمانسىز ەدى. ويتكەنى كەللي تورەشىلەر ەسەبى بويىنشا الدا تۇرعان ەدى. ايتكەنمەن كەزدەسۋ تولىق 10 راۋندقا جالعاسىپ, جەڭىمپازدىڭ ەسىمىن ءبارىبىر تورەشىلەر انىقتادى. ءبىرىنشى تورەشى جەكپە-جەك تەڭ اياقتالدى دەپ ەسەپتەسە (97:97), قالعان ەكى تورەشى 96:94 جانە 97:93 ەسەبىمەن جەڭىستى بريتانيالىق بوكسشىعا بەردى.
وسىلايشا, 2012 جىلدان بەرى كاسىپقوي بوكستا ونەر كورسەتىپ, بىردە-ءبىر جەكپە-جەگىندە جەڭىلمەگەن بوكسشىمىز العاش رەت جەڭىلىستىڭ كەرمەك ءدامىن تاتتى. قانات يسلامنىڭ بۇرىنعى قارقىنىن جوعالتىپ العانىن كەيىنگى جەكپە-جەكتەرىنەن بايقاۋعا بولادى. ول بۇل جولى دا قارسىلاسىنا ەش تەگەۋرىن كورسەتە المادى. بۇرىنعىداي جويقىن سوققىلارىن دا بايقاي المادىق. مۇنى قارسىلاسى دا ايتىپ وتىر.
– ءار راۋندتا باسىم ءتۇستىم دەپ ويلايمىن. جەكپە-جەكتىڭ بەل ورتاسىنان اسقاندا قولىمدى جاراقاتتاپ الدىم, سوندىقتان كەيىنگى ءتورت راۋند تەك دجەب قانا جاساي الدىم. مەن ونىڭ قىسىم جاساعانىن سەزگەنىممەن, كۇشىن سەزبەدىم. قانات جەكپە-جەكتى باقىلاۋعا العىسى كەلدى, بىراق مەن وعان جوسپارىن ىسكە اسىرۋعا مۇمكىندىك بەرمەدىم, – دەدى كەللي جەكپە-جەكتەن سوڭ.
وكىنىشكە قاراي, پاندەميادان كەيىن كاسىپقوي بوكستا جۇرگەن قازاقستاندىق بوكسشىلاردى نە قىرسىق شالعانى بەلگىسىز, ايتەۋىر جەرلەستەرىمىزدىڭ جولى بولار ەمەس. ەندى, مىنە, بۇل قاتارعا قانات يسلام دا قوسىلدى.