ءماجىلىس توراعاسى ەرلان قوشانوۆ اقمولا وبلىسىنا بارىپ, وڭىردەگى بىرقاتار وندىرىستىك جانە الەۋمەتتىك نىسانداردىڭ جاعدايىمەن تانىستى. سايلاۋشىلارمەن كەزدەسۋگە وبلىس اكىمى ەرمەك مارجىقپاەۆ تا قاتىستى, دەپ حابارلادى ءماجىلىستىڭ ءباسپاسوز قىزمەتى.
ەرلان قوشانوۆ ساپارىن ەلوردادان 30 شاقىرىم جەردە ورنالاسقان شورتاندى اۋدانى بوزايعىر اۋىلىنداعى كوللەدج-مەكتەپ-ينتەرناتتان باستادى. مۇندا اۋىلشارۋاشىلىق ماشينالارىن جاساۋ, دانەكەرلەۋ, قوعامدىق تاماقتاندىرۋ بويىنشا جانە اقپاراتتىق تەحنولوگيا سالاسىنا ماماندار دايارلايدى. 445 ورىنعا ارنالعان بۇل مەكەمەدە بۇگىندە 148 ادام ءبىلىم الۋدا.
ءماجىلىس سپيكەرى كوللەدجدىڭ ماتەريالدىق-تەحنيكالىق بازاسىمەن تانىسىپ, پروفەسسور-وقىتۋشىلار قۇرامىمەن, ستۋدەنتتەرمەن جانە جەرگىلىكتى تۇرعىندارمەن اڭگىمەلەسىپ, تۇيتكىلدى ماسەلەلەردى تىڭداپ, ونىڭ شەشۋ جولدارىن تالقىلادى.
اڭگىمە بارىسىندا ءماجىلىس توراعاسى ەلىمىزدەگى بۇگىنگى احۋالعا توقتالدى. «قاسىرەتتى قاڭتار» وقيعاسى كەزىندە جاستارىمىزدى ارانداتۋشىلار ءوز مۇددەلەرىنە پايدالانىپ كەتتى. الداعى ۋاقىتتا وسىنداي كەلەڭسىزدىكتەرگە جول بەرمەۋ ءۇشىن جاستارعا جۇمىس بەرىپ, ولاردى ءونىمدى ەڭبەكپەن قامتاماسىز ەتۋىمىز قاجەت. جاستاردىڭ بولاشاققا اياعىن نىق باسۋى ءۇشىن ولار ماماندىق يەسى اتانۋلارى كەرەك. سوندىقتان ءبىز رەسپۋبليكا بويىنشا وسى سالاداعى ورتا ارناۋلى ءبىلىمدى دامىتۋعا جاعداي جاساپ جاتىرمىز. شىنىندا دا قاڭتار وقيعاسىندا پرەزيدەنتتىڭ باتىل شەشىمدەرى بولماسا ءبىز بۇگىن بولاشاقتىڭ ماسەلەسىن تالقىلاپ تۇرمايتىن ەدىك», دەدى ە.قوشانوۆ.
جيىن بارىسىندا بەلگىلى بولعانداي, اقمولا وبلىسىنىڭ اكىمدىگى اتالعان كوللەدجدى جاڭعىرتۋعا ماقساتتى قارجى ءبولۋ تۋرالى شەشىم قابىلدادى. دەپۋتاتتار بۇل جۇمىستى باقىلاۋعا الىپ, ورتا ارناۋلى وقۋ ورىندارىنا اكادەميالىق دەربەستىك بەرەتىن زاڭ جوباسى بويىنشا جۇمىستى دا جەدەلدەتپەك. بۇل ولاردىڭ سۇرانىسقا يە ماماندىقتار بويىنشا ماماندار دايارلاۋعا مۇمكىندىك بەرەدى.
ودان ءارى ءماجىلىس توراعاسى قالا مەن جاقىن ماڭداعى ەلدى مەكەندەردى جىلۋ جانە ەلەكتر ەنەرگياسىمەن قامتاماسىز ەتىپ وتىرعان ستەپنوگور قالاسىنىڭ جىلۋ ەلەكتر ورتالىعىندا بولدى. كاسىپورىن قىزمەتكەرلەرى ءوز جۇمىستارى مەن كەلەشەگى تۋرالى ايتىپ, ستەپنوگور قالاسىنداعى تۇرعىن ءۇي-كوممۋنالدىق شارۋاشىلىق جۇيەسىنىڭ جاي-كۇيىنە ەرەكشە نازار اۋداردى. ەرلان قوشانوۆ ستەپنوگور قالاسى تۇرعىندارىنىڭ ماسەلەلەرىنەن جانە ماگيسترالدىق جەلىلەردىڭ توزىعى جەتكەنىنەن حاباردار ەكەنىن اتاپ ءوتتى. وسى ورايدا وبلىس, قالا باسشىلىعىنا قاجەتتى قۇجاتتامانى دايىنداپ, بيۋدجەتتىك ءوتىنىم جولداۋدى ۇسىندى. ء«بىز ءوز تاراپىمىزدان ۇكىمەتكە ءتيىستى ساۋالدار جولدايمىز», دەدى پالاتا سپيكەرى.
كەزدەسۋ بارىسىندا قوعامدا كەڭىنەن تالقىلانىپ جاتقان كوپپاتەرلى تۇرعىن ۇيلەردى باسقارۋ فۋنكتسيالارىن مەنشىك يەلەرى قاۋىمداستىعىنا بەرۋ ماسەلەسى قوزعالدى.
ە.قوشانوۆ تۇرعىندارعا قىزمەت كورسەتۋ شىعىنى مول كوپقاباتتى شاعىن ۇيلەردى باسقارۋ بويىنشا ءوز ۇسىنىستارىن ماجىلىسكە ەنگىزۋدى ۇسىندى.
ءماجىلىس توراعاسى جۇمىس ساپارى اياسىندا بوگەنباي باتىر اتىنداعى وبلىستىق وليمپيادالىق رەزەرۆتىڭ مامانداندىرىلعان مەكتەپ-ينتەرنات-كوللەدجىنىڭ ۇستازدارى جانە وقۋشىلارىمەن دە كەزدەستى. اڭگىمەلەسۋ بارىسىندا ءماجىلىس توراعاسى سپورت مەكتەبىنىڭ تاربيەلەنۋشىلەرى ءار جىلدارى ءبىر ەمەس, بىرنەشە رەت قازاقستاننىڭ نامىسىن حالىقارالىق دەڭگەيدە لايىقتى قورعاعانىن اتاپ ءوتتى.
سونىمەن قاتار ەرلان قوشانوۆ مەكتەپ-ينتەرناتتا تۋىنداعان جانجالدى جاعدايدان, وعان مەملەكەت باسشىسى نازار اۋدارىپ, پىكىر بىلدىرگەنىنەن حاباردار ەكەنىن ايتتى. ءماجىلىس توراعاسى وقۋشىلار اراسىندا تاربيە جۇمىسىن كۇشەيتۋدى تاپسىردى. ايتا كەتۋ كەرەك, 2000 جىلى قاسىم-جومارت توقاەۆ ەلىمىزدىڭ پرەمەر-ءمينيسترى بولعان كەزدە بۇل مەكتەپكە, اشىلعاننان كەيىن بىردەن كەلۋىنىڭ وزىندىك ءمانى بار.
ءماجىلىس توراعاسى بەلگىلەنگەن تاپسىرمانى جوعارى دەڭگەيدە ورىنداپ وتىرعان «قازاقستاننىڭ جىلىجاي تەحنولوگيالارى» كاسىپورنىنىڭ ۇجىمىمەن بىرگە اگروونەركاسىپ كەشەنىن جانە جالپى وڭىردەگى كاسىپكەرلىكتى دامىتۋ ماسەلەلەرىن تالقىلادى. بۇل رەتتە ءماجىلىس سپيكەرى تۇرعىندار ءۇشىن قولجەتىمدى باعا مەن وسىرىلەتىن ءونىمنىڭ جوعارى ساپاسىن ساقتاۋدىڭ ماڭىزدىلىعىنا توقتالدى. سوندىقتان كومپانيانىڭ ودان ءارى دامۋى ماڭىزدى ەكەنىن ايتقان پالاتا توراعاسى بۇگىندە مەملەكەت شارۋالارىمىزعا بارىنشا قولداۋ كورسەتۋگە تىرىسىپ, قازىردىڭ وزىندە ءتۇرلى قولداۋ قۇرالدارى ەنگىزىلگەنىنە نازار اۋداردى. بۇل – ينۆەستيتسيالىق سۋبسيديالار, تىڭايتقىشتاردىڭ, پەستيتسيدتەردىڭ, بيواگەنتتەردىڭ قۇنىن سۋبسيديالاۋ, جەڭىلدەتىلگەن نەسيەلەر.
ساپار بارىسىندا ءماجىلىس توراعاسى جۇمىس ىستەمەي تۇرعان بالاباقشا عيماراتىن ارالاپ, ستەپنوگور قالاسىنىڭ تۇرعىندارىمەن دە كەزدەستى. تۇرعىندار عيماراتتى وقۋشىلار سارايىنا اينالدىرىپ, قالپىنا كەلتىرۋگە ءماجىلىس دەپۋتاتتارىنان كومەك سۇرادى. وسىعان وراي ءماجىلىس توراعاسى مەملەكەت باسشىسىنىڭ 2025 جىلعا قاراي بالالاردى مەكتەپكە دەيىنگى تاربيەمەن 100 پايىز قامتۋ تۋرالى ءتيىستى تاپسىرماسىن اتاپ ءوتىپ, بۇل ماقساتتى جۇزەگە اسىرۋداعى نەگىزگى قۇرالداردىڭ ءبىرى مەملەكەتتىك تاپسىرىس ارقىلى بيزنەستى تارتۋ ەكەنىن ايتتى. ءماجىلىس توراعاسى بالاباقشانى جوندەۋگە جەرگىلىكتى بيۋدجەت ەسەبىنەن نەمەسە باسقا دا كوزدەردەن قارجى ءبولۋدى اكىمدىككە ۇسىندى.
ءماجىلىس توراعاسى وبلىستاعى مەديتسينا قىزمەتكەرلەرىنىڭ تۇيتكىلدى ماسەلەلەرى مەن ۇسىنىستارىن تىڭداپ, «ۆيامەديس» جشس فيليالىندا دارىگەرلەرمەن كەزدەستى. حالىقتى ساپالى مەديتسينالىق قىزمەتپەن قامتاماسىز ەتۋدە مەملەكەت پەن بيزنەستىڭ ىنتىماقتاستىعىنىڭ تيىمدىلىگىنە توقتالعان ەرلان قوشانوۆ مەملەكەت-جەكەشەلىك ارىپتەستىگى مۇمكىندىكتەرىن كەڭىنەن پايدالانۋدى ۇسىندى. بيزنەس مىندەتتى مەديتسينالىق الەۋمەتتىك ساقتاندىرۋ جانە باسقا دا مەملەكەتتىك تاپسىرىس قۇرالدارىنىڭ مۇمكىندىكتەرى ارقىلى مەديتسينالىق مەكەمەلەردى سالادى جانە كادرلاردى تارتادى, مەملەكەت قارجىلاندىرادى.
كەزدەسۋ سوڭىندا اقمولا وبلىسىنىڭ تۇرعىندارى مەملەكەت باسشىسى قاسىم-جومارت توقاەۆقا ەلىمىزدەگى بەيبىتشىلىك پەن تۇراقتىلىقتى ساقتاۋعا مۇمكىندىك بەرگەن «قاسىرەتتى قاڭتار» وقيعاسى كەزىندەگى باتىل ارەكەتتەرى ءۇشىن قولداپ, العىستارىن جولدادى.
قازاقستاندىقتار مەملەكەتتى ودان ءارى دامىتۋ ەل ىشىندە ءوزارا تۇسىنىستىك پەن كەلىسىم بولعان جاعدايدا عانا مۇمكىن ەكەنىن ءبىراۋىزدان قولدايدى. كورشى مەملەكەتتەردە ورىن العان وقيعالار مۇنى تاعى دا ايقىن دالەلدەپ وتىر.