وبلىس ورتالىعىنداعى سۇلتانماحمۇت تورايعىروۆ اتىنداعى كىتاپحانادا «شىعىستىڭ رۋحاني مۇراسى» اتتى كورمە ۇيىمداستىرىلدى. بۇعان دەيىن وبلىس ورتالىعىنا سەمەيدىڭ ف.م.دوستوەۆسكي اتىنداعى ادەبي-مەموريالدىق مۇراجايى دا كوشپەلى كورمەمەن كەلىپ كەتكەن ەدى. ەندى, مىنە, ەكى كۇن بويى پاۆلودارلىق وقىرماندار سەمەيدىڭ اباي اتىنداعى كىتاپحاناسى اكەلگەن كىتاپ كورمەسىن قىزىقتادى.
كورمەنىڭ العاشقىسى «التاي-ەرتىس كىتاپحاناسى» تىزبەگى بويىنشا شىعىس قازاقستان وبلىسىنىڭ وسى كۇنگى اقىن-جازۋشىلارىنىڭ شىعارماشىلىعىنا ارنالدى. ەكىنشىسى, «عاسىرلار ۇنىندەي بايلىق» دەپ اتالادى. قوردان الىنعان, سيرەك كەزدەسەتىن, قولعا تۇسە بەرمەيتىن 200-گە جۋىق قۇندى ادەبيەتتەر جيىنتىعىمەن تانىستىردى. كورمە سورەلەرىندە ميحاەليس, وبرۋچەۆ, ءاليحان بوكەيحانوۆ, نيكولاي كونشين, درەپەر, دارۆين, سپەنسەر, بوكلدىڭ جازبالارى, باسقا دا كىتاپتار, ەنتسيكلوپەديالىق سوزدىكتەر تۇر. بۇل كىتاپ, جازبالاردىڭ تالايىن زامانىندا اباي قولىنا ۇستاپ وقىعان ەكەن. ءۇنسىز, تاعزىم ەتىپ تۇرىپ قالاسىڭ.
سونىمەن قاتار, كورمەگە 1881 جىلى قازان مەن سانكت-پەتەربۋرگتە باسىلىپ شىققان قۇران, 1829 جىلى باسىلىپ شىققان گومەردىڭ «يلياداسى», دالالىق ولكە زەرتتەۋلەرى, بوكەي ورداسىنىڭ قورعاندارى, زەرتتەۋشى نيكولكونىڭ بالقاشقا ساپارى جايلى كونە جازبالار قويىلىپتى. وسىدان 130 جىل بۇرىن اشىلعان اباي اتىنداعى كىتاپحانا تاريحىنىڭ ءوزى ءبىر شەجىرە. بۇل كورمە وبلىستاردىڭ وڭىرارالىق ادەبي-مادەني بايلانىستارى اياسىنداعى رۋحاني-تانىمدىق ماقساتقا ارنالدى.
– عاسىرلىق تاريحى بار كىتاپحانامىزدا ايگىلى تاريحي تۇلعالاردىڭ, سەمەيگە كەلگەن ايگىلى ادامداردىڭ ءىزى قالعانى بەلگىلى. كورمەگە قويىلعان بۇل كىتاپتاردىڭ بارلىعى دا قۇندى, ءاربىر وقىرماندى قىزىقتىراتىن رۋحاني دۇنيەلەر, – دەيدى كىتاپحانا ديرەكتورى ايگۇل شايماردانوۆا.
كورمەنىڭ تاعى ءبىر ءىس-شاراسى «سەمەي ءوڭىرىنىڭ تانىمال تۇلعالارى» اتتى تانىمدىق اقپاراتقا ارنالدى. وقىرماندارعا بيىلعى جىلى مەرەيتويلارى اتالىپ وتەتىن حالقىمىزدىڭ ءبىرتۋار ۇل-قىزدارى جانىبەك كارمەنوۆ, ايتكەش تولعانباەۆ, بيبىگۇل تولەگەنوۆا, ابايتانۋشى توكەن يبراگيموۆ تۋرالى بەينە-كورىنىستەر كورسەتىلدى.
فاريدا بىقاي,
«ەگەمەن قازاقستان».
پاۆلودار وبلىسى.