الماتى اياسىنداعى اۋىلداردى دامىتۋ ماسەلەسى وزەكتى. «شەتسىز قالا» باعدارلاماسى بويىنشا وڭتۇستىك استانا ماڭىن تاياۋ جىلداردا كوركەيتۋ قالا اكىمدىگى ءۇشىن نازار اۋداراتىن كەلەلى ماسەلە.
ينفراقۇرىلىمدارمەن قاتار, جۇرتشىلىققا قىزمەت كورسەتەتىن مەكەمەلەردى تالاپقا ساي جەتىلدىرۋ ۋاقىت كۇتتىرمەيدى. الماتى قالاسىنىڭ اكىمى ەربولات دوساەۆ شەت اۋدانداردى ارالاۋ كەزىندە بىرقاتار كەمشىلىككە كوز جەتكىزىپ, تاياۋ ارادا شەشۋگە ءتيىس جوبالاردى جۇزەگە اسىرۋعا تاپسىرما بەردى. تۇركسىب اۋدانىنداعى جۇمىس ساپارىن «المەرەك» شاعىن اۋدانىنان باستاعان قالا باسشىسى قازىرگى كەزدە الەۋمەتتىك ينفراقۇرىلىمدى دامىتۋعا قاتىستى ماسەلەلەر وتكىر تۇرعانىن اتاپ ءوتتى. مۇندا وتكەن عاسىردىڭ 80-جىلدارى سالىنعان تۇرعىن ۇيدە جۇمىس ىستەپ تۇرعان دارىگەرلىك امبۋلاتوريا سانيتارلىق نورمالارعا ساي ەمەس جانە جوندەۋگە دە كەلمەيدى. ال 300 وقۋشى ورىنعا ەسەپتەلگەن №195 جالپى ءبىلىم بەرەتىن مەكتەپتە 741 وقۋشى ءبىلىم الۋدا.
كوشپەلى كەڭەس بارىسىندا قالا اكىمى كۇن تارتىبىندە تۇرعان ماسەلەلەردى شەشۋ جونىندەگى ۇسىنىستارمەن تانىستى. جايلى قالالىق ورتا باسقارماسىنا مۇددەلى مەملەكەتتىك ورگاندارمەن بىرلەسىپ اعىمداعى جىلى مەديتسينالىق نىساننىڭ قۇرىلىسىن جوبالاۋدى باستاۋ جانە باسقا دا الەۋمەتتىك نىسانداردىڭ: بالاباقشانىڭ, سپورت جانە بالالار الاڭدارىنىڭ قۇرىلىسىن ودان ءارى جۇرگىزۋ ماسەلەسىن پىسىقتاۋ, سونداي-اق №195 مەكتەپكە قوسىمشا نىساننىڭ 450 ورىندى قۇرىلىسىن جوبالاۋ مەرزىمىن جەدەلدەتۋ جانە اعىمداعى جىلى قۇرىلىستى باستاۋ تۋرالى تاپسىرما بەردى.
قازىرگى كەزدە تۇركسىب اۋدانىندا نازار اۋداراتىن وزگە دە ماسەلەلەر جەتكىلىكتى. وسى ورايدا تۇرعىنداردى ورتالىقتان ساپالى سۋمەن جانە سۋ بۇرۋمەن قامتاماسىز ەتۋ ماقساتىندا بيىل شاعىن اۋداندا ينجەنەرلىك جەلىلەردىڭ II كەزەڭىنىڭ قۇرىلىسى باستالىپ, سۋمەن – 287, سۋ بۇرۋمەن 519 ءۇيدى قامتاماسىز ەتۋ جوسپارلانۋدا.
جۇمىس ساپارى بارىسىندا قالا اكىمى «اۆياتور» ستاديونىنىڭ اۋماعىن ارالاپ كورىپ, 3 گەكتار اۋماقتا ورنالاسقان سپورت نىسانىنىڭ باسىم بولىگى بوس تۇرعانىن كوردى. وسىعان بايلانىستى دەنەشىنىقتىرۋ-ساۋىقتىرۋ كەشەنىن جوبالاۋ تۋرالى شەشىم قابىلدانىپ, الداعى ۋاقىتتا ونداعى سەكتسيالارعا «نۇرشاشقان», «المەرەك» شاعىن اۋداندارىنىڭ, سونداي-اق اۋەجاي ماڭىنداعى تۇرعىن ءۇي الابىنىڭ بالالارى تەگىن قاتىسۋى قاجەتتىگى تاپسىرىلدى. سونداي-اق ستاديوندى جاڭعىرتۋعا نازار اۋدارىلىپ, كورەرمەندەر تريبۋنالارى مەن كيىم اۋىستىراتىن بولمەلەر جونگە كەلتىرىلىپ, جۇگىرۋ جولى سالىناتىن بولادى. سونداي-اق قالا باسشىسى وگارەۆ كوشەسىندەگى جۇمىس ىستەمەيتىن بۇرىنعى ۆەدومستۆولىق بالاباقشانىڭ اۋماعىن پايدالانۋ جوسپارلارىمەن تانىستى. مۇندا ارقايسىسى 160 ورىندى مەملەكەتتىك زاماناۋي بالاباقشا مەن بالالاردىڭ دامۋ جانە شىعارماشىلىق ورتالىعىنىڭ قۇرىلىسى جوبالانۋدا. قازىرگى كەزدە 400-گە جۋىق بالا كەزەكتە تۇر, ازىرگە 280 ورىندى ءبىر عانا №185 مەملەكەتتىك بالاباقشا جۇمىس ىستەپ تۇر. وسىنى ەسكەرە وتىرىپ, قالا اكىمى جوبالاۋ جۇمىستارىن اعىمداعى جىلدىڭ III توقسانىنىڭ سوڭىنا دەيىن اياقتاۋدى تاپسىردى. «قايرات» شاعىن اۋدانىندا 41 كوپپاتەرلى تۇرعىن ءۇيدىڭ, 1 500 وقۋشىعا ارنالعان جالپى ءبىلىم بەرەتىن مەكتەپتىڭ قۇرىلىسىمەن, ەمحانا مەن بالاباقشانى جوبالاۋ بارىسى دا اكىم نازارىنا ىلىكتى.
سۋمەن جابدىقتاۋ جانە كارىز ماسەلەلەرىنە ەرەكشە نازار اۋدارىلدى. بۇگىندە 200-گە جۋىق ءۇي جوباعا ءالى كىرمەگەن. قالانىڭ ەنەرگوتيىمدىلىك جانە ينفراقۇرىلىمدىق دامۋ باسقارماسىنا ابونەنتتەردى جەلىلەرگە قوسۋ جۇمىستارىن شۇعىل اياقتاۋى ءتيىس.
شاھار باسشىسى وتكەن عاسىردىڭ 30-جىلدارى سالىنعان مەملەكەتتىك تىلدە وقىتاتىن №59 مەكتەپ-گيمنازيا جۇمىسىمەن دە تانىستى. قازىرگى كەزدە 860 ورىندى مەكتەپتە 1 251 وقۋشى ءبىلىم الۋدا. اعىمداعى جىلدىڭ اقپان ايىندا مەكتەپ-گيمنازيانىڭ جانىنان قوسالقى نىسان سالۋ جونىندەگى جوبالىق قۇجاتتاما مەملەكەتتىك ساراپتامانىڭ قورتىندىسىن الدى. قالالىق جايلى ورتا باسقارماسىنا رەكونسترۋكتسيادان سوڭ سپورت الاڭىن اباتتاندىرۋ ءۇشىن ءتيىستى اۋماقتى كەڭەيتۋ تاپسىرىلدى. سونداي-اق قالا اكىمى ەسكى ۇيلەردى رەنوۆاتسيالاۋ اياسىندا سالىنىپ جاتقان ۇيلەردىڭ قۇرىلىسىمەن تانىستى. مۇندا ساۋرانباەۆ, مولداعاليەۆ, چەرنىشەۆسكي, تولستوي كوشەلەرىنىڭ شارشىسىندا 4 ءۇي بۇزىلىپ, 3 ءۇي سالىندى, 7 ءۇيدىڭ قۇرىلىسى جالعاسۋدا. جالپى, تۇركسىب اۋدانىنداعى 606 ءۇي رەنوۆاتسيا باعدارلاماسىنا جاتادى, بۇل الماتى قالاسىنداعى ەسكى تۇرعىن ۇيلەردىڭ جالپى سانىنىڭ 50 پايىزىن قۇرايدى. اكىم سونىمەن بىرگە اۋداندى اباتتاندىرۋ, وقۋشىلار ءۇيىنىڭ جانىندا ورنالاسقان سكۆەردى جاڭارتۋ جانە جاڭا رەكرەاتسيالىق ايماقتاردى قۇرۋ جوبالارىمەن تانىستى.
الماتى