قر يندۋستريا جانە ينفراقۇرىلىمدىق دامۋ ۆيتسە-ءمينيسترى مارات قاراباەۆ جەڭىلدەتىلگەن اۆتونەسيە تاقىرىبى توڭىرەگىندەگى بىرنەشە جالعان اقپاراتتى جوققا شىعاردى, دەپ حابارلايدى Egemen.kz.
«حالىق اراسىندا 4% جەڭىلدىكپەن اۆتوكرەديت قۇنى 10 ملن تەڭگەگە دەيىنگى مودەلدەرگە عانا بەرىلەدى دەگەن اقپارات تارادى. بۇل جالعان اقپارات. بۇل ءاۆتوموبيلدىڭ قۇنىنا ەمەس, نەسيەنىڭ وزىنە قاتىستى. ياعني, 10 ملن تەڭگەگە دەيىن نەسيە بەرىلەدى. ەگەر ماشينانىڭ قۇنى وسىعان سايكەس كەلسە, ءسىز وسى نەسيەنىڭ ارتىقشىلىعىن پايدالانا الاسىز. ال ەگەر ءسىزدىڭ كولىگىڭىز قىمباتقا تۇسەتىن بولسا, وندا ءسىز ءوز قالتاڭىزدان قوسىمشا قاراجات تولەيسىز», دەدى مارات قاراباەۆ ورتالىق كوممۋنيكاتسيالار قىزمەتىندە وتكەن بريفينگتە.
سونىمەن قاتار ۆيتسە-مينيستر اتاپ وتكەندەي, كەيبىر باق-تار اۆتونەسيەلەۋدىڭ جاڭا باعدارلاماسى ءاۆتوموبيلدىڭ 2-3 مودەلىنە عانا بەرىلەتىنىن حابارلادى.
«بۇل ولاي ەمەس. جەڭىلدەتىلگەن اۆتونەسيەلەۋ ءىس جۇزىندە بارلىق اۆتوموبيل مودەلدەرىنە قولدانىلادى, بىراق باعاسى قىمبات مودەل دە بار. بۇل وعان قولدانىلمايدى. 25 ميلليون تولەۋگە مۇمكىندىگى بار ادامدار ولاردى قالتاسىنان تولەسىن. ءبىزدىڭ مىندەتىمىز – مۇنداي قاراجاتى جوق حالىقتى قولداۋ», دەپ قورىتىندىلادى سپيكەر.