بولگاريانىڭ باس شاھارى – سوفيادا ءوتىپ جاتقان بوكستان «ستراندجا كۋبوگىنىڭ» ىرىكتەۋ باسەكەلەرى اياقتالىپ, شيرەك فينال جەكپە-جەكتەرى باستالدى. ءۇشىنشى جارىس كۇنىنىڭ قورىتىندىسى بويىنشا ەكى جەرلەسىمىز حالىقارالىق ءتۋرنيردىڭ جارتىلاي فينالىنا جولداما الدى. دەمەك, ازىرگە قازاقستان قۇراماسىنىڭ قورجىنىندا كەم دەگەندە ەكى قولا مەدال بار.
جىلدىڭ العاشقى ءىرى تۋرنيرىنە قاتىسىپ جاتقان جەرلەستەرىمىز بولگاريادا جاقسى ناتيجە كورسەتۋدە. ازىرگە قازاقستاندىق بوكسشىلاردان ءبىرىنشى بولىپ حالىقارالىق ءتۋرنيردىڭ جارتىلاي فينالىندا بىلتىرعى ەل بىرىنشىلىگىنىڭ كۇمىس جۇلدەگەرى, اسكەريلەر اراسىنداعى الەم چەمپيوناتىنىڭ جەڭىمپازى ابزال قۇتتىبەكوۆ (92 كگ) شىقتى. اۋىر سالماقتا ونەر كورسەتەتىن وتانداسىمىز شيرەك فينالدا قازاقستاندىق بوكس جانكۇيەرلەرىنە جاقسى تانىس يسپانيالىق ەممانۋەل رەيەسپەن جۇدىرىقتاستى.
ەستەرىڭىزدە بولسا, ول بىلتىرعى توكيو وليمپياداسىندا ۆاسيلي لەۆيتتى ەكىنشى راۋندتا نوكاۋتپەن جەڭگەن ەدى. سەربياداعى الەم بىرىنشىلىگىندە قولا جۇلدە العان رەيەستىڭ شاماسى بۇل جولى ابزال قۇتتىبەكوۆكە جەتپەدى. وتانداسىمىز ءبىرىنشى راۋندتا 5:0 ەسەبىمەن ايقىن باسىمدىق تانىتسا, ەكىنشى راۋندتا ەممانۋەل ۇستەم بولدى – 3:2. سوڭعى شەشۋشى راۋندتى ابزال ءوز پايداسىنا اياقتاپ (3:2), لەۆيتتىڭ ەسەسىن قايتارىپ قانا قويماي, جارىستىڭ جارتىلاي فينالىنا ءوتتى.
جەرلەسىمىز فينالعا جولداما بەرەتىن باسەكەدە وزبەكستان قۇراماسى ساپىندا باق سىنايتىن قانداسىمىز ماديار سايدراحيموۆپەن جۇدىرىقتاساتىن بولدى. 2020 جىلى وزبەكستان چەمپيوناتىندا توپ جارعان ماديار شيرەك فينالدا ۋكراينالىق روبەرت مارتوننان باسىم ءتۇستى. ايتا كەتەيىك, م.سايدراحيموۆ سەربياداعى الەم چەمپيوناتىندا قازاقستاندىق ايبەك ورالبايدى جەڭىپ, جاھاندىق دودانىڭ قولا جۇلدەگەرى اتانعان ەدى.
مادياردان بولەك, وسى تۋرنيردە رەسەيدىڭ قىزدار قۇراماسىندا دا وتانداسىمىز باق سىناۋدا. ول – رەسەيدىڭ ومبى قالاسىنىڭ تۋماسى سالتانات مەدەنوۆا. سالتانات سەرىكقىزى – رەسەي چەمپيونى جانە الەم كۋبوگىنىڭ يەگەرى. سونىمەن قاتار سالتانات جاستار اراسىندا ەۋروپا چەمپيوناتىنىڭ قولا جۇلدەسىن جەڭىپ العان.
ەنشىمىزدەگى ەكىنشى جارتىلاي فينالدىڭ جولداماسى قىزدار اراسىندا اۋىر سالماقتا سىنعا تۇسەتىن ءلاززات كۇنگەيباەۆاعا (81 كيلودان جوعارى) تيەسىلى. ءبىر قىزىعى, جەرلەسىمىز جەرەبە ناتيجەسى بويىنشا بىردە-ءبىر جەكپە-جەك وتكىزبەي, جارتىلاي فينالدا ونەر كورسەتۋگە مۇمكىندىك الدى.
سونداي-اق قازاقستان ەرلەر قۇراماسى ساپىنان سانجار تاشكەنباي, دانيال سابيت (48 كگ), دامير ابدىقادىر, تيمۋر قابدەشوۆ (51 كگ), ماحمۇد سابىرحان (54 كگ), بەيبارىس جەكسەن, ورازبەك اسىلقۇلوۆ (57 كگ), ۆاسيلي سامچۋك (60 كگ), ابزال سەرىك (63,5 كگ), دۋلات بەكباۋوۆ (67 كگ), ەراسىل جاقپەكوۆ (80 كگ), ساعىندىق توعامباي (86 كگ) جانە نۇرلان ساپارباي (92 كيلودان جوعارى) جارتىلاي فينالعا شىعۋعا تالپىنىپ كورەدى.
ال قىزدار قۇراماسىنان الۋا بالقىبەكوۆا (48 كگ), نازىم قىزايباي (50 كگ), بالاۋسا مۇزدىمان, دينا جولامان (54 كگ), كارينا يبراگيموۆا (57 كگ), ۆالەنتينا حالزوۆا (70 كگ), نادەجدا ريابەتس (75 كگ), اناستاسيا بايازيتوۆا (81 كگ) جانە ۆالەريا اكسەنوۆا (81 كيلودان جوعارى) شيرەك فينالدا جۇدىرىقتاسادى.