ساراپشىلار قوعامدىق-ساياسي قاتىناستاردى دامىتۋدىڭ جاڭا باعىتىن تالقىلادى

ساراپشىلار جاڭا قازاقستاندى قۇرۋ جاعدايىندا قوعامدىق كەلىسىم مەن قوعامدىق-ساياسي وزگەرىستەردىڭ ءتيىمدى فورماتىن قالىپتاستىرۋ ماسەلەلەرىن تالقىلادى.

ساراپتامالىق كەزدەسۋ بارىسىندا قر اقپارات جانە قوعامدىق دامۋ مينيسترلىگى ازاماتتىق قوعام ىستەرى كوميتەتىنىڭ توراعاسى ماديار قوجاحمەت ۇسىنىستار مەن ۇسىنىمداردى قالىپتاستىرۋ بويىنشا ساراپتامالىق-تالدامالىق جۇمىس توبى قۇرىلعانىن حابارلادى. جۇمىس توبىنىڭ باستى مىندەتى قوعامدىق قاتىناستاردى جاڭعىرتۋعا باعىتتالعان ۇسىنىستاردى ديالوگ الاڭدارىندا تالقىلاۋ بولىپ تابىلادى.

«جالپى, ءبىر اي ىشىندە قازاقستاندىقتاردان پرەزيدەنت اتىنا ءتۇرلى ساپاداعى جانە باعىتتاعى مىڭداعان حاتتار, ۇسىنىستار كەلىپ ءتۇستى. مۇنىڭ ءبارىن سالالىق مينيسترلىكتەر جيناپ, قارايدى. قوعامعا قۇندى, پايدالى جانە قاجەتتى ۇسىنىستار بار. ءبىز ولاردى ساراپتامالىق توپ اياسىندا قاراستىرىپ, ناقتى جانە ناتيجەلى ۇسىنىستاردى ودان ءارى ىسكە اسىرۋ مۇمكىندىكتەرىن ازىرلەيمىز», دەدى م.قوجاحمەت.

«قازاقستاننىڭ ازاماتتىق اليانسى» زتب پرەزيدەنتى بانۋ نۇرعازيەۆانىڭ ايتۋىنشا, قاڭتار قاسىرەتى ەسكى جانە جاڭا قازاقستان اراسىنداعى سۋايرىققا اينالدى. ەڭ الدىمەن, ازاماتتار پيكەتتەردە, ميتينگىلەردە جانە ت.ب. ەمەس, اشىق سيپاتتاعى پىكىرتالاستاردا ءوز كەلىسپەۋشىلىكتەرىن بىلدىرە الاتىنداي جاعداي جاساۋ كەرەك. بۇگىنگى تاڭدا, تۇتاستاي العاندا, قازاقستاندا ورتاق جانە بىرىكتىرۋشى - بۇل ادىلەتتىلىك پەن الەۋمەتتىك كەپىلدىككە سۇرانىس باسىم.

«ۇلكەن ەنەرگيا, ەموتسيالار, امبيتسيالار مەن ۇمىتتەردى بايقاپ وتىرمىز. ادامداردىڭ سۇرانىسى جوعارى, ولار ءوز پىكىرلەرىنە قۇلاق اسقانىن جانە قوعامعا پايداسىن تيگىزگىسى كەلەدى. بۇل وراسان زور ەنەرگيانى باسقارۋ جانە ونى جاسامپاز ارناعا باعىتتاۋ قاجەت», دەپ اتاپ ءوتتى ب.نۇرعازيەۆا.

تانىمال ەكونوميست, «تالاپ» قولدانبالى زەرتتەۋلەر ورتالىعىنىڭ ديرەكتورى راحىم وشاقباەۆ ەلىمىزدىڭ الەۋمەتتىك-ەكونوميكالىق سالاسىنداعى نەگىزگى پروبلەمالاردى اتادى.

«ەكونوميكالىق جاعدايدى باعالاۋعا بولاتىن نەگىزگى ينديكاتورلار - جۇمىسسىزدىق, ينفلياتسيا, حالىقتىڭ ناقتى تابىسى, ەكونوميكالىق ءوسىم. بۇل كورسەتكىشتەردىڭ بارلىعى بۇرمالانۋدا دەپ سانايمىن. ستاتيستيكا بويىنشا جۇمىسسىزدىق 4-5%, ينفلياتسيا –7,5-8%. بۇل شىندىققا ەشقانداي قاتىسى جوق فانتاستيكالىق ساندار. تاعى ءبىر ۇلكەن ماسەلە – حالىقتىڭ نەسيە الۋى. قارجى رەتتەۋشىسى 1,5 ميلليونعا جۋىق ادام كوللەكتورلاردا ەسەپتە تۇرعانىن مويىندادى, ال ءىس جۇزىندە - سوڭعى 3 جىلدا اتقارۋشىلىق ءوندىرىستىڭ سانى جىلىنا 1 ميلليوننان اسادى. ءبىزدىڭ باعالاۋىمىز بويىنشا, كوللەكتورلار مەن سوت ورىنداۋشىلارعا شامامەن 2-3 ملن ادام قارىز. بۇل 11 ملن ەكونوميكالىق بەلسەندى حالىق. كەدەيلىك, تابىس, جۇمىسپەن قامتۋ تۋرالى ايتقاندا, ءبىز حالىقتىڭ ەداۋىر بولىگى مينۋستا ەكەنىن ءتۇسىنۋىمىز كەرەك. ياعني, ولار بىرنەشە نەسيە بويىنشا قارىز اۋىرتپالىعىن سەزىنەدى», دەدى ر.وشاقباەۆ.

ساراپتامالىق كەزدەسۋ اياسىندا قازاقستاندىق قوعامدىق دامۋ ينستيتۋتىنىڭ باسقارما توراعاسى قازبەك مايگەلدينوۆ قاڭتارداعى قايعىلى وقيعالاردىڭ باستى ءمانى - ونىڭ شەگى ەكەنىن اتاپ ءوتتى. ياعني, مەملەكەتتىك باسقارۋدىڭ ساياسي جانە باسقا دا قاتەلىكتەرى ءبىز ءۇشىن ساباق بولىپ قالا بەرەدى. ەندى وسى ساباقتاردى ەسكەرە وتىرىپ, ءبىز جاڭا قازاقستاندى قۇرۋعا كىرىسۋىمىز كەرەك.