ساپالى ءبىلىمدى قامتاماسىز ەتۋ ماقساتىندا ستۋدەنتتەردىڭ, اسىرەسە اۋىل-ايماقتاردان كەلىپ وقيتىندار ءۇشىن جاتاقحانالارداعى الەۋمەتتىك احۋالدىڭ تۇراقتىلىعى اسا ماڭىزدى. بۇل ماسەلەنى قاداعالاپ وتىرۋ ماقساتىندا كەز كەلگەن وقۋ ورنىنىڭ باسشىلىعىنىڭ ارنايى جۇمىس جوسپارى بەلگىلەنگەن. Town Hall فورماتىندا كەزدەسۋ بارىسىندا قازۇپۋ-دىڭ باسقارما توراعاسى - رەكتورى دارحان ءبىلالوۆ ستۋدەنتتەرمەن كەزدەسىپ, ولاردىڭ ۇسىنىستارىن تىڭدادى.
ءىس-شاراعا ۋنيۆەرسيتەتتىڭ الەۋمەتتىك دامۋ جونىندەگى پرورەكتورى شىڭعىس نۇرلانوۆ جانە اكادەميالىق ماسەلەلەر جونىندەگى دەپارتامەنت ديرەكتورى حايرۋللا جانبەكوۆ قاتىسىپ, سۇراقتارعا جاۋاپ بەردى.
ستۋدەنتتەردىڭ تۇرمىس جاعدايىن ءبىلۋ ءۇشىن جاتاقحانالاردى ارالاپ, كەزدەسۋ وتكىزىپ, ۋنيۆەرسيتەتتە جۇرگىزىلىپ جاتقان جۇمىستاردىڭ ناتيجەسىمەن تانىسقان رەكتور ءبىلىم الۋشىلاردى تولعاندىراتىن ماسەلەلەرمەن جەتە تانىس ەكەندىگىن ءبىلدىردى. الداعى ۋاقىتتا دا د.ءبىلالوۆ بارلىق ساۋالدار مەن ۇسىنىستاردى تىڭداۋعا دايىن ەكەندىگىن اتاپ ءوتتى. ستۋدەنتتەردىڭ ءبىلىم بەرۋ سالاسىنداعى تەحنولوگيالاردى مەڭگەرۋدەگى مۇمكىندىكتەرى, وقۋ ۇدەرىسىندە قولدانىلاتىن پلاتفورمالاردىڭ ەرەكشەلىكتەرىنە نازار اۋدارۋ دا ساپالى ءبىلىم بەرۋدەگى باستى ماسەلە. ۋنيۆەرسيتەتتىڭ ينفراقۇرىلىمدىق جانە تەحنيكالىق وقۋ قۇرىلعىلارىمەن قامتاماسىز ەتۋ قازىرگى كەزدە كەزەڭ-كەزەڭمەن جۇزەگە اسۋدا. سونىمەن قاتار اكادەميالىق ۇردىستەرگە دە باسىمدىق بەرىلەدى.
رەكتور پەداگوگتىڭ ءرولى مەن ونىڭ مارتەبەسىنە قاتىستى ماسەلەلەردى دە ورتاعا سالدى. بۇگىندە پەداگوگ قىزمەتىنىڭ ماڭىزدىلىعى جانە ونىڭ ەل مەن وسكەلەڭ ۇرپاق الدىنداعى جاۋاپكەرشىلىگى ارتىپ كەلەدى. سوندىقتان دا جاڭا ءبىلىم مەن داعدىلاردى يگەرىپ, ولاردى ۇنەمى جەتىلدىرىپ وتىرۋ ماڭىزدى. بولاشاق پەداگوگ رەتىندە ستۋدەنتتەر قازىردىڭ وزىندە ءوز الدىنا كاسىبي جاۋاپكەرشىلىكتى ارتتىرۋ مىندەتىن قويا ءبىلۋى كەرەك. الەۋمەتتىك دامۋ جونىندەگى پرورەكتورى شىڭعىس نۇرلان ۇلى جاتاقحاناعا قاتىستى ساۋالدارعا جاۋاپ بەرە وتىرىپ, ۋنيۆەرسيتەتتە ءبىلىم ساپاسىن ارتتىرۋ, ءبىلىم سالاسىنا وزگەرىس ەنگىزۋ ماقساتىندا قولعا الىنىپ جاتقان جوبالاردىڭ بىرىنە توقتالدى. بۇل جوبا الەمنىڭ كوپتەگەن جوعارى وقۋ ورنىندا جۇيەلى قولدانىلىپ جۇرگەن Honors College جوباسى. جوبانىڭ ماقساتى – پەداگوگيكالىق ماماندىقتار بويىنشا وقيتىن دارىندى ستۋدەنتتەرگە تەرەڭ بىلىممەن قاتار داعدىلاردى بەرۋ. ول ءۇشىن ەموتسيونالدى ينتەللەكت, كريتەريالدى باعالاۋ جۇيەسى, ءبىلىم الۋشىلاردىڭ, اسىرەسە مامانداندىرىلعان نزم, رفمم, بيل, BINOM جانە ت.ب. مەكتەپتەردە زەرتتەۋ داعدىلارىن دامىتۋ سىندى باعىتتار بويىنشا دارىندى ستۋدەنتتەر ءتىزىمى جاسالىپ, سەرتيفيكاتتالعان وقىتۋ باعدارلامالارى ەنگىزىلەتىن بولادى.
دەپارتامەنت ديرەكتورى حايرۋللا جانبەكوۆ وقۋ ۇدەرىسى مەن وقۋ فورماتى, اۋىسۋ, اكادەميالىق ۇتقىرلىققا قاتىستى ءجيى قويىلاتىن سۇراقتارعا جان-جاقتى جاۋاپ بەردى. Town Hall فورماتىنداعى كەزدەسۋدە ستۋدەنتتەر ءوز يدەيالارى مەن پىكىرلەرىن, ۇسىنىستارىن ەركىن ءبىلدىرىپ, سۇراقتار قويدى. وسىنداي كەزدەسۋلەردىڭ ارقاسىندا ۋنيۆەرسيتەت الدىندا تۇرعان وزەكتى ماسەلەلەر بويىنشا ءوز پىكىرلەرىن قالىپتاستىرا الاتىن ءبىلىم الۋشىلاردىڭ, پروفەسسور-وقىتۋشىلار مەن قىزمەتكەرلەردىڭ سانى ارتىپ كەلەدى.
الماتى