ەلوردادا مادەنيەت جانە سپورت مينيسترلىگىنىڭ تۋريزم سالاسى بويىنشا كەڭەيتىلگەن القا وتىرىسى ءوتىپ, وندا ەلدەگى تۋريزم سالاسىنىڭ 2021 جىلعى قورىتىندىلارى مەن الداعى جوسپارلارى تالقىلاندى. جيىنعا پرەزيدەنت اكىمشىلىگى, پارلامەنت, ۇكىمەت وكىلدەرى, وبلىستىق تۋريستىك سالا باسقارمالارىنىڭ باسشىلارى, «اتامەكەن» ۇكپ, مينيسترلىككە باعىنىستى ۇيىمدار باسشىلارى, سونداي-اق تۋريزم مەن بيزنەس وكىلدەرى قاتىستى.
جيىندا ءبىرىنشى بولىپ ءسوز العان پرەمەر-ءمينيستردىڭ ورىنباسارى ەرالى توعجانوۆ بۇگىنگى تاڭدا ەلدەگى ءتۋريزمدى دامىتۋ الەۋمەتتىك-ەكونوميكالىق تۇرعىدان بۇدان ءارى دامۋىمىزدا ماڭىزدى ورىن الاتىنىن ايتتى. ول – ەكونوميكانىڭ دامۋى عانا ەمەس, حالىقتىڭ تابىسىن ارتتىرۋدىڭ نەگىزگى باعىتتارىنىڭ ءبىرى, ويتكەنى بۇل سالا جۇمىس ورىندارىمەن دە تىكەلەي بايلانىستى ەكەنىن جەتكىزدى. سونداي-اق پرەمەر-ءمينيستردىڭ ورىنباسارى بۇگىندە دۇرىس ۇيىمداستىرىلعان مەملەكەتتىك ساياسات پەن تۋريستىك قاۋىمداستىقتىڭ ۇيلەسىمدى ءوزارا ءىس-قيمىلى ارقىلى سالانى جۇيەلى دامىتۋ قامتاماسىز ەتىلىپ كەلە جاتقانىن دا تىلگە تيەك ەتتى.
– شىنىن ايتۋ كەرەك, مۇنىڭ ءبارى وزىنەن ءوزى وڭاي جاسالا قويعان جوق. وسى ۋاقىتقا دەيىن ءتۇرلى كەدەرگىلەردەن وتتىك. پاندەمياعا بايلانىستى بىرقاتار قيىندىققا دا تاپ بولدىق. بۇل باعىتتا ءالى دە ناقتى جۇمىستار ىستەلۋى كەرەك. دەگەنمەن جوسپارلانعان ءبىراز دۇنيە جۇزەگە اسىرىلعانىن وزدەرىڭىز بىلەسىزدەر. ناتيجەسىندە, 2021 جىلى تۋريزم سالاسىنداعى نەگىزگى كاپيتالعا سالىنعان ينۆەستيتسيا كولەمى 564 ملرد تەڭگەنى قۇرادى. قيىن كەزەڭدەردى ەسكەرە وتىرىپ باسقا مەملەكەتتەرمەن سالىستىرىپ قاراساق, بۇل ءتاپ-ءتاۋىر كورسەتكىش دەپ ايتۋعا بولادى. ءارى قاراي دا بۇل باعىتتى بىرگە دامىتۋىمىز كەرەك, – دەدى پرەمەر-ءمينيستردىڭ ورىنباسارى.
ال ۆەدومستۆو باسشىسى داۋرەن اباەۆ مينيسترلىكتىڭ 2021 جىلى اتقارعان جۇمىسى جانە الداعى كەزەڭدەگى نەگىزگى مىندەتتەرى تۋرالى ەسەپ بەردى. مينيستر بۇگىنگى تاڭدا ەپيدەميالىق جاعدايعا جانە قابىلدانعان كارانتيندىك شارالارعا قاراماستان, سالادا وڭ ۇردىستەر بار ەكەنىنە توقتالدى. ماسەلەن, 2021 جىلدىڭ 9 ايىنىڭ قورىتىندىسى بويىنشا ىشكى تۋريستەر سانى 5,2 ملن ادامدى قۇراپ, 2019 جىلدىڭ كارانتينگە دەيىنگى كورسەتكىشىنەن 100 مىڭ ادامعا ارتقان.
سونىمەن قاتار د.اباەۆ ەل پرەزيدەنتى قاسىم-جومارت توقاەۆتىڭ تۋريزم سالاسىن مەملەكەتتىك ساياساتتىڭ پەريفەرياسىنان شىعارىپ, ونى ەلدىڭ ەكونوميكالىق ءوسۋ درايۆەرلەرىنىڭ بىرىنە اينالدىرۋ باعىتىندا ناقتى مىندەت قويعانىن ايتتى. ءىس-شارادا مينيسترلىك بەلسەندى جۇمىس جۇرگىزەتىن 8 باسىم باعىت اتاپ ءوتىلدى. ولار: تۋريستىك بيزنەستى قولداۋ, وتباسىلىق دەمالىستىڭ قولجەتىمدىلىگىنە باعىتتالعان الەۋمەتتىك باستامالار, مەكتەپ ءتۋريزمىن دامىتۋ, جاڭا تۋريستىك باعىتتاردى ازىرلەۋ جانە ەنگىزۋ, كەلۋ ءتۋريزمىن ىنتالاندىرۋ, ەكو جانە اگروتۋريزمدى دامىتۋ, تۋريستىك الەۋەتتى نىعايتۋ ءۇشىن كرەاتيۆتى يندۋستريالاردى ىسكە قوسۋ بويىنشا شارالاردى دايىنداۋ.
د.اباەۆ بالالار دەمالىسىن دامىتۋعا باسا نازار اۋدارۋدى تاپسىردى.
– وتكەن جىلى ءبىز بالالار مەن جاسوسپىرىمدەر ءتۋريزمى نىساندارىن ارالادىق. رەسپۋبليكا بويىنشا 202 بالالار لاگەرى بار ەكەنى انىقتالدى. الايدا ولاردىڭ ۇشتەن ءبىرى 1952-1990 جىلدار ارالىعىندا سالىنعان. كوپشىلىگىندە ماتەريالدىق-تەحنيكالىق بازا ەسكىرگەن. وسىعان بايلانىستى تۋريزم سالاسىنا جەتەكشىلىك ەتەتىن ۆيتسە-مينيسترگە جانە Kazakh Tourism-گە بالالار-جاسوسپىرىمدەر جانە ساۋىقتىرۋ ءتۋريزمىن دامىتۋ جونىندە شارالار كەشەنىن ازىرلەۋدى تاپسىرامىن. ەگەر قاجەت بولسا, ءبىز ءتيىستى باعدارلامانى قابىلداۋعا دايىنبىز, – دەدى مينيستر.
Kazakh Tourism ۇلتتىق كومپانياسىنىڭ باسقارما توراعاسى تالعات امانباەۆ كەيىنگى ءۇش جىلدا, ياعني 2019-2021 جىلدارى ەلىمىزدە بىرقاتار ماڭىزدى جوبا اتقارىلعانىن مالىمدەدى. جۇمىستاردىڭ باسىم بولىگى ماڭعىستاۋ, ششۋچينسك – بۋراباي, تۇركىستان جانە الماتى مەن شىعىس قازاقستان وبلىستارىنىڭ اۋماعىنداعى الاكول كۋرورتتىق ايماقتارىن دامىتۋعا باعىتتالعان.
– ەلىمىزگە كەلگەن تۋريستەرگە ءبىز ارقاشان ساپالى قىزمەت كورسەتۋىمىز كەرەك. سوندىقتان بىلتىر قازاقستاندىق تۋروپەراتور قىزمەتكەرلەرىنىڭ بىلىكتىلىگىن ارتتىرۋ ماقساتىندا ونلاين ساباق جۇرگىزدىك. وعان ەلىمىزدىڭ ءار وبلىسىنان 3 مىڭنان اسا ادام قاتىستى. ونىڭ ىشىندە اۋىلدىق جەردەگى 428 تۇرعىن تۋريستەرگە قىزمەت كورسەتۋگە نيەتتى ەكەندىكتەرىن بايقاتتى. سونداي-اق ارنايى «ساپا بەلگىسى» دەگەن باعدارلاما ەنگىزىپ, بالالار ءتۋريزمى, قالا ءتۋريزمى, اگروتۋريزم جانە جىبەك جولى ءتۋريزمى باعىتى بويىنشا 3 300 تۋريستىك نىساندى زەرتتەپ, جاڭا تۋريستىك ونىمدەردى دامىتۋ بويىنشا ۇسىنىستار دايىندادىق, – دەدى ت.امانباەۆ
جۇرگىزىلگەن جۇمىستاردىڭ ناتيجەسىندە بىلتىر قازاقستان Lonely Planet جاھاندىق باسپاسىنىڭ نۇسقاسى بويىنشا «ۇزدىك قوناقۇي» نوميناتسياسىن جەڭىپ الدى. ال Le Figaro اتتى فرانتسيالىق باسىلىم قازاقستاندى 2021 جىلى بارۋعا ۇسىنىلعان 21 ەل تىزىمىنە قوستى. The Telegraph قازاقستاندى «قارقىندى دامىپ كەلە جاتقان تۋريستىك دەستيناتسيا» رەتىندە اتاپ ءوتتى.
قازاقستاننىڭ Travelstan جارنامالىق روليگى پورتۋگاليادا وتكەن 14th ART&TUR – International Tourism Film Festival فەستيۆالىندە «ۇزدىك روليك» نوميناتسياسىن يەلەنسە, الماتى وبلىسىنداعى «كولساي كولدەرى» ۇلتتىق تابيعي پاركى مەن ساتى كەنتى الەمدىك اۋىل ءتۋريزمىنىڭ «وسكارىنا» يە بولدى.