تجم توتەنشە جاعدايلاردىڭ الدىن الۋ دەپارتامەنتىنىڭ باسشىسى رۋستامبەك ءامريننىڭ حابارلاۋىنشا, ەلىمىزدىڭ بەس وڭىرىندە, اتاپ ايتقاندا, سولتۇستىك قازاقستان, شىعىس قازاقستان, اقمولا, قاراعاندى جانە قوستاناي وبلىستارىندا سۋ تاسقىنىنىڭ بولۋ قاۋىپتىلىگى وتە جوعارى. ال قاۋىپتىلىگى ورتاشا ايماقتارعا باتىس قازاقستان, اقتوبە, پاۆلودار, الماتى, جامبىل جانە تۇركىستان وبلىستارى كىرەدى.
ورتالىق كوممۋنيكاتسيالار قىزمەتىندە وتكەن بريفينگتە مينيسترلىك وكىلى قازىرگى ۋاقىتتا قار شىعارۋ جۇمىستارىنىڭ جالعاسىپ جاتقانىن, ال سۋ تاسقىنىنا قاتىستى تۇپكىلىكتى بولجامدى 1 ناۋرىزداعى جاعداي بويىنشا قازگيدرومەتتىڭ حابارلايتىنىن مالىمدەدى. «اقپان جانە ناۋرىز ايلارىندا تەمپەراتۋرا كۇرت كوتەرىلىپ, جاڭبىر كوپ جاۋسا, ەرىگەن قار مەن جاڭبىردان سۋ تاسقىنى بولۋى ابدەن مۇمكىن. وسىعان وراي قارداعى سۋ قورىنىڭ مولشەرىن, توپىراقتىڭ كۇزگى ىلعالدانۋىن, توپىراقتىڭ قاتۋ تەرەڭدىگىن تالداي وتىرىپ, سۋ تاسقىنى قاۋپى بار ايماقتار انىقتالدى», دەدى ر.امرين. ونىڭ ايتۋىنشا, باتىس قازاقستان, سولتۇستىك قازاقستان, قاراعاندى, اقمولا, قوستاناي جانە اقتوبە وبلىستارىندا توپىراقتىڭ قاتۋ تەرەڭدىگى وتكەن جىلعى كورسەتكىشتەن ورتا ەسەپپەن 6-68 سم-گە تومەندەگەن. «ال قاردىڭ باياۋ ەرۋى سۋ تاسقىنى كەزەڭىنىڭ وتۋىنە وڭ اسەر ەتەدى» دەيدى سپيكەر. «توتەنشە جاعدايلار مينيسترلىگى ورتالىق جانە جەرگىلىكتى اتقارۋشى ورگاندارمەن بىرلەسىپ, كوكتەمگى سۋ تاسقىنى كەزەڭىندە توتەنشە جاعدايلاردىڭ تۋىنداۋ قاۋپىن ازايتۋ جونىندەگى ءىس-شارالار كەشەنىن جۇرگىزۋدە. باسقا اپاتتاردىڭ دا, سۋ تاسقىنىنىڭ دا سالدارىن جويۋعا قاراعاندا ولاردىڭ الدىن الۋ وڭاي جانە ارزان. بۇل الەمدىك تاجىريبە جانە تيىسىنشە, ءبىزدىڭ ساياساتىمىز», دەگەن دەپارتامەنت باسشىسى 2021-2023 جىلدارعا ارنالعان سۋ تاسقىنىنا قارسى ءىس-شارالاردىڭ جول كارتاسى ىسكە اسىرىلىپ جاتقانىن دا جەتكىزدى.
تجم مالىمەتتەرىنە قاراعاندا, سوڭعى بەس جىلدا سۋ تاسقىنىنان ەلىمىزدىڭ ون وڭىرىندەگى 165 ەلدى مەكەن زارداپ شەككەن. سۋ تاسقىنىنىڭ تەرىس اسەرىن تومەندەتۋ ماقساتىندا مينيسترلىك جۇرگىزگەن تالداۋ ناتيجەلەرى كوكتەمگى سۋ تاسقىنى كەزىندە 1010 ەلدى مەكەننىڭ سۋ باسۋ قاۋپىنە نەعۇرلىم بەيىم ەكەنىن انىقتاپ بەرگەن. ال بۇل جەرلەردە 800 مىڭنان استام حالىق تۇرادى.