دۇنيەجۇزىلىك ەكسپو 2020 Dubai كورمەسىندەگى قازاقستان رەسپۋبليكاسىنىڭ ۇلتتىق پاۆيلونى ميلليونىنشى كەلۋشىنى قارسى الدى. ول – دۋباي قالاسىنىڭ 38 جاسار تۇرعىنى, كاسىپكەر ماحمۋد ءال بۋراي.
ول قازاقستاندا بۇرىن-سوڭدى بولماعانىن, سوندىقتان ەلىمىزگە كەلۋ مۇمكىندىگىن جىبەرىپ الماۋعا تىرىساتىنىن ايتتى.
«دوستارىم ماعان قازاقستان پاۆيلونىنا بارۋعا كەڭەس بەردى. ولار ونىڭ ەكسپو-داعى ەڭ ۇزدىك پاۆيلونداردىڭ ءبىرى ەكەنىن ايتتى. مەن قازاقستاندا ەشقاشان بولعان ەمەسپىن. سودان بولار, پاۆيلوننىڭ مازمۇنىنان ۇلكەن اسەر الدىم. ماعان اسىرەسە, روبوت قولمەن ۇسىنىلعان قويىلىم ۇنادى, ول وتە ەموتسيونالدى جانە كەرەمەت, ال پاۆيلون الدىندا ونەر كورسەتكەن ۇلتتىق وركەستر تاماشا تۋىندىلاردى ورىنداۋىمەن ءتانتى ەتتى. ەلدەرىڭىزگە بارىپ, ساياحات جاسايتىنىما وتە قۋانىشتىمىن», دەدى ءال بۋراي.
قازاقستاندىق پاۆيلون مەن قازاقستان رەسپۋبليكاسى, سونداي-اق ەكسپو 2020 Dubai ۇيىمداستىرۋشى كوميتەتى اتىنان ميلليونىنشى قوناقتى قازاقستان رەسپۋبليكاسى پرەمەر-ءمينيسترىنىڭ ورىنباسارى – ساۋدا جانە ينتەگراتسيا ءمينيسترى باقىت سۇلتانوۆ, قازاقستان رەسپۋبليكاسىنىڭ ءباا-دەگى توتەنشە جانە وكىلەتتى ەلشىسى ماديار مەڭىلبەكوۆ, ەكسپو 2020 Dubai كورمەسى توراعاسىنىڭ حالىقارالىق قاتىسۋشىلار جونىندەگى ورىنباسارى ومار شەحادە, ەكسپو 2020 Dubai-داعى قازاقستان رەسپۋبليكاسىنىڭ ۇلتتىق سەكتسياسىنىڭ باس كوميسسارى اللەن ءشايجۇنىسوۆ قۇتتىقتادى.
ماحمۋد ءال بۋرايعا قازاقستانعا تەگىن تۋرعا ەكى ادامعا ارنالعان سەرتيفيكات بەرىلدى. اۋە بيلەتتەرى مەن قازاقستانعا بارۋ تۋرىن قازاقستاندىق Air Astana اۋە كومپانياسى مەن Kazakh Tourism ۇلتتىق كومپانياسى ۇسىندى.
ەسكە سالا كەتەيىك, دۇنيەجۇزىلىك ەكسپو 2020 كورمەسى دۋبايدا 2021 جىلدىڭ 1 قازانىندا باستالىپ, بيىل 31 ناۋرىزعا دەيىن جالعاسادى جانە تاياۋ شىعىستاعى العاشقى ەكسپو كورمەسى سانالادى. كورمەنىڭ تاقىرىبى – «اقىل-ويدى بىرىكتىرىپ, بولاشاقتى قۇرۋ». ەكسپو 2020 Dubai ۇيىمداستىرۋ كوميتەتىنىڭ مالىمەتى بويىنشا, 15 اقپانداعى ەسەپ بويىنشا كورمەنى 13,5 ملن ادام تاماشالاعان, ال ۇلتتىق پاۆيلونعا كۇنىنە ورتا ەسەپپەن 8 مىڭ ادام كەلەدى.
قازاقستان پاۆيلونىنىڭ تۋريستەر ءۇشىن تارتىمدىلىعىنا سۋرەت سالعان ادامدار سانى بويىنشا گيننەستىڭ رەكوردتار كىتابىنا ەنگەن «الەم بەينەسى» ارت-جوباسى مۇمكىندىك بەرەدى.
تۋريستىك قىزىعۋشىلىقتان بولەك, ول حالىقارالىق بيزنەس توپتارى اراسىندا جوعارى قىزىعۋشىلىققا يە. ۇلتتىق پاۆيلون الاڭىندا 30-عا جۋىق ىسكەرلىك ءىس-شارا جوسپارلانعان, ونىڭ اياسىندا كونفەرەنتسيالار, فورۋمدار, B2B كەزدەسۋلەر وتەدى, سونداي-اق ەلدىڭ ينۆەستيتسيالىق جانە تۋريستىك الەۋەتى بويىنشا جوبالار, عىلىم جانە ءبىلىم بەرۋ سالاسىنداعى باستامالارى ۇسىنىلادى.