پرەمەر-مينيستر سەرىك احمەتوۆ وتكەن ايدىڭ باسىندا ينفراقۇرىلىمدىق جوبالار قورىن قۇرۋدى جەدەلدەتۋ تۋرالى تاپسىرما بەرگەنى ءمالىم. وسىعان وراي, «بايتەرەك» ۇلتتىق باسقارۋشى حولدينگىنىڭ تاياۋدا بولعان ديرەكتورلار كەڭەسىنىڭ العاشقى جيىنىندا اتالعان قوردى قۇرۋ جونىندە شەشىم قابىلداندى.
وسى ماقساتتى جۇزەگە اسىرۋ ءۇشىن «بايتەرەك» حولدينگىنىڭ جارعىلىق كاپيتالى بيۋدجەتتىك قارجى ەسەبىنەن 20 ملرد. 330 ملن. 779 مىڭ تەڭگەگە ۇلعايتىلدى. بۇل قارجىنىڭ نەگىزگى بولىگى حولدينگتىڭ ەنشىلەس مەكەمەسى – «قازىنا كاپيتال مەنەدجمەنت» اق-تىڭ قارجىلىق كاپيتالىنا قوسىلدى. ەندى ول قارجى ينفراقۇرىلىمدىق جوبالار قورىن قۇرۋعا جۇمسالادى. قوردىڭ ماقساتى, ينفراقۇرىلىمدىق جوبالارعا ينۆەستيتسيا تارتىپ, وسى باعىتتاعى جۇمىستاردى جانداندىرۋ بولىپ وتىر. قالعان 330 ملن. 779 مىڭ تەڭگە «تەحنولوگيالىق دامۋ جونىندەگى ۇلتتىق اگەنتتىك» اق-ىنا اسپاپ جاساۋ جونىندەگى كونسترۋكتورلىق بيۋرو قۇرۋ ءۇشىن بەرىلمەك ەكەن.
مۇنىمەن قاتار, «بايتەرەك» ۇلتتىق باسقارۋشى حولدينگى مەن «قازاقستاندىق مەملەكەتتىك – جەكە ارىپتەستىك ورتالىعى» بىرلەسىپ, «مەملەكەتتىك – جەكە ارىپتەستىك جوبالارىن سۇيەمەلدەۋ» جشس قۇرماق كورىنەدى. ونىڭ نەگىزگى جۇمىسى ينفراقۇرىلىمدىق, سونىڭ ىشىندە مەملەكەتتىك – جەكە ارىپتەستىك نەگىزىندە جۇزەگە اسىرىلاتىن جوبالاردى قۇرىلىمداپ, ودان كەيىن سۇيەمەلدەۋگە باعىتتالادى ەكەن. ورتالىقتىڭ الدىن الا كەلىسىمنەن وتكەن جوبالارىنىڭ قاتارىندا الماتى ستانساسىن اينالىپ وتەتىن تەمىرجول بار. سونداي-اق, الماتى جانە قاراعاندى قالالارىندا سالىناتىن 300 توسەكتىك كوپسالالى اۋرۋحانالار قۇرىلىسى دا العى لەكتە تۇر. مەملەكەتتىك – جەكە ارىپتەستىك جوبالاردى سۇيەمەلدەۋ ورتالىعىنىڭ جارعىلىق كاپيتالى 200 ملن. تەڭگە كولەمىندە بەلگىلەنگەن. ونىڭ 150 ملن. تەڭگەسى, ياعني 75 پايىزى «بايتەرەك» حولدينگىنىڭ ۇلەسىنە بەرىلەدى. «قازاقستاندىق مەملەكەتتىك – جەكە ارىپتەستىك ورتالىعى» اق-تىڭ ۇلەسى 50 ملن. تەڭگە, ياعني جالپى سومانىڭ 25 پايىزىن قۇرايدى.
ديرەكتورلار كەڭەسى حولدينگتىڭ 2014-2023 جىلدارعا ارنالعان دامۋ ستراتەگياسىن دا بەكىتتى. قۇجاتتا حولدينگتى ينتەگراتسيالانعان دامۋ ينستيتۋتى رەتىندە قالىپتاستىرۋعا بايلانىستى مىندەتتەر مەن تاياۋ ونجىلدىقتاعى ستراتەگيالىق باعىتتار ايقىندالعان. ءبىرىنشى كەزەكتەگى مىندەتتەر – قارجىلىق جانە وندىرىستىك جۇمىستاردىڭ شىعىنسىز جۇرگىزىلۋىن قامتاماسىز ەتۋ شاراسى مەن قارجى رەسۋرستارىن باسقارۋدىڭ تيىمدىلىگىن ارتتىرۋ. مۇنىمەن بىرگە, حولدينگ جۇمىسىنىڭ جاريالىلىعىن قامتاماسىز ەتىپ, حالىقتىڭ سەنىمىن نىعايتۋ جونىندە جۇمىستار جۇرگىزىلمەك.
وتىرىستا حولدينگ قۇرامىنداعى ەنشىلەس مەكەمەلەر اكتيۆتەرىنىڭ قۇرىلىمىن وڭتايلاندىرۋ ماسەلەسى دە تالقىلاندى. ساراپتامالارعا زەر سالساق, حولدينگ قۇرىلىمىندا ءپروفيلدى ەمەس اكتيۆتەر جوق. دەگەنمەن, بىرقاتار ەنشىلەس كومپانيالار ينۆەستيتسيالىق قورلارعا نەمەسە ينۆەستيتسيالىق جوبالاردى جۇزەگە اسىرۋعا قاتىسىپ كەلگەن. وسىعان وراي, جىل سوڭىنا دەيىن «دامۋ» كاسىپكەرلىكتى قولداۋ قورى 5 ميكروكرەديتتىك ۇيىمنان شىعادى. «تەحنولوگيالىق دامۋ جونىندەگى ۇلتتىق اگەنتتىك» اق تەحنوپاركتەر جۇمىسىن وڭتايلاندىرۋ ماقساتىندا الماتى ايماقتىق تەحنوپاركى مەن ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ تەحنوپاركىن بىرىكتىرۋ باعىتىندا جۇمىسىن جالعاستىرا بەرەدى.
نۇرباي ەلمۇراتوۆ,
«ەگەمەن قازاقستان».