ىشكى ىستەر مينيسترلىگى ەلدەگى زاڭسىز قارۋ ساقتاۋ جايتى جانە ەسىرتكى تاراتۋمەن كۇرەس جاعدايىنا قاتىستى سوڭعى دەرەكتەرمەن ءبولىستى, دەپ حابارلايدى Egemen.kz.
«جەدەل-پروفيلاكتيكالىق شارا بارىسىندا قارۋدى زاڭسىز ساقتاعانى جانە الىپ جۇرگەنى ءۇشىن 451 ادام ۇستالدى. ولاردان 774 دانا اتىس قارۋى جانە 7 737 ارنايى قۇرالدار مەن وق-دارىلەر تاركىلەندى. مىسالى, الماتى قالاسىندا 1982 جىلى تۋعان «Toyota Land Cruiser Prado» ماركالى كولىك يەسى ۇستالدى. اۆتوكولىكتىڭ سالونىندا «مر-79-9تم» تراۆماتيكالىق تاپانشاسى تابىلىپ, تاركىلەندى», دەدى قر ءىىم اكىمشىلىك پوليتسيا كوميتەتى باسقارما باسشىسىنىڭ ورىنباسارى داۋرەن قوزىباقوۆ ونلاين وتكەن بريفينگتە.
ودان بولەك, سپيكەر ەلدەگى ەسكىرتكىمەن كۇرەس احۋالىنا توقتالىپ ءوتتى.
«ەسىرتكىنى زاڭسىز ساقتاعانى جانە الىپ جۇرگەنى ءۇشىن 667 ادام ۇستالدى. ولاردان جالپى كولەمى 170 كەلىدەن استام ەسىرتكى تاركىلەندى. ونىڭ ىشىندە 545 گرامنان استامى گەروين. مىسالى, بيىل 31 قاڭتاردا اقتوبە قالاسىندا ءتارتىپ ساقشىلار كۇدىكتى 2 ازاماتتى ۇستادى. ولاردان 10 كەلىگە جۋىق (9 880 گر) ماريحۋانا تابىلىپ, تاركىلەندى», دەيدى ول.