اقحا-نىڭ (اتوم قۋاتى جونىندەگى حالىقارالىق اگەنتتىك) ۆەناداعى شتاب-پاتەرىندە يادرولىق قاۋىپسىزدىك جونىندەگى كونۆەنتسياعا مۇشە مەملەكەتتەردىڭ VI شولۋ كەزدەسۋى اشىلدى.
ەكى اپتا بويى اتالعان كونۆەنتسياعا قول قويعان 76 مەملەكەتتىڭ كونۆەنتسيا ەرەجەلەرىن ورىنداۋىنا شولۋ جاسالىپ, يادرولىق قاۋىپسىزدىكتى نىعايتۋ بويىنشا ۇسىنىستار ەنگىزىلىپ, جاپونياداعى «فۋكۋسيما-دايچي» اەس-ىندە ورىن العان اپات سالدارىن جويۋعا بايلانىستى جانە ت.ب. ماسەلەلەر قاراستىرىلاتىن بولادى.
شولۋ كەزدەسۋى شەڭبەرىندە قازاقستان رەسپۋبليكاسى يادرولىق قاۋىپسىزدىك جونىندەگى كونۆەنتسيانى ورىنداۋ بويىنشا توتەنشە جاعدايلار, دەنساۋلىق ساقتاۋ جانە قورشاعان ورتا جانە سۋ رەسۋرستارى مينيسترلىكتەرىنىڭ قاتىسۋىمەن يندۋستريا جانە جاڭا تەحنولوگيالار مينيسترلىگى جانىنداعى اتوم ەنەرگياسى كوميتەتى دايىنداعان ءوزىنىڭ العاشقى ۇلتتىق بايانداماسىمەن تانىستىرادى.
باياندامادا كونۆەنتسيا ەرەجەلەرىنەن تۋىندايتىن قازاقستان مىندەتتەرىنىڭ ءار باپ بويىنشا ورىندالۋىنا سيپاتتاما بەرىلگەن.
VI شولۋ كەزدەسۋى جۇمىسىنا ۆەناداعى حالىقارالىق ۇيىمدار جانىنداعى تۇراقتى وكىل قايرات سارىبايدىڭ باسشىلىعىمەن قازاقستان رەسپۋبليكاسىنىڭ دەلەگاتسياسى قاتىسۋدا.
77 مەملەكەت ەنگەن يادرولىق قاۋىپسىزدىك جونىندەگى كونۆەنتسيا 1994 جىلعى 17 ماۋسىمدا قابىلدانىپ, 1996 جىلعى 24 قازاندا كۇشىنە ەندى. قۇجات اقحا-نىڭ ىرگەلى ۇستانىمدارىنا نەگىزدەلگەن اتوم سالاسىنا ەرىكتى تالاپتاردى بەلگىلەيدى.
قازاقستان رەسپۋبليكاسى كونۆەنتسيانى 2010 جىلعى 3 اقپاندا بەكىتتى. يادرولىق قاۋىپسىزدىك ءجونىندەگى كونۆەنتسيا قازاقستان رەسپۋبليكاسى ءۇشىن 2010 جىلعى 8 ماۋسىمدا كۇشىنە ەندى.
«ەگەمەن-اقپارات».